Nai' Yakop natoon neu in aanh ein, es-es ate nok in a'monin anbi neon amnemat
49
Rarit nai' Yakop anreun no'en in aanh ein ok-oke'. Sin neman ntean on naan ate, in na'uab am nak, “Hi iim ampaumak-maak kau fe'. Au he utoon ki es-es ate hi 'monim anbi neon amnemat.” 2 Rarit nai' Yakop anmurai na'uab ma natoon nain neu in aanh ein am nak,“Nai' Yakop in aanh ein ki! Hi mkoen om iim nai ma mhake mfuun maan kau.
Amtakan hi ruikm ein he mneen am mitniin hi ama' Isra'el in uaban ma in a'an.
3 Neu ko, aam Ruben. Ho re' ia, aan moen unu, asoit eno'. Ho mjair on re' au teas ma au 'nimak a'ne'u. Are' tuaf anhormaat ko. 4 Mes fe'-fe' ete ho neek maan na'oni'. Ho roim ii ka nhake nki'if, on re' noe sako' re' ka t'eek taan ee fa. Nok askeken, ho mnao mtuup mok au fee bi Bilha, ma mhai'niis ho ama' in hara' tupa'. Es naan ate, ho sapaam re' amjair on atoin ko'u ma mone 'naek ka mateka' fa heen!
5 Nai' Simeon ma nai' Lewi! Hi nua ki taos mese'. Atteek ahaa besi-benas ate, hi nua ki manoem ein kah een. Etun hi mha'mui' ma misusab too mfaun. 6 Hi mmariin ammaet, karu hi m'oet mifeek bijae nggwin sin pii oetk ein, tar antea sin nfuka' nenu' nabaar ahaa sin baark ein. Hi 'moe'm ein maufinu batuur-batuur. Karu hi meek-meuk nisim, hi mroor miis atoni'. Au ka' roim fa he 'ok a'seor hi rasim. 7 Onaim oras ia, au 'kaas hi neek mapuut ein naan, natuin hi mapuut besin ki! Ma hi too's ein naan ka mpaek fa rais kasian akre'o msa'. Hi of ro he misaah kiim hi 'moe' reu'f ein. Uisneno of anporin nsiksakan hi sufam-kau'm ein. Sin of natuan nbin bare-bare nbin pah Isra'el.
8 Neu ko, aam Yahuda. Ho kanam naan, in a'moufn ii ‘pures-bo'is’. Ho ori' ma ho tata' sin of anbo'is ko ma nhormaat ko. Ho of miis ho muusn ein, tar antea sin ka bisa nait fa sin a'naak ein. 9 Ho re' ia, on re' singa muin ma'tain es, re' naim kuun amnahat. Ho on re' singa keso re' nbiun ma nakoo in aon ee he ntuup. Ka tiit fa es, re' nabrain he noik ko. Ho on re' singa ainaf amsa' re' npao in anah; ka tiit fa es nabrain he nak'aun ee. Ho on naan msa'. Atoin ein of anmasahun ko, ma ka nabei' ein fa he nmo'en tafi'-tafi'. 10 Ho of es amnaa' aprenat. Ho sufam-kau'm ein of annaa' aprenat anmaktun-tuin ein, tar antea tuaf es, re' in nmui' sapaaf anneis-neis. In of es antook ma nnaa' aprenat naan. Rarit too na'kon uuf-uuf sin of na'ruir ein ma na'besan neu ne.a 11 Ho of ammoin nok neek marine. Ho mroim saa'-saa' aah ate, of anmui'. Ho he mmoe' saa' amsa', of anjair! Onaim ho mui't ein, nok ho reen ee aafk ein of amfaun ma nho-hoen. 12 Ho bukaem ii ro namiin ka natfeek fa.
13 Neu ko, aam Sebulon. Ho auf pusaak ee of mainua feko ma npaumaak tasi, tar antea nmanaak nok kota Sidon. Abnao nggwin neman na'kon mee-mee ma nasanut sin boint ein nbin ho tais je in ninen nok mamut.
14-15 Neu ko, aam Isaskar. Ho re' ia on re' bikaes es, re' nteek ee te, keledai ma'tani'. Mes ho 'naak fautm ii kah een. Karu ho mtuup ambi raan atnana',b sekau es re' he npoo' ko he mnao mkoon. Mes karu ho miit kuan es in areokn ii et panin ne, es ka nreun ko fa msa' ate, ho mait ho brua' ma mroi sin ma mnao meu nee. Ho on re' nana nai!
16 Neu ko, aam Dan. Ho kanam naan, in a'moufn ii, ‘afeek rasi’. Ho mok ho sufam-kau'm ein of amjair afeek rasi meu hi pah Isra'el sin sin rasin. Hi mifeek rasi te, natai ma ka mpiir fa humaf. 17 Ho mahiinm ii on re' kaun araut re' antuup anpao nbi raan ee ninen. Karu atoni' nsae bikase' ma npeo' naan ate, nok askeken, ho mrau mrair bikase' naan in haen tikan, tar antea in tuan naan anmouf.
18 Koi, UISNENO! Au 'on-'onen he Ho mfee 'honis meu kai ok-oke'.
19 Neu ko, aam Gat. Ho kaanm aan atneen ete, in haan ii on re' ‘mbaan musu’. Pukan apaikaurt ein of anbaan ko, mes ho of mbaan ambaras sin, ma miis sin.
20 Neu ko, aam Aser. Ho rene ma po'on sin aafk ein esan re' reko nnes-nesin. Ho of ammoe' kokis aminat huma'-huma' re' ma'osa', he uisf ein neman nsosan na'kon ko.
21 Neu ko, aam Naftali. Ho on re' ruu ainaf, re' naen ma nfui nmaet. Es ka nabei' fa he n'ator ko. Ho muhoni' maan ho aanh ein, namasan rek-reko.
22 Neu ko, aam Yusuf. Ho on re' fae re' nmoni npaumaak oe mata'. In taen ein of annoonk ein nsaen neun rame mnanu',c on re' ho sufam-kau'm ein annaon neun bare-bare. 23 Anmui' tuaf bian re' nasaeb sin neek meens ein neu ko, on re' musu re' nakrao ko. 24 Mes Uisneno re' au u'bees 'eu Na ji, anturun ma nbaab ko. Es naan ate, In nmoe' ho 'nimam naan na'bei', tar antea ho mubei' ma mukrao mbaras meu ho musun naan, maski na'roo. Ho of miis sin, natuin Uisneno es anturun ma nbaab ko. Batuur In kuasn ee ma'tani'! Etun au u'peis ok 'eu Ne. Natuin In es anpao ma npanat kau. 25 In of anpanat ko msa', ma nfee ko tetus-athoen huma'-huma'. Esan re': tetus na'ko neno tunan, ma na'ko pah-pinan, ma ho aan hoin ein amfaun ma n'ao-minan. 26 A'toe'f ein ka namnekun fa. Tetus re' au 'fee je 'eu ko re' ia, anneis na'ko 'toe'f ein ok-oke'! Maut he teuts ein re' ia nasai piut neu ko, natuin ho mneis mu'ko ho ori'-tata' sin ok-oke'.
27 Neu ko, aam Benjamin. Ho brainm ii on re' aus fui ko'u re' namnaah. Fe' kik-kiku msa', in nheek enrair in amnahat. Mes karu nfai te, in nnao ma nbati mnaah nesif naan neu in aanh ein. Ho sufam-kau'm ein of ma'taink ein on re' naan amsa'!”
28 Uab ein ia, nai' Yakop in uab sin neu in aanh ein. In natoon nain sin, es-es ate in a'monin, nok in sufan-kau'n ein anbi neno-neno amnemat. Sin aar sin re' naan, esan re' anjarin aam uuf neun uuf bo'es am nua nbin pah Isra'el.
Nai' Yakop anmaet
29-30 Rarit nai' Yakop antoit in aanh ein he nmo'en rais manba'an. In na'uab am nak, “Ka 'roo fa heen ate, au he 'maet een. Karu au 'maet, hi ro he mnao msuub kau meu nai'-ka'o Abraham in nopu. Nopu naan et nuat re' npaumaak kuan Makpera ma kuan Mamre et pah Kana'an. Unu' te, nai'-ka'o Abraham ansoos nuat naan nok rene ma po'on naan he njair in baer subat. In nsoos nafeek ee na'ko atoin Hetes es, kaann ee nai' Efron. 31 Anbi naan, sin nsuub hit nai'-ka'o Abraham, ma hit bei'-ka'o bi Sara', au ama' nai' Isak, ma au aina' bi Ripka. Onaim hi ro he msuub kau mbi naan, 'bi au fee bi Lea in abnapan. 32 Mimnau! Hi kais amnikan he msuub kau mbi nuat re' nai'-ka'o Abraham ansoos naan ee re' naan.”
33 Nai' Yakop na'uab anrair on naan ate, in ntuup anfain neu hara' tuup ee, ma in nmaet.