Nai' Yakop antoit tetus-athoen neu nai' Yusuf in aanh ein
48
Ka 'roo fa na'ko oras naan ate, nai' Yusuf napein hanaf nak, in aamf ee nameen ma'fena'. Onaim in nok in aan moen nua' ein naan, esan re' nai' Manase ma nai' Efraim, ma sin nnaon nkius sin na'if nai' Yakop. 2 Oras nai' Yakop nahiin nak nai' Yusuf neem anrari te, in nareen on he ntoko nbi hara' tupa'.3 Onaim in na'uab neu nai' Yusuf am nak, “Usu! Neon gwes ii, Uisneno re' Akuaas Ma'tani' naan, nakriir On neu kau nbi kuan Lus, et pah Kana'an. Anbi naan, In nba'an neu kau, 4 mnak, ‘Au of umfauba' ho anah-upuf sin he njarin too mfau-rutu. Au of a'feen sin bare re' ia msa', he njair sin auf pusaak tar antea nabar-baar.’
5 Onaim oras ia ho anah nai' Efraim ma nai' Manase, sin sapaak ein es re' ia: au 'uum 'eu pah Masir ia te, sin nua sin anbi nanin ia. Maski on naan amsa', oras ia, au 'aan sin on re' au aanh ein goa kuuk, on re' nai' Ruben ma nai' Simeon. 6 Mes karu ho muhoni' mteni' te, na' ho anah. Au ka 'aan sin fa neu au aanh ein nu. Onaim maut he sin ntoup sin pusaak ein na'kon sin taatf ein, nai' Efraim ma nai' Manase. 7 Au 'moe' on re' naan, he umnau ho aina' bi Rahel. Oras hit tfain teem ta'ko pah Mesopotamia he teu pah Kana'an ate, ho aina' nmate nbi raan atnana' nbi ranan re' npaumaak kuan Efrata et pah Kana'an. Oras naan, au 'suus a'maet! Onaim au 'suub ee et raan ee ninen re' he ttaam teu kuan Efrata naan.” (Oras ia, kuan re' naan, sin nakaanb ee Betlehem.)
8 Nai' Yakopa na'uab anrair on naan ate, in nait matan ma nkius niit nai' Yusuf in aan monen naan. Onaim in nataan nai' Yusuf am nak, “Hoe, sekau aanh ein esan re' ia?”
9 Onaim nai' Yusuf nataah am nak, “Ri'aan ein re' ia, Uisneno es anfee sin neu kau nbi pah Masir ia.”
Rarit nai' Yakop na'uab am nak, “Karu on naan ate, mpaumakab kau sin, he au 'onen ma 'toit Uisneno he nfeen sin tetus.” 10 Nai' Yakop namnasi nrair. In maatk ein ankupun. Etun in ka niit fa reko. Onaim nai' Yusuf nok in aanh ein naan anpaumaak nai' Yakop. Onaim nai' Yakop anhoo ma nneek sin. 11 Rarit in na'uab neu nai' Yusuf am nak, “A'roo-'roo re' ia, au uten-teenb aah, 'ak au ka neu he uteef 'ok ko fa heen. Mes oras ia, Uisneno nmo'e nneisi ntein, tar antea au ubei' fe' he 'iit ho aanh ein.”
12 Rarit nai' Yusuf na'roba' in aanh ein na'ko nai' Yakop.b In nri'tuu ma in na'ruri' tar antea in nneek afu nbi in aamf ee in human ma in matan. 13 Rarit nai' Yusuf anfeen. Onaim in nahake' in aanh ein anpaumak-maak in amaf. In nahake' in aan moen unu nbi nai' Yakop in a'niman a'ne'u. On nai te, aan moen muin je nbi nai' Yakop in a'niman a'rii. 14 Mes oras nai' Yakop he ntao in a'niimk ein he ntoit Uisneno he nfeen sin tetus-athoen neu sin nua sin, in nkaisurib in a'niimk ein. In ntao in a'niman a'neu' gwe neu aan muni nai' Efraim in a'nakan, ma in ntao in a'niman a'rii je neu aan unu nai' Manase in a'nakan. 15 Rarit in n'onen ma ntoit Uisneno he nfeen nai' Yusuf tetus-athoen am nak,
“Ho na'i ka'o Abraham,
ma ho na'i nai' Isak,
sin nua sin natuin Uisneno In roimn ee piut-piut.
Uisneno kuun es re' anpairoir ma npijaar kau anmurai na'ko oras au munif tar antea oras ia.
16 In kuun es re' nsoi naan kau na'ko siraak huma'-huma'.c
Onaim au 'toot Je msa' he In nfee tetus-athoen neu ri'aan ein re' ia ma sin suufk ein.
Onaim karu sin n'oen ein neun Uisneno,
sin ka nnikan fa he nteek ka'o nai' Abraham, na'i nai' Isak, ma au kanak.
Maut he sin mahoink ein nasufan piut,
he njarin too mfau-rutu nbin pah-pinan ia.”
17 Mes oras nai' Yusuf niit in aamf ee ntao in a'niman a'neu' gwe nbi aan muni nai' Efraim in a'nakan naan ate, in nait nanani' in aamf ee 'niman naan, ma ntao gwe neu aan unu nai' Manase in a'nakan. 18 In na'uab neu in aamf ee mnak, “Aam honi', kais on naan. Nai' Efraim in aan moen muni. In ka atoin kou' goa fa. Ho ro he mtao ho 'nimam naan meu aan unu nai' Manase in a'nakan. Natuin atoin kou' gwe in sapaa naan, es re' naan.”
19 Mes amaf nai' Yakop ka nroim fa. In nak, “Usu. Au uhiin 'ain. Nai' Manase of anjair atoin ma'tani', ma in suufk ein amsa' of anjarin too pah kou' gwes. Mes in orif nai' Efraim naan, of ma'tani' nneis na'ko na. In suufk ein of amfau re'uf, tar antea sin njarin too pah amfaun re' ma'tain besi.”
20 Rarit in natoon neu ri'aan nua' ein naan am nak, “Of karu atoin Israelas sin antotin neun Uisneno he nfeen sin tetus neu tuaf-tuaf ate, sin of anteek hi nua ki hi kaanm ein naan. Sin of antotin am nak, ‘Karu reko te, Uisneno nfee tetus neu ko, nahuum on re' In nfee tetus neu nai' Efraim ma nai' Manase.’”
Nok ranan naan, nai' Yakop amsa' anteek nahunun nai' Efraim in kaann ee, na'ko nai' Manase in kanan.
21 Rarit nai' Yakop na'uab neu nai' Yusuf am nak, “Usu! Ka 'roo fa te, au he 'maet jen. Mes Uisneno of anturun ma nbaab ki, onaim In ro he neik ki mfain meu hi be'i-na'i sin pah. 22 Mes oras ia, au 'fee ko mneis mu'ko sin ho benu'. Au 'fee u'baba' ko 'to'ef et pah Kana'an re' unu' te au usiik 'aan ee 'eik au suni'-kenat u'ko atoin Amoris sin.”