Nai' Yusuf in uim je nanan napenin afu na'ko usif pah Masir
47
1-2 Rarit nai' Yusuf nok in tataf tuaf niim, annaon he nbaiseun usif. Nai' Yusuf na'ekub ma natefab sin nok usif. In na'uab am nak, “Aam usi'! Au ama' ma au ori'-tata' sin neman nrarin na'kon pah Kana'an. Sin neman neik sin mui't ein ma sin baer' ein ok-oke'. Oras ia sin etan pah Gosen.” 3 Rarit uisf ee nataan am nak, “Hi meupn ein es re' saa'?”
On nai te, sin natahan am nak, “Hai re' ia atukus, on re' sin hai be'i-na'i. 4 Oras ia, pah Kana'an nafauk-nai ko'u, tar antea ka tiit fa mnahat ma huun antein. Etun hai iim meu pah re' ia he mitua mtahan. Hai meik hai mui't ein amsa'. Onaim oras ia, hai mbaiseun ko usi', mkonan kai he hai mitua mbi pah Gosen, he hai mituuk hai mui't ein anbin naan.”
5 Rarit uisf ee natoon in roimn ee neu nai' Yusuf am nak, “Oras ia, ho ama' ma sin ho benu' etan ia. 6 Onaim sin napenin mainuan he sin natuan nbin ia on re' sin pah akuuk. Au mahiink ii te, pah Gosen naan, bare re' reko nneis nbi pah re' ia. Onaim reko nneis sin natuan nbin re' naan. Ma karu sin natuuk mu'it am reko te, maut he sin natuuk au nggwin anbin naan amsa'.”
7 Rarit nai' Yusuf na'ekub ma natefab in aamf ee nok usif. Onaim nai' Yakop an'onen he Uisneno nfee tetus neu usif naan.
8 Onaim uisf ee nataan am nak, “Aam, ho toon fauk een?”
9 Nai' Yakop nataah am nak, “Au 'moin 'aan toon nautn es bo' teun, mes au ka utua ubaar 'iit fa fe' 'bi baer jes. Au be'i-na'i sin on naan amsa'. Karu au he utaib ok, 'ok sin ite, au toon a'moin ji, fe' ka mfaun fa fe'. Mes naheun nok suust am nana'renat.” 10 Onaim nai' Yakop antoti ntein Uisneno he nfee tetus-athoen neu usif pah Masir naan. Rarit sin nbaisenun ma nheer ok na'ko uisf ee in matan, ma ntebi nfanin.
11 Rarit nai' Yusuf natuin uisf ee in kabin, onaim in nruur bare neu sin nbi pah Gosen. Afu bare naan, mrian ii kah een. (Sin nakanab bare naan nbi neon amunit nak, ‘Rameses’.) Onaim nai' Yusuf in amaf ma in orif-tataf sin natua nabaran nbin bare naan. 12 Rarit nai' Yusuf nataah ma nasaah mnahat neu in amaf, ma in orif-tataf sin, sin fee-anah sin, na'ko a'naet tar antea a'baut ein.
Amnaahs ee mainenu' ntein anbi pah Masir
13 Anbi oras naan, ka tiit tain fa mnahat anbi mee-mee. Amnaahs ii ntaman kuan-bare, kota mpah. Na'ko pah Masir ntea pah Kana'an mansian ein n'ore nmaten. Sin ka nabe'in fa he nmo'en saa'-saa', natuin sin namnahan nmaten. 14 Rarit biak ein neman na'kon bare-bare neun pah Masir, ma are' bare-bare nbi pah Kana'an, he nsosan amnahat na'kon nai' Yusuf. Onaim in na'bua' roit ein naan ok-oke', rarit in nnao natunu' sin anbin uisf ee in sonaf. 15 Oras naan, abitan pah Masir ma pah Kana'an sin nararin roit. Onaim sin ka nsoos nabe'in fa mnahat. Rarit sin neman neun nai' Yusuf he ntotin. Sin na'uab ein am nak, “Usi'! Hai mbaiseun ko, tua. Amfee kai mnahat, he hai kaisa' mimnaah ammaet. Natuin hai mirair roit, tua.”
16 Rarit nai' Yusuf nataah am nak, “Karu batuur-batuur hi mirair roit ate, hi mmoe' on nai: mtuki mnahat nok hi mui't ein naan. Au of a'fee ki mnahat.” 17 Rarit sin nnona' sin mui't ein neun nai' Yusuf he ntukin amnahat. Mui't ein esan re': sin bijae nggwin, bikase', bikaes keledai, 'bibi, ma sin 'bib-kasen. Natuin toon naan, nai' Yusuf an'ator on re' naan.
18 Toon amneemt ii te, sin nfain neman neun nai' Yusuf. Sin nbaisenun am nak, “Usi'! Hai ro mbaiseun namneo gwah, tua. Hai roit ma mu'it, ho mtuik maan kuum sin een, tua. Oras ia, hai he mait saa' antein. Hai ruman ankon-koon. Arahaa hai tuam ein anmes-mesen, nok hai afu 'teets ein. 19 Kais amkonan kai he hai mmaet. Karu hai mmate te, sekau es re' he npairoir hai afun naan!? Reko nneis, ho mait kai mjair ho aten. Ho mtoup hai afun naan, he ho mpaar kuum sin. Rarit ho mfee kai fini he hai mseen sin meu ko, tua. Onaim ho mfee kai mnahat natuin hai mihaeb om ambi ho renen. Asar hai kaisa' mmaet!”
20 Natuin oras amnahas naan ma'tain besi, etun abitan pah Masir sin na'sosa' nain sin aufn ein ok-oke'. Onaim nai' Yusuf ansoos nain afun naan he njair usif pah Masir in auf pusaak ein. 21 Nok ranan naan, abitan pah Masir sin njarin ate neun usif pah Masir.a 22 Mes nai' Yusuf ka nsoos fa a'naak pirsait ein sin afun, natuin uisf ee nfeen sin mnahat piut. Etun sin ka na'sosa' fa sin afun.
23 Oras naan, nai' Yusuf na'uab neu too gwi mnak, “Oras ia, hi mfain ate meu usif pah Masir. Au 'soos a'rair hi aufn ee neu usif. Onaim hi mait finin re' ia nai, he mnao mseen sin neun renen naan. 24 Oras sekit ma mnonut ate, hi mbait batis niim. Baits es neu usif. Neisk ein paa' haa, bian hi mait fini, ma bian hi mait sin ntaam amnahat neu ki ok-oke'.”
25 Rarit sin natahan am nak, “Koe aam. Ho msoi maan kai na'ko amnahas ia, tua. Onaim hai mtoit makasi, tua. Maut he hai mjair ate meu hit usi', tua.”
26 Rarit nai' Yusuf anpaek atoran naan anjair prenat anbi pah Masir. Etun sin nbatin batis niim na'ko are' pena'-maka' re' sin nseik ma noun sin naan. Sapaaf es neu usif. Haa' ein neun sin kuuk. Suma a'naak pirsait ein sin aufn ee, uisf ee ka nsoos ein fa. Prenat naan, sin fe' anpaek je nnao nkoon.
Nai' Yusuf anmoe' manba'an nak in he nsuub in aamf ee nbi sin beif-na'if sin nopu
27 Anmurai oras naan, atoin Israelas sin natuan nabaran nbin pah Gosen, et pah ko'u Masir. Sin anjarin atoin amu'it. Ma sin nahoin ein ma nma'baab ok piut-piut.
28 Anbi pah Masir naan, nai' Yakop anmoin naan toon bo'es am hiut, tar antea in nmoin naan nabu-bua toon nautn es bo' haa mhiut. 29 Oras in neno 'maetn ee npaumak-maak een ate, in no'en nai' Yusuf ma natoon ee mnak, “Usu! Au 'naben, ka 'roo fa heen ate, Uisneno no'en nafani' kau gwen. Onaim au 'toit ko, karu ho mneek kau te, ho msuup mak ho ka msuub kau fa mbi pah Masir ia. 30 Ho ro he meik mufani' au aok-ta'uk ia he msuub ee meu hit be'i-na'i sin nopun, ma msuub kau 'bi nee. Ho ama' kau gwi, au roimk ii on re' naan.”
Onaim nai' Yusuf nataah am nak, “Reko, tua! Karu ho mroim maan on re' naan ate, au utuin aah, tua.”
31 Onaim nai' Yakop na'uab am nak, “Karu ho mroim mutuin kau on naan ate, oras ia ho msuup, mak ho mroim mutuin ho ama' in romin.”
Rarit nai' Yusuf ansuup natuin nai' Yakop in uab ein naan. Onaim nai' Yakop nabani' ma nri'tuu n'ain koi je 'nakan, ma n'onen he nasaeb sukuur neu Uisneno.