Nai' Yakop sin nabaarb ein he nfo'on neun pah Masir
46
Rarit nai' Yakopa nakbua' in a'brua' ein, ma nnao nasaitan pah Kana'an. Sin ntean kuan Barseba te, in nroor mu'it ma nafuat sin neu Uisneno, re' in amaf nai' Isak na'bees neu Ne na'ko unu'. 2 Fai jes ate, nai' Yakop namnei. Anbi mneit naan, in nneen Uisneno noe'n ee mnak, “Hoe! Yakop! Ho mfeen he mneen fe'!”
Onaim in nataah am nak, “Tua!”
3 Ma Uisneno nak, “Au re' ia, Uisneno re' ho ama' na'bees neu Na na'ko unu'. Ho kais mumtau he mnao meu pah Masir. Au of a'moe' ho sufam-kau'm ein anjarin too re' maso'ik anbin bare naan. 4 Au of 'ok ko tnao teu pah Masir. Ma Au of 'ok ufani' ho sufam-kau'm ein nfanin neun pah Kana'an amsa'. Oras ho mmate te, of ho anah nai' Yusuf anhake nbi ho bnapam.”
5 Rarit nai' Yakop nok in aanh ein,b nnaon nasaitan kuan Barseba. Onaim sin nasaeb ee, ma sin fee-anah sin anbin kreet bikaes ein re' usif pah Masir ansonu' sin. 6-7 Sin nait neik sin baer pusaak ein ma mui't ein ok-oke' re' sin nmui' sin, oras sin nbin pah Kana'an. Rarit nai' Yakop ma in aan feto-aan mone sin, ma in uupf ein ok-oke', nnaon neun pah Masir.
Nai' Yakop nok in noont ein re' nokan nnaon neun pah Masir
8 Nai' Yakop in nonot-asar re' nok anfo'on neun pah Masir, esan re' ia:c
Nai' Ruben, aan moen unu. 9 In aanh ein esan re': nai' Henok, nai' Paru, nai' Hesron, ma nai' Karmi.
10 Nai' Simeon nok in aanh ein esan re': nai' Yemuel, nai' Yamin, nai' Ohat, nai' Yakin, ma nai' Sohar. Ma nai' Saul amsa', re' nahoins ee na'ko bifee Kananas.
11 Nai' Lewi nok in aanh ein esan re': nai' Gerson, nai' Kehat, ma nai' Merari.
12 Nai' Yahuda nok in aanh ein esan re': nai' Sela, nai' Peres, ma nai' Sera. Nai' Yahuda in anah bian, nai' Er ma nai' Onan, nmate nrarin nbin Kana'an. In neik nai' Peres in aanh ein amsa', esan re': nai' Hesron ma nai' Hamur.
13 Nai' Isaskar nok in aanh ein esan re': nai' Tora, nai' Pua, nai' Ayup, ma nai' Simron.
14 Nai' Sebulon nok in aanh ein esan re': nai' Seret, nai' Eron, ma nai' Yahreel.
15 Sin ok-oke' re' naan, nai' Yakop nok in fee bi Lea sin aan hoin ein, oras sin natuan nbin Mesopotamia. Anmu'i ntein sin aan feto, kaann ee bi Dina. Onaim nai' Yakop nok in mahoin ii, tuaf bo' tenu mteun.
16 Onaim anmui' in anah na'ko in fee bian es re': nai' Gat, nok in aanh ein esan re': nai' Sifion, nai' Hagi, nai' Suni, nai' Esbon, nai' Eri, nai' Arodi, ma nai' Areli.
17 Nai' Aser, nok in aanh ein esan re': nai' Yimna, nai' Yiswa, nai' Yiswi, nai' Beria, nok sin feotf es, kaann ee bi Sera.
Anmu'i msa' nai' Beria in aanh ein, esan re': nai' Heber ma nai' Markiel.
18 Sin aar sin re' naan, tuaf bo'es am nee. Esan re' nai' Yakop ma in fee bi Silpa in anah-upuf sin. Bi Silpa naan, ate re' nai' Laban anfee je neu in aan feto bi Lea, nai' Yakop in fee mnasi'.
19 Nai' Yakop in fee jes antein, kaann ee bi Rahel. In nahoni' ri'ana' nua, esan re': nai' Yusuf ma nai' Benjamin. 20 Oras naan, nai' Yusuf ansao nrair bi Asnat nbi pah Masir. In aam baabf ee, a'naak rais pirsait anbi kota On, kaann ee nai' Potifera. Nai' Yusuf ma bi Asnat sin aanh ein esan re': nai' Efraim ma nai' Manase.
21 Nai' Benjamin nok amsa' neu pah Masir. In nok in aanh ein, esan re': nai' Bera, nai' Beker, nai' Asibel, nai' Gera, nai' Na'aman, nai' Ehi, nai' Ros, nai' Mupim, nai' Hupim, ma nai' Aret.
22 Rarit nai' Yakop ma in fee bi Rahel sin mahoink ein tuaf bo'es am haa.
23 Nai' Yakop in nmu'i ntein fee jes, kaann ee bi Bilha. Sin aanh ein esan re': nai' Dan ma nai' Naftali.
Nai' Dan in aanh ee, nai' Husim.
24 Nai' Naftali nok in aanh ein esan re': nai' Yaser, nai' Guni, nai' Yeser ma nai' Sirem.
25 Nai' Yakop nok in fee bi Bilha sin mahoink ein tuaf hiut. Bi Bilha naan, es re' bi Rahel in ate, re' in napein je na'ko in amaf nai' Laban.
26 Onaim nai' Yakop in mahoin ein re' nnaon neun pah Masir naan, tuaf bo' nee mnee. In aan naenf ein ka nsoi' sin fa fe'. 27 Sin nma'baab ein nok nai' Yusuf in aanh ein re' nahoni' sin anbin pah Masir, sin tuaf nua. Onaim nai' Yakop in nonot-asar re' natuan nbin Masir, sin ar-arsin tuaf bo' hiut.
Nai' Yakop nateef in anah nai' Yusuf
28 Oras sin he noi ntean pah Masir ate, nai' Yakop anreun in anah nai' Yahuda he nnao nahuun, he no'en nai' Yusuf, he neem nateef nok in aamf ee nbi pah Gosen. Oras sin ntean nrarin nbin Gosen, 29 on naan ate, nai' Yusuf ansae neu in a'kreet, he nnao nateef in aamf ee nbi naan. Oras sin natefan, nai' Yusuf anhoo in aamf ee, ma nkae 'roo re'uf.
30 Rarit nai' Yakop na'uab nok nai' Yusuf am nak, “Usu! Oras ia, au 'iit ko gwen. Onaim au uhiin 'ak ho mmoin fe'. Maski oras ia au 'mate msa', reko.”
31 Rarit nai' Yusuf natoon neu in orif-tataf sin am nak, “Au ro he 'nao 'baiseun uisf ee, he utoon 'ak au nonot-asar sin na'kon pah Kana'an neman ntean nggoen. 32 Onaim au of utoon 'ak hi re' ia, atuuk mu'it. Etun hi meik hi mui't ein ma hi pusaak ein na'kon Kana'an. 33 Karu uisf ee no'en ki, ma nataan hi meupm ein saa', 34 hi mitaah am mak, hi aar ki re' ia, atuuk mu'it ammurai mi'ko hi aan'-ana' fe', on re' hi be'i-na'i sin. Nok ranan naan, in of anreun ki he mitua mbi Gosen.” Nai' Yusuf natoon on naan, natuin abitan pah Masir anmai'nisin karu sin natua nabuan nok atuuk mui't ein.