Nai' Yusuf natoon in tuan, ma ntoit in aamf ee he nfoo' neem neu pah Masir
45
Anneen on naan ate, nai' Yusuf in neekn ee krati'-krati', tar antea in ka ntahan naan fa in tuan ii ntein nbi in ameupt ein sin maatk ein. Etun in nreun sin he npoin, he in bisa nmees nok in orif-tataf sin. Nok ranan naan ate, in bisa natoon in tuan ee neu sin. 2 Rarit ameupt ein npoin oke'. Onaim nai' Yusuf ankae nme'-me'ur ma npin-pinus. In ameupt ein, atoin Masir, re' nhaken nbin moen ee, anneen amsa'. Ma abitan uisf ee in soonf ee nnenan amsa'.3 Rarit nai' Yusuf natoon namneo gwah neu in orif-tataf sin am nak, “Airoo, tua. Au re' ia, nai' Usu kau. Hi ori'. Hit aar kit atma'ori-tatan. Hit ama' fe' nmoni, oo?”
Annenan on naan ate, in orif-tataf sin namtau nmaten, tar antea sin ka fefa' mese' fa.
4 Rarit nai' Yusuf nak sin am nak, “Hae! Amsiri' iim he mpaumaak kau fe'!”
Onaim sin nsiir ein antaman ma npaumaak nai' Yusuf. Onaim in na'uab nafanik am nak, “Au re' ia, nai' Yusuf, re' neon gwes ii, hi mi'sosa' mpoirn ee meu pah Masir ia. 5 Amneon ii, hi mi'sosa' kau gwen. Mes kais mimtau, ma kais ammatoe ma mmasanan es nok es. Natuin Uisneno es neik kau 'uum a'tea ia, he 'jair ahunut 'eu ki. Nok ranan naan, In npaek kau he In nafetin naan too mfaun ii, he sin kaisa' namnaah anmaten.
6 Oras ia, amnaahs ii fe' nnao naan toon nua. Aar toon niim fe'. Oras naan, ka tiit tain fa tuaf es he ntoof ai' nkaun, nseen, ma ka tiit fa reen jes re' he nmui' pena'-maka'. 7 Nok ranan re' hit ka tahiin tain je fa re' ia, Uisneno neik kau 'uum uhuun u'ko ki. Henati' na'ko hi aar ki, ma hi anah-upuf sin napenin a'honis.
8 Onaim in batuurn ii, ka hi es ammoe' kau fa he au 'uum a'tea ia, mes Uisneno In a'mo'en. In es nait kau 'jair uisf ee in tua pirsa'i 'bi pah Masir ia. Onaim au 'jair a'nakat a'bi uisf ee in sonaf. Ka tiit tain fa es he nneis na'ko kau.
9 Onaim oras ia, hi mfain rabah nai, he mitoon au uabak re' ia meu hit ama', mak on nai: ‘Aam honi', ho anah nai' Yusuf anmoin fe'! In njair kaes ko'u et pah Masir. In naskau ko aam honi', he mnao meu pah Masir rabah nai, tua. 10 Aam honi' of ho mupein mainuan he mutua mbi pah Gosen mpaumaak ee. Bare naan mainuan. Onaim hi bisa mituuk ma mi'eku' hi 'bib-kasen, a'bibin, ma bijae nggwin ok-oke'. In ntoit ko msa', he uum meik ho anah-upuf sin, nok nain sin uim je naan ee, ma sin baer pusaak ein ok-oke' he mitua mibaar ambi nee, tua. 11 Karu aam honi' mutua mbi Gosen ate, in bisa npairoir ko nbi nee. Natuin amnaahs ii aar toon niim antein fe'. Onaim in of an'ator he aam honi' mok ho nonot-asar sin, ma ho mui't ein ok-oke' ka nkuran ma nrabu' fa saa'-saa', tua.’”
12 Nai' Yusuf natoon anrair on naan ate, in na'uab antein am nak, “Oras ia, hi miit meik hi matam, aa oo? Ho msa', Min. Au re' ia, ho tata' nai' Yusuf teb-tebe. 13 Onaim mitoon meu hit ama' mak, au kuasat a'bi pah Masir re' ia, kou' re'uf. Ma mireta' meu hit ama' saa'-saa' re' hi miit sin. Rarit hi meik je neem rabah nai meu ia!”
14 Rarit in nhoo ma nneek in orif nai' Benjamin, ma sin nua sin ankaen. 15 In anhoo ma nneek in taatf ein mese'-mese' msa'. Rarit na' sin nmurai na'uab ein nok ne.
Usif pah Masir antoup nai' Yusuf in orif-tataf sin
16 Rarit, oras uisf ee nok in a'naak meupn ein annenan nak nai' Yusuf in orif-tataf sin neman, sin nmariin anmaten. 17 Onaim uisf ee na'uab neu nai' Yusuf am nak, “Yusuf! Mutoon meu sin ho benu', he sin nasaeb ein pena'-maka' neu sin bikaes keledai nggwin, he neikin nnaon neun pah Kana'an. 18 Rarit amreun sin he neik ho ama' ma nonot-asar sin neman oke', he sin nfoo' neman neun ia nai. Au of a'feen sin afu ma bare re' reko nneis nbi pah Masir ia, he sin natuan ma nmonin nbin naan, ma sin napenin amnahat na'ko bare naan. 19 Amreun sin he sin neik nanin akreet bikase' fauk na'ko ia, he sin nasaeb ri'aan ein, ma ho ama'. 20 Kais sin natenab baer pusaak ein re' sin ka bisa neik sin fa. Natuin pah Masir ia, naheun nok bare' re' arekot. Sin of anpaar sin.”
21 Anneen on naan ate, nai' Yusuf anfee kreet bikase' fauk, ma beti' nbi ranan, natuin uisf ee in kabin. Ma in orif-tataf sina nabaarb ein he nfanin natuin uisf ee in kabin. 22 Nai' Yusuf anfeen sin tai fe'u msa', es ate paasn es. Mes in nfeen nai' Benjamin roi muti' fua' natun teun, ma tai fe'u pasan niim. 23 In nsonu' neu in aam hoin fe baer saa'-saa' re' nareok na'ko pah Masir, ma nasaeb sin nbi bikaes keledai mone bo'es. In nfee na'baba' ntein pena'-maka', utunu', ma mnahat huma'-huma', nasaeb sin neun bikaes keledai ainaf bo'es. In n'ook-beit sin neu oras sin ntebi nfain neman neun pah Masir. 24 Rarit in nnao naseona' sin, ma namnaub sin am nak, “Nati' hi kaisa' mmatoe mbi raan ee, joo!”
Nai' Yakop anneen nak nai' Yusuf anmoin fe'
25 Rarit sin nnaon nfanin neun sin aamf ee et pah Kana'an. 26 Antean ne te, sin natonan sin aamf ee mnak, “Aam honi'! Ho anah nai' Yusuf anmoin fe'. In kaes ko'u et pah Masir! In nnaa' aprenat.”
Oras nai' Yakop anneen ate, in ntaka'nana' ma ka npirsai fa sin uabk ein naan. 27 Mes oras sin natonan nrair nai' Yusuf in uab ein naan, ma in niit akreet bikase' re' nai' Yusuf ansoun ee he nasaeb neik je neu pah Masir te, na' in npirsai. 28 Onaim in na'uab am nak, “Airoo! Au aanh ee nmoin fe'! On re' naan ate, na' au 'mariin. Au ro he 'nao 'kius 'aan ee fe', na' au 'mate msa', reko.”