Nai' Yusuf in a'koom noin muit ee namneuk
44
Sin nbukaen nrarin ate, nai' Yusuf na'se'-se'o a'naak mepu nbi in uim je mnak, “Hoe! Ho mnao murai pena'-maka' meu atoin ein ia sin a'kaor ein naan, nahen-henun. Rarit ho mtao mufani' sin roit ein es-es ate meu sin a'kaor ein naan. 2 Rarit ho mait au 'koom noin muit ee, ma mtao gwe meu aheit suus gwe in a'kaor aan.” Onaim in nmoe' natuin nai' Yusuf in aprenat.3 Maan re' snaat ee nsae te, nai' Yusuf nafetin sin nok sin bikaes keledai nggwin he nnaon nfanin ma neikin amnahat. 4 Sin nnaon ka 'roo fa fe' na'kon kota naan ate, nai' Yusuf natoon neu a'nakat naan am nak, “Ho mnao mriu' mutuin atoin ein naan rabah. Karu mupein sin ite, ho mak sin am mak, ‘Nansaa' am es hi mmoe' maufinu meu 'naef ee? Hi mbaras in neek reok gwe nok moe' re'uf on naan! 5 On mee m'es hi mibaak meik hai a'naak te in a'koom noin muit ee? Hi ka mihiin fa, oo? Naan ka npaek je fa he nbukae oe nmees jah. Anpaek je he naim atoni' in uan, natuin a'koma' naan matua' ate! Hi moe'm ein ia, ro reu' besi!’”
6 Rarit a'nakat naan nriu' natuin sin tar antea napein sin. Onaim in natoon neu sin natuin ahaa nai' Yusuf in uaban fe'e na.
7 Rarit sin npenan mates am nak, “Aam, ho sairt ii, on mee? Hai msuup. Hai ka neu he mibei' fa he mmoe' re'uf on naan! 8 Ho muhiim kuum. Roit ein re' neon gwes ii nbin hai 'kaor ein naan, hai mfee sin nfanin neu ko. Onaim hai ka mibei' fa he mibaak hi a'naak te in a'koma' naan na'ko in umi. Hai ka neu he mibaak fa, tua! 9 Aam, ho mpukai ma mtae kuum. Mupein a'koma' naan anbi sekau in a'kaor ate, amhukun misan! Maut he hai bian ii, mjair ate meu ko.”
10 Rarit a'nakat naan na'uab am nak, “Kahaf! On nai. Karu au 'iit ee nbi sekau te, in re' naan anjair au ate. Hi bian ii, mnao mkoon.”
11 Onaim sin nasanut a'kaor ein naan, rabah. Rarit sin npukai nain sin. 12 Onaim a'nakat naan anparikas a'kaor ein naan barisi, nmurai na'ko atoin kou' gwe iin je, ntea aheit suus gwe iin je. Onaim in niit a'koom noin muti' naan, anbi nai' Benjamin in a'karo'.
13 Ankius nitan on naan ate, nai' Benjamin in taatf ein sin neek ein akrati'-krait ein. Rarit sin nasaeb nafani' sin a'kaor ein neun sin bikaes keledai nggwin, he ntaman nfanin neun kota.
14 Oras sin ntean nai' Yusuf in uim je te, in nbi naan fe'. Onaim sin nri'tuun anbin nai' Yusuf in human ma in matan. 15 Rarit nai' Yusuf naskarak sin am nak, “Hoe! Nansaa' am es hi mmoe' kau on re' ia? Hi ka mihiin fa? A'naet on re' au, anpaek re'u re' he naim atoni' in uan.”
16 Rarit nai' Yahuda nataah am nak, “Airoo! Uisneno npukai napoitan hit saant ein. Rarit hai he mak saa' ntein, tua? Hai he mimneob hai tuam ein on mee, tua! Karu ho mtahan hai ori' te, reko nneis ho mtahan kai oke'. Mait kai mjair ho aten.”
17 Mes nai' Yusuf nataah am nak, “Kahaf! Niit a'koma' naan anbi sekau te, in es re' he njair au ate! Hi bian ii, mifrei. Amfain nai meu hi ama'!”
Nai' Yahuda ntoit he nsenu' nai' Benjamin
18 Rarit nai' Yahuda nnao npaumak-maak nai' Yusuf, ma na'uab am nak, “Au 'baiseun, tua. Au uhiin 'ak ho kuasam naan natai nok uisf ee in kuasan kuun. Natuin rasi naan, kais muto'on kau, tua. Au 'toit mainuan he au u'siti' aan a'kre'o, tua. 19 Neon gwes ii, ho mutaan kai mmak, ‘Hi ama' nok hi ori' tuaf es etan naa fe'e, oo?’
20 Rarit hai mitaah am mak, ‘Hai ama' namnasi nrair. Hai ori' aheit suus gwe mese'. Oras nahoins ee te, hai ama' namnais jen. Aheet suus gwe in taatf ee, nmate nrair, tua. Sin nua sin, sin ainf ee nmate nrair. Onaim oras ia, hai ori' aheit susu naan, in nmees. Es na' hai ama' nneek niis ne.’
21 Rarit ho mreun kai he hai meik hai ori', he ho miit ee. 22 Onaim hai mitaah am mak, ‘Ri'ana' re' ne, ka neu he nnao npori' fa hai ama'. Karu in nnao npoirn ee te, hai ama' ro he nmaet kuun nai, es re' naan.’
23 On nai te, ho mutaah am mak, ‘Karu hi ka meik fa hi ori' naan ate, hi ka neu he miit amtein kau fa heen.’
24 Rarit hai mfain. Hai mtean hai ama' ne te, hai mitoon main rasin re' ho mu'uab sin meu kai. 25 A'roo-'roo te, hai mnaaht ein oek' ein. Rarit hai ama' anreek kai he mfain iim amtein meu pah Masir he msoos amnahat. 26 Mes hai mitaah am mak, ‘Aam honi'! Hai ka neu he mnao fa meu ne ntein. Natuin uisf ee in tua pirsai' je, na'uab nain nak, karu hai ka mok fa hai ori' te, hai ka neu he miit amtein fa in human. Onaim hai ro he meik hai ori' aheit susu naan fe', hena' hai mnao.’
27 Rarit hai ama' na'uab am nak, ‘Hi mihiin main. Au fee bi Rahel in aanh ein, tuaf nua gwah. 28 Ahuunt ee nnao namneuk. Oni' mui' fui nggwin npius gwe ma neku nrair je. Es na' ntea oras ia, au ka 'iit a'tein' ee fa. 29 Karu hi mait meik aheit suus gwi ntein mi'ko kau, ma in napein siraak ate, hi mtao mtein kau susat meu au atoni mnasi' kau gwi, he 'maet nai.’
30-31 Es naan ate, usi'. Au 'baiseun, tua. Karu au 'fain 'eu au ama', mes au ka 'ok fa aheit susu re' ia te, ro hai ama' nmaet kuun een. Natuin in asmaan ee, nmafuut nok ri'ana' ia te. On nai te, in namnais re'-reu'f een. Onaim karu hai mtao mtein' ee susat, in nmaet nai. 32 Saa' antein, au 'ba'an urair 'eu au ama' 'ak, au utaah ri'ana' ia. Au 'ba'an 'eu au ama', karu au ka 'eik ufani' fa ri'ana' ia 'eu ne, maut he au utaah kuuk sanat naan, tar antea au 'maet.