3 Mes nai' Yahuda nataah am nak, “Aam honi'! Neon gwes ii, usif pah Masir in tua pirsai' je namnaub kai ma'tani' nak, hai ka mibei' fa he mikrira' hai huum ein meu ne, karu hai ka mok fa ho aan aheit susu nai' Min! 4 Onaim aam honi'. Ho ro he mkonan kai nai' Min, he nok kai, hena' hai mfain he msoos kit amnahat. 5 Mes karu ho ka mkonan kai fa nai' Min ate, hai ka neu he mnao fa. Atoin Masir naan na'uab anrair on naan ate.”

6 On nai te nai' Yakop nakain sin am nak, “Nansaa' am es hi mitonan atoni' naan mak hi fe' ammui' oir muni es antein! Hi mami haa kau susat antein!”

7 Rarit sin nfuri' nai' Yakop am nak, “Aam honi'! Atoni' ne nataan piut, he nahiin kit nok nain hit uim je naan ee ok-oke'. In nataan am nak, ‘On mee? Hi ama' nmoin fe'e, oo? Hi mmui' orif et hi umi' fe'e, oo?’ Onaim hai he mak saa' antein! Onaim ro hai mitoon namneo gwah. On nai te, sekau nahiin nain nak, in he nreun kai he hai mok nai' Min on nee?”

8-9 Nai' Yahuda na'uab antein am nak, “Aam honi'! Mufetin kai nai' Min he nok kai. Au 'ba'an 'ain, karu npoi saa'-saa' neu ne te, au utaah he 'senu'. Karu au ka 'eik je nfain neem fa nok ao-mina' neu ko te, maut he ho musaan kau tar antea au 'maet. Onaim ho mkonan kai nai' Min, fin hai he mna-nao goa heen. Reko nneis hai mnao nai rabah, he hit kais tamnaah atmaet. 10 Bait hai kais ampao 'roo-'roo te, hai mnao ma mfain iim no nua gwen.”

11 Rarit sin aamf ee nak, “Karu on naan ate, hi mmoe' on nai: hi mnao mait meik hau fua' ma fuboon reko na'ko hit pah. Esan re': bumbu sin, hau oef re' foo meni', re'u he ttuis, oin hau, kanari,^a ma knaa' bian. Rarit meik sin meu usif pah Masir in tua pirsa'i naan, ma mitoon am mak hai baer' ein re' ia njarin ook-sonun neu ko. 12 Hi msa' meiki mtein roit amsa' anfain no nua na'ko oras neon gwes ii hi mnao. Natuin hi ro he mnona' mifani' roit ein re' hi miit sin anbin hi 'kaor ein neon gwes ii. Kais-kaisa' sin es re' antaon nsaan sin. 13 Hi mok hi ori', mes nati' mfain iim rabah, oo! 14 Au 'on-'onen, karu Uisneno re' Akuasat Ma'tani', nabanit usif pah Masir in tua pirsa'i naan he nkasian ki. He karu reko te, in nnona' nafani' ki au anah nai' Min am nai' Meon, he hi mfain iim bu'-bua'. Mes karu au aanh ein namnekun oke' te, maut he au usaah susat ia nkoon piut.”

15 Rarit sin nnaon ma nakbua' ein baer ook-soun ein am roit, he neikin nnaon neun pah Masir. Sin nok nai' Benjamin amsa'. Antean nee te, sin nnaon nbaiseun nai' Yusuf. 16 Oras nai' Yusuf niit nai' Benjamin nok in taatf ein ate, in nreek a'naak mepu nbi in umi mnak, “Hoe! Meik atoin ein re' ia ntaman neun au umi! Rarit amroor bijae jes, mihaan ee rek-reko. Sin ro he nbukaen nok kau oras maans ee na'puup.”

17 Rarit a'nakat naan nmoe' natuin nai' Yusuf in aprenat. Onaim in nnao naat sin neu nai' Yusuf in umi.

18 Oras sin nnaon neun nai' Yusuf in umi, in taatf ein namtaun nmaten. Anbin raan ee te, sin na'uab ein am nak, “Amoo! Nansaa' am es in nreun he neik kit teu ia? Kais-kaisa' in he nasusab kit, natuin roit ein re' sin nfee nafani' kit sin anbin hit i'kaor ein neon gwes ii. Sin nmoe' napo-poi kit he neem naat kit teu ia, he nok askeken ate, sin nheek kit, ma nmoe' kit atjair sin aten. Rarit sin nasiik naan hit bikaes keledai nggwin oke'.”

19 Etun oras sin npaumaak nai' Yusuf in uim je te, sin nataan a'nakat naan am nak, 20 “Aam, kais muto'-to'on kai. Neon gwes ii, hai iim amsoos miit amnahat ambi ia. 21-22 Rarit oras hai mfain meu hai kuan, hai misnaas ambi raan ee he mtuup. Onaim hai mfei 'kaor ein he mi'eku' mui't ein. He'e! Hai mtae miit hai roit ein, ntao nafani' kai sin inbin hai kaor maak ein sin feefk ein. Hai ka mihiin he sekau es re' antao sin naan. Mes oras ia, hai meik mifani' sin oke'. Onaim aam, kais mutoo' goo! Maut he ho muhiin, oras ia hai meik roit bian anteni' he msoos amnaah amtein.”

23 Rarit a'nakat naan nataah sin am nak, “Hi mta'-taa' kiim. Kais mimtau! Of oni' hi Uisneon nggoe es anfee tetus neu ki nbi hi 'kaor ein naan. Neon gwes ii, au 'toup urair hi roit ein naan oke'. Hi ka mmui' fa tusa'!” Rarit in napoit nai' Simeon na'ko bui je he nabua nok sin.

24 Onaim sin ntaman oke' neu nai' Yusuf in umi. Rarit a'nakat naan anfeen sin oe ma nafaun sin haek ein. In na'eku' sin bikaes keledai nggwin amsa'. 25 Rarit in natoon am nak, “Hi of ambukae mok hai aam usi' oras maans ii na'puup.” Oras sin npao nai' Yusuf he neem nateef nok sin ite, sin n'ator ook-soun ein naan.

26 Oras nai' Yusuf neem antea te, sin nri'tuun ok-oke' nbin in human ma in matan. Rarit sin nnona' ook-soun ein neu na. 27 Rarit nai' Yusuf nataan sin am nak, “On mee? Hi aar ki m'ao-mina', oo? Hi ama mnasi' on mee? In n'ao-mina' msa', aa oo?”

28 Sin natahan am nak, “Ho ate mnais ee, re' hai aam honi', et re' nee. In n'ao-miin, tua.” Onaim sin na'ruir ein ma nhormaat antein' ee.

29 Rarit nai' Yusuf nait matan am ankius niit in orif nai' Benjamin. Sin nua sin, ainaf ma amaf mese'. Onaim in nak, “Ooo! Hi ori' aheit susu re' neon gwes ii hi miton-toon ee ji, es re' ia!”

Rarit in na'uab neu nai' Benjamin am nak, “Ba'e! Au 'on-'onen he Uisneno nfee ko tetus kou'-ko'u.”

30 Ankius nai' Benjamin on naan ate, nai' Yusuf in rasi mnaut neu in oirf ee he noi npe'-pee' jah een. Natuin in nneek niis in orif nai' Benjamin. In ka bisa ntahan naan fa in nekan naan antein. Onaim in nnao ntaam neu in kee'n ee rabah. Rarit in nkae nme'-me'ur anbi naan. 31 Ankae nrari te, in nnao nameu in human. In nafani' in nekan, rait in nnao nateef nok sin. Onaim in nreun in ameupt ein uim je naan ee, he nabaarb ein bukaet neun mei.

32 Sin nabarab bukaet neu nai' Yusuf anbi mei jes in nmees kuun. In orif-tataf sin nbukaen nbin mei jes a'teta'. In ameupt ein, nbukaen nbin mei jes kuuk. Natuin atoin Masir sin nnaben ate sin nhai'niis sin tuak ein karu sin nbukaen bu'-bua' nok atoin Ibranis sin.^b 33 A'nakat naan an'ator anrair he nai' Yusuf in orif-tataf sin antokon nmabain ein nok nai' Yusuf. In n'ator sin he ntokon nmaktun-tuin ein nmurai na'ko atoin kou' gwe ntea aheit susu. Oras sin ankius niit re' mo'et re' ia te, sin nsanmakan. 34 Rarit nai' Yusuf an'ator he in ameupt ein naan naitin bukaet na'kon in mei je neun in orif-tataf sin. Sin ntoupun huma' mese'. Mes nai' Benjamin antoupu mfaun anneis no niim na'ko in taatf ein naan. Rarit sin nbukaen tar antea sin namsenan batuur-batuur.