3 Rarit nai' Yusuf in taatf ein re' tuaf bo'es naan, nabaarb ein he nnaon nsosan amnahat neun pah Masir. 4 Mes nai' Yakop ka nkonan fa nai' Yusuf in orif nai' Benjamin he nok sin. In natenab am nak, “Kais-kaisa' ri'ana' naan napein siraak amsa' on re' in tataf.” 5 Anbi mee-mee te, biak ein annenan nrarin nak anmu'i mnahat et pah Masir, es naan ate, too mfaun ii nnaon ma nsosan amnahat anbin naan. Amnahas naan, ro nanoon antean pah Kana'an amsa'. Rarit nai' Yakop in aanh ein^a annaon ma nsosan amnahat anbin nee msa'.

6 Oras naan, nai' Yusuf anjair tua pirsa'i neu usif pah Masir. Karu sekau-sekau neem na'ko mee-mee he nsoos pena'-maka' te, nai' Yusuf es na'sosa' nfeen sin. Es na' oras in taatf ein neman ntean ate, sin nri'tuun ma nhormaat ee, tar antea sin nneek afu. 7-8 Oras in niit sin on naan ate, in nahiin nain sin. Mes nai' Yusuf nmoe' jon on re' atoin Masir, es na' sin ka nahiin je fa. Rarit in nataan sin nok haan sesu mnak, “Hi re' ia, mi'ko mee?”

Sin natahan am nak, “Ho aten kai mi'ko pah Kana'an. Hai iim he msoos amnahat mi'ko ko, tua.”

9 Rarit nai' Yusuf namnau in amneit ein unu' fe'. In aka'tau sin am nak, “Au ka 'pirsai ki fa! Hi of asuntirus ki. Hi iim maim he mihiin pah Masir in ma'niifk ein, rarit hi mtebi mfain he iim ma mbaan kai, ai'?”

10 Mes sin natahan am nak, “Kaah, tua! Hai re' ia suma ho aetn aa kai. Batuur-batuur hai suma iim he msosa haa mnahat. 11 Hai aar kai re' ia, hai ama' mese'. Hai ka asuntirus kai fa, tua! Hai atoin rekon kai, tua.”

12 Mes nai' Yusuf na'uab naheer am nak, “Hoe! Hi mipoi. Kais amputa-kriu kau! Au uhiin 'ain 'ak hi asuntirus ki. Hi iim he maim pah re' ia in ma'niifk ein!”

13 Rarit sin npenan re'uf. Onaim sin natahan neun nai' Yusuf am nak, “Kaah, tua! Hai re' ia suma ho aetn aa kai. Hai iim mi'ko pah Kana'an. Hai mma'ori-tatan bo'es am nua. Hai aar kai ama' mese'. Hai ori' aheit suus gwe namaika' nok hai ama'. Ma hai oirf es anteni', annao namneuk.”

14 Nai' Yusuf nataah sin am nak, “Kahaf! Batuur uab re' fe'e na au aa' ee naan. Hi re' ia ro asuntirus ki. 15 Onaim hi ro he mfee kau bukti fe', he au uhiin 'ak hi uab ein fe'e na batuur, ai' kaah. Au 'suup! Karu hi ori' aheit suus gwe ka mok ne neem fa neu ia te, hi ka bisa fa he mnao misaitan pah re' ia! 16 Onaim hi mpiir maan tuaf es he nnao naan hi ori' neem neu ia. Biak ein, au 'tahan sin. Au he 'iit, hi uab ein naan batuur, ai' kaah. Karu kaah fa te, namneo, hi re' ia asuntirus ki.” 17 Rarit nai' Yusuf anrenu ma nataam sin neu bui je nanan, neno teun.

18 Neno teun on naan ate, nai' Yusuf annao ma na'uab nok sin anbin bui je mnak, “Au re' ia, umtausan Uisneno. Ma au utuin In roimn ee piut-piut. Au ufetin ki he hi mmoin. Mes hi ro he minokab uab es. 19 Karu hi uab ein batuur-batuur namneo te, hi ro he mikrira' kau bukti. In raan a'poi' ji on nai: au 'tahan tuaf es anbi bui re' ia. Hi bian amfain meu hi pah ee, he meiki mnahat meu hi nonot-asar sin. Natuin sin npao ki he mekin sin amnahat. 20 Rarit hi iim meik hi oirf aan, he njair bukti es, nak hi atoin neek amne'o. On naan ate, hi ka mipoi kau fa. Maut he nok ranan naan ate, au kais a'hukun u'maet ki.”

Sin nnenan on naan ate, sin nromin. 21 Rarit sin na'uab ein es nok es am nak, “Neu! Reok gwen! Oras ia hit tapein hit a'mo'ek neno naan in aafn ii jen. Hit tmoe' re'uf neu hit ori'. Hit tkius tiit ee neu in nsuus anmaet, in ntoit neik haan sakoit he hit ttuurn ee, mes hit ka tfairoir je fa. Etun oras ia, hit tsuus on re' ia msa'.”

22 Onaim nai' Ruben namnaub sin am nak, “Hae, sin au ori' aar ki. Neno naan au 'taar ki, he kais minsaa'-saa' ri'ana' naan! Mes hi ka mko-kosen main fa au uabak naan. Onaim oras ia, hit tseu fuan ii jen. Nai' Usu in naa' ee nsaen kit een.” 23 Sin na'uab ein on re' naan, mes sin ka nahinin fa neu nai' Yusuf nahiin sin uab. Natuin oras nai' Yusuf na'uab nok sin ite, in npaek uab Masir. Rarit na' anmui' akoni' uaba' na'bain ee neu sin npaek uab Ibrani.

24 Anneen sin na'uab ein on naan ate, nai' Yusuf annao nasaitan sin, ma nkae nmes-mees nbi bare re' biak ein ka niit ee fa. Oras in nkae nrari te, in nfain neem neu sin. Rarit in nreek tuaf ma nfuut nai' Simeon nbi in orif-tataf sin humak ma sin matak.

25 Rarit nai' Yusuf naprenat in ameupt ein he narain pena'-maka' neu in taatf ein sin a'kaor ein. Ma sin ro he ntao nafani' roit ein nbin a'kaor ein sin feefk ein. Rarit ansoo sin. In nrenu he nfeen sin beti' msa'. Ameupt ein naan anmo'en natuin nai' Yusuf in aprenat. 26 Rarit nai' Yusuf in taatf ein nasaeb a'kaor ein naan neun sin bikaes keledai nggwin. Rarit sin npoin ma nnaon nasaitan pah Masir.

27 Anbi raan atnana', sin nasnasan. Oras tuaf es anfei in a'karo' he na'eku in bikaes keledai te, in niit in roit ein anbin a'kaor ee fefan. 28 In naskeek! Onaim in nhaman in orif-tataf sin am nak, “Hoi! Hi iim he mkius miit ia fe'! Hit tmate tkoon! Sin ntao nafani' au roit ein esan au 'karo'.”

Ankius nitan on naan ate, sin neek ein namnekun. Sin namtau nmaten. Rarit sin na'uab ein am nak, “Uisneno ntao saa' antein' es re' ia neu kit?”

29 Rarit sin nnaon nkonon. Antean Kana'an on naan ate, sin nareta' neu sin aamf ee, saa'-saa' re' sin nnaben niit ee, nmurai na'ko sin nbin pah Masir, tar antea sin nfain neman. 30 Sin natonan am nak, “Aam honi'! Usif pah Masir in tua pirsai' je, ma'tain re'uf. In na'uab aah amsa', ka tiit fa haan ma'nura'. In ntubin ma ntu'iran kai, mnak hai mnao msuntiur in pah. 31 Mes hai mitaah am mak, ‘Kaah fa, tua! Hai mi'uab batuur namneo, tua. Hai aar kai re' ia, ka asuntirus fa, tua. 32 Hai atoin neek rekon kai, tua. Hai mma'ori-tatan tuaf bo'es am nua. Hai ama' mese'. Mes tuaf es na'ko kai, nnao namneuk, ma aheit suus gwe namaik nok hai ama' et pah Kana'an.’

33 Rarit kaes kou' gwe nak, ‘Au he 'soba' ki. Hi atoin amneot, ai' kaah. Hi tuaf es ro he nabaar anbi ia. Hi bian amfain, meiki mnahat meu hi nonot-asar sin, he sin kaisa' namnaah anmaten. 34 Hi ro he meik hi ori' neem neu ia fe'. Nok ranan naan ate, na' au uhiin 'ak hi ka asuntirus ki fa, mes batuur-batuur hi atoin neek amne'o. Onaim au of ufeti' ki hi benu' re' au 'taahn ee re' naan. Ma au 'konan ki he mnao meu mee-mee jah, ambi pah re' ia.’”

35 Anpeo nrarin on naan ate, sin npukai sin a'kaor ein. Sin naskeken, natuin sin es-es ate, niit sin roit ein nbin sin a'kaor ein. Ankius on naan ate, nai' Yakop nok in aanh ein namtau nmaten.

36 Rarit nai' Yakop na'uab nok sin am nak, “Hi 'moe'm ein, es na' au aanh ein namnekun. Nai' Usu namneuk gwen. Amteni' nai' Meon. Oras ia hi he meiki mtein nai' Min? Batuur-batuur hi he mha'mui' kau, es re' ia!”

37 Onaim nai' Ruben na'uab neu in aamf ee mnak, “Aam honi'! Amfee kau nai' Min. Au utaah. Au 'ba'an 'ain, au ro he 'uum 'eik je nfain neem 'eu ko, aam honi'. Mes karu kaah fa te, aam honi', ho mroor au aan moen nua' ein naan.”

38 Mes nai' Yakop na'uab am nak, “Kahaf! Ka nabei' fa he hi meik nai' Min. In tataf nai' Usu nmate nrair. Oras ia, aar in nmees. Karu in napein siraak anbi raan atnana' te, hi misusab miis kau, au atoni mnasi' ia, tar antea au 'taam 'eu nopu 'maten.”^b