Nai' Yusuf na'oteb usif pah Masir in amneit ein
41
Toon nua namsoup on naan ate, usif pah Masir namnei. In namnei mnak, in nhake nbi noe Nil in panin. 2 Nok askeken ate, in niit bijae hiut anpook anmaten. Bijaen ia sin aok ein narim-riman. Sin npoin na'kon noe naan in nanan, ma nekun huun anbin naan. 3 Rarit anmui' naan bijae hitu ntein, anpoin na'kon noe naan. Sin aok ein, nmaknau bousen. Sin nhaken npaumaak bijae apookt ein naan. 4 Rarit bijae amaknaut ein naan, an'oor naan bijae apookt ein naan. Onaim uisf ee naskeek anfeen aah.
5 Oras in antuup ma nfini nfain, in namnei ntein. In niit maka' puni' hiut anpoin na'ko maka' uu' gwes re' mrian ii kah een. Sin puink ein ko'u ma ma'afa'. 6 Rarit in niit antein maka' puni' hiut. Mes ain mapuut ee nfuu sin ma namnenen. Onaim sin n'aap ein. 7 Onaim maak aap ein naan an'oor naan maak mapuin ein naan. Rarit uisf ee nfeen. Na' in nahiin nak, in namnei ntein.
8 Anmeu nfiin on naan ate, uisf ee in teenb ee ka ntainina' fa. Onaim in naprenat he no'en are' kanan meo ma ahinit anbi pah Masir. Rarit in natonan sin amneit ein naan, mes ka tiit fa tuaf es, re' bisa na'oteb sin.
9 Rarit a'naak barab roitan bukae-mninut neu uisf ee, na' namnau niit nai' Yusuf. Onaim in nnao nbaiseun uisf ee mnak, “Au 'baiseun, tua! Ho ate kau gwi 'saan. 10 Unu' te, oras usi' ho museus kau 'ok au aok-bian, ma mutaam kai mbi bui, 11 fai jes ate, hai nua kai mimnei. Es-es ate, nok in amneit aa kuun. Ma mneit ein naan amsa' sin a'moufk ein ka huma' mese' fa. 12 Anbi bui je, anmui' atoin Ibranis es, fe' munif. In anjair niit usi' in a'naak paot in aten. Hai mitoon ee hai mneit ein naan. Onaim in nbaan sin. 13 Na'ko rasi naan, aam usi' ho muna'at mufani' kau au mepu. Mes au aok-bian ee, ho mhukun mu'mate. Rasin re' naan, natai nok saa' re' atoin Ibranis naan na'oteb sin, tua!”
14 Anneen on naan ate, uisf ee nreek tuaf he naen rabah he neik nai' Yusuf na'ko bui. Rarit nai' Yusuf nnao nkeu ma nsenu' in paken, ma nnao he nateef nok usif. 15 In neem antea te, uisf ee na'uab neu ne mnak, “Anah! Au umnei, mes ka tiit fa tuaf es, re' nabei' he nbaan amneit ein naan. Mes anmui' tuaf re' natoon kau nak ho bisa.”
16 Onaim nai' Yusuf nataah am nak, “Aam usi'. Ho ate kau msa' ka uhiin fa saa'-saa', tua. Uisneno nmees kuun es anbaan are' kanan amneit. In of oni' anroim he natoon ko rais reko, tua.”
17 Rarit uisf ee natoon amneit ein naan. In nak, “Anbi au mneit ii naan, au 'hake 'bi noe Nil in panin. 18 Onaim anmui' bijae apokat hiut, sin aok ein narim-riman. Sin npoin na'kon noe naan, ma nnaon nekun huun nbin noe naan in panin. 19 Rarit anmui' bijae hitu ntein neman. Mes bijaen naan maknau-bousen. Au ka 'iit 'iit fa bijae human on re' naan anbin pah Masir ia! 20 Mes au 'sanmaak! Natuin, nok askeken ate, bijae amaknau-bousen naan, an'oor naan bijae apookt ein naan. 21 Sin n'oro nrair sin on naan amsa', bijaen naan anmaknaun baar aah. Rarit au uskeke' 'feen aah.
22 Rarit au 'tuup ma 'fini 'fain. Onaim au umnei 'tein. Au 'iit maka' puni' hiut, npoin na'kon maka' uu' gwes re' mrian ii kah een. Sin puink ein ko'u ma ma'afa'. 23 Rarit au 'iit a'tein, maka' puni' hiut. Mes ain mapuut ee nfuu sin ma namnenen. Onaim sin n'aap ein. 24 Onaim maak aap ein naan an'oor naan maak mapuin ein naan. Rarit au 'feen. Onaim au utoon amneit ein ia 'eu ahiint ein. Mes ka nmui' fa tuaf es, re' nabei' he nbaan amneit ein naan.”
25 Rarit nai' Yusuf anbaisenu mnak, “Aam usi'. Amneit ein naan, sin a'moufk ein mees' aah. Uisneno natoon nain ko, saa'-saa' re' In he nmoo' je, tua. 26 Amneit ein naan sin a'moufk ein on nai: bijae hiut apookt ein naan, ma maak hiut mapuin ein naan, esan re' oras amnaaht ein anho-hoen toon hiut. Sin a'moufk ein mees' aah. 27 Ma bijae hiut amaknaut ein naan, ma maak puin hiut a'aap ein naan, esan re' oras amnahas toon hiut, tua.
28 Onaim Uisneno natoon nain saa' re' In he nmoo' je, tua. On re' fe'e na au u'uab. 29 Hit of attean oras athoes toon hiut atbi pah Masir ok-oke'. 30-31 Rarit na' hit ttean oras amnahas toon hiut. Amnahas naan ma'tani', tar antea ka tiit tain fa mnahat tbi hit pah ia. Are' pah ii namnaah ok-oke', tar antea sin ka namnau ntein fa oras mnaaht ein nhoen.
32 Onaim aam usi', ho mupein mneit no nua re' naan, in a'moufk ein nak, Uisneno nafeek anrair nak, ka 'roo fa ntein ate, saa' re' In nafeek sin naan, ro he njair.
33 Es naan ate, au 'peint ii on nai, tua: reko nneis aam usi' ho maim tua ahiint es, re' an'urus nahiin nok reko. Rarit ho mait je he n'ator ma naroitan rek-reko pah re' ia. 34 Oras mnaah ahoet toon hiut naan, reko nneis aam usi' ho mait tua 'teet es antein, he in nkaububu' pena'-maka' na'ko too gwi sin renen. Pena'-maka' naan anbait sin paa' niim, he natunu' paaf es. 35 Sin ro he natuin aam usi' ho prenat, he sin ntoupun pena'-maka' na'ko kuan-kuan nbin pah Masir ia. Rarit sin ro he natunu' sin nbin umin re' he tatunu' mnaaht ein. Rarit ro he npao sin rek-reko. 36 He karu toon hiut amnahas naan antea te, hit fe' atmu'i mnahat. Karu sin n'aotr ee on re' naan ate, ka tiit fa tuaf he namnaah anmaet, tua.”
Usif pah Masir nasaeb 'piru'-baru neu nai' Yusuf
37 Anneen nai' Yusuf na'uab on naan ate, uisf ee ma in a'naak ko'un ein, anromin he natuin in uab ein naan. 38 Rarit uisf ee na'uab am nak, “Uisneno In Asmaan ee ankuaas nai' Yusuf re' ia. Es naan ate, hit ka neu he tapein fa tuaf es antein, re' nneis na'ko nai' Yusuf.”
39 Rarit uisf ee na'uab nok nai' Yusuf am nak, “Uisneno natoon ko are' kanan rasin ia. Oras ia, hai fe' mihiin mak ho atoin ahinit ko. Ma ho mahiin maan nneis na'ko too mfaun. 40 Onaim oras ia, au 'ait ko mjair au atoin mapirsa'i. Ho mjair a'nakat ambi au sonaf. Au too nggwin ro he natuin ho preent ein. Mes arahaa au 'mees, na' au 'neis ko.”
41-42 Rarit uisf ee nous in krein mamarak, ma napaekb ee neu nai' Yusuf in akrurun. Ma in na'uab am nak, “Nok ranan ia, au usaeb 'piru'-baru 'eu ko mjair au atoin mapirsa'i nbi pah Masir ia.” Rarit in napakeb nai' Yusuf baru mnaun ma'oos es, ma na'heekb ee 'heke' mnaut es.
43 Rarit in nana'at in akreet bikaes es anteni', he nai' Yusuf ansae. Anmui' tuaf-tuaf naen anbi kreet naan in matan ma nkoa'an nafan-faink ein am nak, “Awoo! Misoit ranan! Amfee hormaat!a A'naet ii, he nkoen on ankoon!” Nok ranan naan, uisf ee nait nai' Yusuf anjair in atoin mapirsa'i nbi pah Masir.
44 Rarit uisf ee na'uab nok nai' Yusuf am nak, “On nai. Ho muhiin main, au re' ia usif. Au utoon a'rair too pah Masir 'ak, karu ho ka mkonan sin fa te, sin ka nabe'in fa he nmo'en saa'-saa'.”
45 Rarit uisf ee nakanab nai' Yusuf am nak, Safnat Panea, natuin abitan Masir sin kaank ein. In nasaob nai' Yusuf nok ri' feot muinf es, in kaann ee bi Asnat. Nai' Yusuf in aam baabf ee, kaann ee nai' Potifera. In es re' na'naak rais pirsait anbi kota On.b Nok ranan naan, nai' Yusuf njair atoin makana' ma mateka' nbi pah Masir.
46 Oras sin nasaeb nai' Yusuf a'piru'-baru te, in nmoin naan toon bo' teun gwen. Rarit in nnao nfuun am nateef kuan-kuan ma bare-bare nbi pah Masir. 47 Anbi oras athoes toon hiut naan, sekit ma mnonut anho-hoen. 48 Rarit nai' Yusuf annao ma nkaububu' sekit ma mnonut anneisi ntein, ma natunu' sin nbin umin re' he tatunu' mnaaht ein. Sekit ma mnonut na'ko bare-bare re' npaumaak kota mee te, in natunu' sin nbi uim 'tunu' bua' nbi kota naan. 49 Tar antea maka' re' in nkaububu' ma natunu' sin naan, mfau-rutu. On re' snaen ee et tais je ninin, tar antea ka tiit fa tuaf es, re' bisa nsoi' naan sin.
50 Oras amnahas naan ka ntea fa fe', nai' Yusuf in fee bi Asnat nahoni' ri'aan mone nua. 51 Onaim nai' Yusuf na'uab am nak, “Uisneno nmoe' kau ma au 'nika' ain au susat oras au 'poi u'ko au ama' in umi.” Es na' in nakanab in aan moen unu, nai' Manase (re' he noi on re' kata es antein, nak ‘nikan’).
52 Oras in napein ri'aan moen muin je te, in na'uab antein am nak, “Au upein suust am nana'renat amfaun 'bi bare ia. Mes Uisneno nfee kau tetus, ma au uhoni' 'bi ia.” Onaim in nakanab ri'ana' naan, nai' Efraim.c
53 Rarit oras athoes toon hiut naan namsoup. 54 Onaim oras amnahas toon hiut naan anmurai ntaam, natai nok re' nai' Yusuf na'uab nain je. Anbi bare-bare, amnaahs ii ntaam een, mes anbi pah Masir anmu'i mnahat, natuin natunu' nrarin sin nbi uim 'tunu' bua' ein. 55 'Roo-'roo on naan ate, abitan pah Masir anmurai namnahan. Rarit sin nnaon ma ntotin amnahat na'ko usif. Onaim uisf ee nreek sin he nnaon neu nai' Yusuf, he natuin in aprenat.
56 Mes amnahas naan ma'tain re'uf. Bare-bare nbi pah Masir in nanan napenin amnahas ok-oke'. Onaim nai' Yusuf anmurai nasoit uim 'tunu' mnaaht ein ma na'sosa' pena'-maka' neu abitan Masir. 57 Rarit biak ein na'kon mee-mee neman ma nsosan amnahat na'kon nai' Yusuf nbin pah Masir. Natuin oras amnahas naan batuur-batuur ma'tani'.