Atoin bui nua namnein, ma nai' Yusuf natoon sin oetk ein
40
1-3 Anbi bui naan, anmui' naan a'naak mepu tuaf nua re' anmeup nitan anbin usif pah Masir in sonaf. Es na'naak mepu barab roitan bukae-mninut neu usif; ma es antein na'naak mepu barab roitan bukae-kokis neu usif. Sin nua sin anmo'en sanat neu usif. Es na' uisf ee natoo', ma nataam sin neun bui. Onaim sin nabuan bare mese' nok nai' Yusuf anbin bui naan. 4 Rarit a'naak bui naan naprenat nai' Yusuf he n'urus a'nakat tuaf nua re' naan. Sin nabuan nbin bui naan, tar antea oni' toon es-a'nua.5 Fai jes ate, tua nua' ein naan namnein. Es-es ate, nok in amneit aa kuun. Ma mneit ein naan amsa' sin oetk ein ka huma' mese' fa. 6 Noka' on naan ate, nai' Yusuf neem ma niit atoin nua' ein naan, sin huum fousun. 7 Onaim in nataan sin am nak, “Nansaa' am es neno ia hi mhuum fous on naan?”
8 Onaim sin natahan am nak, “Fini na, hai mimnei. Mes hai ka mihiin fa in oten.”
Rarit nai' Yusuf nataah sin am nak, “Ka tiit fa mansian es, re' he nahiin nain mneit ein sin a'moufk ein naan, arahaa Uisneno es re' nahiin sin. Mitoon miit kau hi mneit ein naan. Maut he au 'aim 'iit sin a'moufk ein na'ko Uisneno.”
9 Rarit a'naak mepu barab roitan bukae-mninut neu uisf aan, natoon am nak, “On nai. Au umnei mnak, au 'iit hau anggur uu' gwes, 10 taef teun. Hau naan nanoo, nasuuf, ma nafua sana' mfa-faun tar namnatun. 11 Onaim au 'iit, au 'naa' uisf ee in a'koom oe. Onaim au 'ait hau naan in fuan amnatus, ma au 'aes 'eu 'koom oe naan. Onaim au 'noon ee 'eu uisf ee he nbukae.”
12 Anneen on naan ate, nai' Yusuf natoon ee mnak, “Aam. Amneit naan in oetn ii on nai: taef teun re' naan, in oetn ii neno teun. 13 Anbi neno teun amnemat re' ia, uisf ee of napoitan ko na'ko bui ia. Rarit in nasaeb nafani 'piru'-baru neu ko, he mu'naak amfain meu barab roitan bukae-mninut neu ne. 14 Karu ho uam aan reko on naan ate, kais amnikan kau, joo! Karu ho mneek kau te, mturun kau he mutoon meu uisf ee, he napoitan kau na'ko bare ia. 15 Natuin, karu he tkius rais ji in amneon ii te, sin nait kau nok a'seke' na'ko abitan Ibrani sin pah. Anbi bare ia msa', au ka 'moe' fa rais re'uf mese' msa'. Mes sin nheek kau ma nataam kau neu bui, on re' atoin maufinu.”
16 Anneen niit amneit naan in oetn ii reokn ii kah, on naan ate, a'naak barab roitan bukae-kokis neu uisf ee na'uab neu nai' Yusuf am nak, “Ba'e! Au umnei msa' on nai: au 'suu aba' ktuta' teun. 17 Aba' ktuta' faof ne, matua' nok kokis huma'-huma' neu usif. Mes koorn ein neman ma nabroor naan koiks ein re' nbin au 'nakak.”
18 Anneen on naan ate, nai' Yusuf nataah am nak, “Aam! Ho mneit naan in a'moufn ii on nai: aab teun ein naan, sin oetk ein neno tenu msa'. 19 Neno teun amnemat re' ia, uisf ee of anreek tuaf he neem ankeut nain ho 'nakam. Rarit sin nkaton ho aom a'naen naan neu nii ma'aika'. Onaim koorn ein neman, npisun ma nabroor naan ho siis maan oke'.”
20 Neno tenu nkoon on naan ate, nateef nok uisf ee in neon manohin. Onaim in nmoe' fesat neu in a'naak meupn ein ok-oke'. In naprenat he sin nnaon napoitan a'naak mepu tua nua' ein re' etan bui. 21 Rarit in nasaeb 'piru'-baru nfain neu a'naak barab roitan bukae-mninut, he nanaob nafani' in mepu.
22 Mes a'naak barab roitan bukae-kokis neu uisf aan, sin nkaton in aon ee, natai nok saa' re' nai' Yusuf in uaban.
23 Mes a'naak barab roitan bukae-mninut naan, annikan nain nai' Yusuf.