Nai' Yusuf, ma kaes ko'u Potifar in fee
39
1-2 Neon gwes ii, atoin Ismaelas sin neik nai' Yusuf annao neu pah Masir. Anbi naan, anmui' kaes kou' gwes, kaann ee nai' Potifar. In re' naan, a'nakat neu are' soraurs ein re' npao usif pah Masir in sonaf. Nai' Potifar ansoos nai' Yusuf na'ko araakn ein naan, he in nait je njair ate nbi in umi. Anbi naan, UISNENO anturun nai' Yusuf. Es naan ate, in meupn ein ok-oke' nanaob ok nok reko. 3 In aam uisf ee nkius nai' Yusuf in meupn ein naan ro reko, in nahiin batuur-batuur nak UISNENO nturun ma nbaab nai' Yusuf. 4 Es naan ate, aam usi' naan anromi haa nai' Yusuf, ma npirsai je. Onaim in nait nai' Yusuf anjair mandoor neu in umi. In nnona' in uim je he nai' Yusuf an'urus. In baer pusaak ein, nai' Yusuf es an'urus sin amsa'. 5 Natuin nai' Yusuf natua nbi naan, es na' Uisneno nfee tetus neu in aam usif, atoin Masir naan. In uim je nanan, in pusaak ein, in rene-po'on, ma in mepun naan nanaob ok nok reko. 6 Oras nai' Potifar niit nai' Yusuf in meupn ein reko ok-oke', in ka natenab fa saa'-saa' antein. In nahini haa he naah.Oras naan, nai' Yusuf in aon ma in human, reokn ii kah een. 7 In natua nbi nee fe' ka 'roo fa, mes nai' Potifar in fee je, ntaam neek neu ne. Onaim in na'oki' nai' Yusuf he karu reko te sin nua sin antupan.
8 Mes nai' Yusuf ka nroim fa. In nataah am nak, “Kais on naan, tua! Au aam usi' Potifar anfee kau kuasa he 'urus in umi-mone'. 9 Anbi umi ia, ka tiit fa tuaf re' nnaa' aprenat anneis kau. Aam usi' nana'at kau are' saa'-saa' he 'urus sin. Mes in ka nana'at ko fa neu kau. Nok ranan mee, au he 'moe' rais tafi' re' ia? Rasi naan, nasuir nok Uisneno In romin amsa'!”
10 Maski on naan amsa', mes nai' Potifar in fee je na'oki' nai' Yusuf piut. Mes nai' Yusuf ka ntoe natuin ee fa.
11 Neot es, nai' Yusuf antaam neu uim je he nkius mepu. Neno naan, ka tiit fa tuaf es anbi naan. 12 Onaim bifee naan neem ma nnaa' nai' Yusuf in baru, ma nheer ee mnak, “Uum nai! Hit nua kit atmes-mees. Uum he hit ttuup nai.”
Mes nai' Yusuf ka nroim fa. Onaim in nfoerait, tar antea in baru naan natpuu' nain. Onaim in naen anpoi. Mes bifee naan annaa' namaika' nai' Yusuf in baru.
13 Oras nai' Potifar in fee je niit nai' Yusuf naen nasaitan in baur gwe te, 14-15 in no'en ameupt ein, ma natonan sin am nak, “Hae! Hi iim he mkius miit! Fe'e na atoin Ibranis naan, antaam anbi au ke'en. In he nmoe' re'uf neu kau, mes au 'koa' uher-heer. Amkius miit, in naen anporin in baru. Au moen ji, in nait neik naan kuun atoin maufinu ia he ntao namab-maeb ahaa kit!”
16 Onaim nai' Potifar in fee je, nnaa' baru naan, tar antea in moen je nfain neem. 17 Oras in moen je nfain neem ate, in natoon ee mnak, “Amneen! Atoin Ibrani re' ho mait meik je neem nok kit naan, fe'e na in ntaam neu nbi au ke'en. In he nkoin kau nok a'seke'! 18 Mes au 'koa' uher-heer ma 'o'en ameupt ein. Onaim in naen namneuk, namaika' nain in baru ia.”
19 Anneen in fee je natoon on naan ate, nai' Potifar natoo' re'uf. 20 Onaim in nreek tuaf ma nnaon nheek nai' Yusuf. Onaim sin nataam ee nbi uisf ee in bui.
21 Mes UISNENO ka nnika' fa nai' Yusuf. Etun In ntuurn ee piut, tar antea a'naak bui naan anneek aah ee. 22 Rarit in npirsai nai' Yusuf. Onaim in nfee ne kuasa he n'urus atoin bui nggwin ma are' kanan mepu nbi bui je nanan. 23 Es naan ate, a'naak bui naan in ka natenab fa meup saa'-saa' nbi bui. UISNENO nturun ma nbaab nai' Yusuf piut-piut, es na' in mepun nbi bui je nanaob ok nok reko.