Nai' Yahuda ma in aan nanef bi Tamar
38
Rarit nai' Yahuda nnao nasaitan in orif-tataf sin, ma natua nok in soob reko nai' Hira anbi kuan Aduram. 2 Anbi naan, anmui' a'naef es, atoin Kananas, in kaann ee nai' Sua. Nai' Yahuda anroim in aan feot gwes. Rarit in nsao gwe. Onaim in nahoni' ri'aan mone nmaktun-tuin ein. 3 Aan moen unu, sin nakaanb ee nai' Er. 4 Aan mone tnana', sin nakaanb ee nai' Onan. 5 Rarit aheit suus gwe, kaann ee nai' Sera. Oras nahoni' nai' Sera, sin nfo'on neu kuan es, in kaann ee, Kesip.6 Oras aan moen unu nai' Er na'nae te, nai' Yahuda nnao neik ripa'-oko' ma ntoitn ee ri' feot munif es, in kaann ee bi Tamar. Rarit nai' Er ansao bi Tamar. 7 Mes nai' Er naan atoin maufinu. Es naan ate, Uisneno nhukun na'mate. Onaim nai' Er nmaet, mes ka nmui' fa anah.
8 Rarit nai' Yahuda nreun aan mone tnaan ee mnak, “Onan! Ho tata' nmate nrair, mes in ka nmui' fa anah. Onaim oras ia, tatuin atoni mnais ein sin haart ii te, ho ro he msenu' ho tata' he msao in fee. Nok ranan naan ate, maut he ho muhoni' ri'ana' neu ho tata' in sapaan.”
9 Nai' Onan nahiin harat naan. Mes in ka nroim fa he nahoni' neu in tataf nai' Er. Onaim karu in ntuup nok bi Tamar ate, in akmii oen ee n'oop ee npoi henati' bi Tamar kais na'apu' he nahoni'. 10 Nai' Onan anmoe' on naan, onaim nato'ob niis Uisneno. Etun Uisneno nhukun niis ne msa'.
11 Oras nai' Yahuda nkisu te in aan moen nua' ein re' ansao bi Tamar naan anmaten ate, in natiun gon. In natenab, kais-kaisa' in aan moen aheit susu nai' Sera nsao bi Tamar ate, of in nmate msa'. Onaim in nnao natonan in nanef bi Tamar am nak, “Tamar! Reko nneis ho mfain meu ho mahoin ein. Karu au anah nai' Sera na'nae te, na' ho mfain uum he msao.” Rarit bi Tamar anfain.
12 Ka 'roo fa te, nai' Yahuda in fee je nmaet. Onaim in nkae ma nsuus tar antea neon nuukt ein namsopun ate,a in no'en in partei nai' Hira, he sin nua sin annaon neun kuan Timna. Anbi naan, atoin ein ankateer a'bib-kaesn ein sin fuunk ein, he na'sosa' sin. Akateers ein namfa-faun ma sin feest ein amsa'.
13 Onaim biak ein natonan bi Tamar am nak, “Ho aam baba' annao et Timna, he n'urus tua akateer funu neu in a'bib-kaesn ein.”
14 Oras naan, nai' Yahuda in aan moen aheit suus gwe na'nae nrair. Mes bi Tamar nahini nrair nak in aam baabf ee ka nroim fa he nai' Sera nsao gwe. Onaim bi Tamar naim raan a'po'i he na'tui' in sapaan. Onaim in nsenu' nain in tai-baun ein, rarit in npaek tai-paek reko. In npaek po'uk ma nsakruub naan in human. Rarit in nnao ntoko nbi eno' he ttaam teu kuan Enaim, nbi haa re' ranan he tnao teu Timna. 15 Oras nai' Yahuda nnao npeo' kuan naan in rana 'tamas, in niit bifee jes. In natenab nak oni' bifee a'hake', natuin bi Tamar in paekn ee on re' bifee a'haek ein. Anneis-neis in nkuub naan in human. 16 Nai' Yahuda ka nahiin naan fa nak, bifee naan in aan nanef. Onaim in nnao npaumaak bifee naan, ma nataan ee mnak, “Hae! Karu ho mromi te, au 'tuup 'ok ko. Ho mtoit fauk?”
Mes bi Tamar nataah am nak, “Es re' ho, tua. Ho roim maan on mee te, au utuin aah.”
17 Nai' Yahuda ntaabr ee mnak, “On mee karu au 'fee ko 'bib jes ate, ho mromi, oo?”
Rarit bi Tamar nataah am nak, “Reko, tua. Asar ho mfee kau baer es fe'. Reka'-reka' ho msonu' 'bibi naan, na' ho mtoup mufani' ho baer tarun sin.”
18-19 Onaim nai' Yahuda nataan antein' ee mnak, “Au he 'fee ko baer saa'?”
Bi Tamar nataah am nak, “Ho mfee kau baer maruna' re' ho mu'heek je naan nok nain in tanin. Rarit ho teas naan amsa'.” Onaim nai' Yahuda nfee baer' ein naan.
Rarit sin nua sin nmakonin. Rarit bi Tamar anfain. In nhoro' nain in tai-paek rekon naan ma in po'uk, rarit in npaek nafani' in tai-baun ein. Namuni te, bi Tamar annaben nak in na'apu' nrair.
20 Ka 'roo fa nteni' te, nai' Yahuda ntoit babat na'ko in soob reko nai' Hira mnak, “Ho meiki 'bibi ia meu bifee a'hake' re' et Enaim, he mtoup maan kau au baer' ein re' in nnaa' sin.” Nai' Hira nnao ntea Enaim. In nataan neu-mneem, mes ka niit ai' nateef fa bifee naan. 21 Onaim in nataan abitan bare naan am nak, “Au he utaan 'aan, tua. Hi miit bifee a'hake' es, re' nati' te antok-toko nbi kuan ee in eno' 'taamn ee, oo? In et mee?”
Mes sin natahan am nak, “Aam, ka tiit fa bifee a'hake' et ia.”
22 Onaim nai' Hira nfain neem neu nai' Yahuda. In natoon am nak, “Au ka uteef 'ok 'aan fa bifee naan. Au 'aim ma 'hae 'maet, mes abitan nee nak, ka tiit fa bifee a'hake' nbi naan.”
23 Nai' Yahuda nataah am nak, “Maut he in paar baer' ein naan! Asar biak ein kais namaeba' kit. Natuin au he 'baen, mes hit ka tateef fa bifee naan ate.”
24 Ankoon funan teun on naan ate, tuaf bian annaon ma natonan nai' Yahuda mnak, “Ho aan nanef bi Tamar naan, anmoe' jon on re' bifee a'hake'. Oras ia in na'apu'.”
Anneen on naan ate, nai' Yahuda nato'o nmaet. Rarit in nreun tua atonas naan am nak, “Amnao mheer meik kau bifee naan neem neu ia, he ttout gwe 'hon-honis!”
25 Rarit sin nnaon ma nheer neik bi Tamar. Mes in nait napoin baer mamarak ma teas naan. Onaim in nreek tuaf he nnao natoon neu in aam baabf ee mnak, “Aam. Amtae murek-reko' baer' ein re' ia fe'. Tuaf re' nmui' baer mamarak ma teas re' ia, in es re' na'apub kau.”
26 Ankius niit baer' ein naan ate, nai' Yahuda nahiin nain nak baer' ein naan, ro iin na. Rarit in na'uab am nak, “Batuur! Bifee naan ka nsaan fa. Au es re' asanat. In ntoom. Amneon ii, au ro he usaob ee nok au anah nai' Sera, mes au es re' ka 'romif. Amnao mifeitn ee nai!” Rarit nai' Yahuda ka ntuup nabua ntein fa nok bi Tamar.
27 Bi Tamar in oras he nahoin ii ntea gwen. Onaim in nahoni' ri'aan koen. 28 Oras in nahoni', ri'aan es napoit nahunun in a'niman. Bifee atuis mahoin ee nfutu' aab me'e nbi in a'niman. In nak, “Re' ia, es re' ahunut.” 29 Mes ri'ana' naan anheer nataam in a'niimn ee nfain. Rarit akoet ee npoi nahuun. Onaim bifee atusis naan nak, “Hoe. Ho ro ma'tain, oo! Etun ho mu'seti' ma mpoi muhuun!” Rarit sin nakanab ri'ana' naan nai' Peres (re' in oetn ii nak, ‘na'seti' npoi’). 30 Rarit na' in orif re' mafuut aab me'e naan anpoi. Sin nakaanb ee nai' Sera (in oetn ii nak ‘mee' rare’).