Nai' Yakop anfain neem neu pah Kana'an
37
1-2a Re' ia, nai' Yakop sin reta'. Neon gwes ii, nai' Yakop anfani nteni', ma natuan nbin pah Kana'an, re' in amaf nai' Isak natua nbi naan na'ko unu'.Nai' Yusuf nok in taatf ein
2b Oras naan, nai' Yakop in aanh es na'ko in fee bi Rahel, kaann ee nai' Yusuf. Oras in nmoin naan toon bo'es am hiut, in nok in taatf ein nati' te sin nnaon ntiut sin a'bibin ma 'bib-kasen bu'-bua'. In taatf ein, nai' Yakop in fee bi Bilha ma bi Silpa sin aanh ein. Nai' Yusuf re' ia, in aktuta' uab neu in amaf, anmatoon nok in taatf ein sin a'moe'k ein.
3 Oras nahoni' nai' Yusuf, nai' Yakop namnais jen. Etun in nneek nanesib nai' Yusuf na'ko in anah bian sin. Neot es nai' Yakop ansoo baru mnaun es reokn ii kah,a ma nfee je neu nai' Yusuf. 4 Oras in taatf ein nitan nak sin aamf ee nneek nanesib neu nai' Yusuf ate, sin nsaken nai' Yusuf, tar antea sin ka nromin fa he na'uab ein nok ne.
5-7 Fai jes, nai' Yusuf namnei. Rarit in natoon amneit naan neu in taatf ein am nak, “Hae! Hi mneen fe'! Au umnei mnak hit tfuut hit maak-gandum sin atbi rene. Onaim au maak reif ein re' mafuut ein naan, anfeen anhaken amneof aah. Mes hi maak ein anhaken nfuun naan au nggwin, rarit na'ruir ein ma na'besan neun au nggwin.” Annenan on naan ate, in taatf ein ansaken antein' ee.
8 Rarit sin nakaina' nai' Yusuf am nak, “Hoe! Ho mak oni' ho he mjair usif he muprenat kai, oo?” Sin nsaekn ee ma'tani', natuin in natoon amneit naan neu sin.
9 Rarit nai' Yusuf namnei ntein. Onaim in natoon neu in taatf ein am nak, “Hae! Au umnei 'tein. Au 'iit manas, funan, ma kfuun bo'es am mese'. Sin na'ruir ein ma na'besan kau rek-reko.” 10 Oras nai' Yusuf natoon anrair mneit naan neu in amaf ma in taatf ein ate, in aamf ee napuun nai' Yusuf ma nakain ee ma'tani' mnak, “Mnei saa' na es re' naan! Ho mutenab mak, au 'ok ho aina' ma sin ho tata' sin neman he nneek ho haem ein naan, aa oo? Ho reokm ii!” 11 Onaim nai' Yusuf in taatf ein nsaken batuur-batuur. Mes in aamf ee natenab mneit ein naan anbi in nekan.
Sin na'sosa' nai' Yusuf he njair ate nbi pah Masir
12 Neot es, nai' Yusuf in taatf ein neik sin aamf ee in a'bibin ma 'bib-kasen annaon npaumak-maak kuan Sikem. 13 Ka 'roo fa te, in aamf ee nak, “Usu! Ho tata' sin natukun mu'it anpaumak-makan etan Sikem. Onaim ho mubarab he mnao mkius miit sin fe'.”
Nai' Yusuf nataah am nak, “Reko, tua.”
14 Onaim in aamf ee nak, “Ho mnao mkius miit sin ho tata' nok mu'it ein fe'. Sin on mee? Rekon aa oo, ai' on mee? Rarit ho mfain uum he mutoon kau.”
Rarit nai' Yusuf annao nasaitan amnera' pah Hebron ma nkono ntea Sikem. 15 Antea nee te, in naim sin anfuun am nateef anbin amnera' huun naan. Oras in nateef tuaf es, tuaf naan nataan ee mnak, “Ho maim saa'?”
16 Nai' Yusuf nataah am nak, “Aam, au 'aim sin au tata'. Sin napoo' neik hai mui't ein he na'eku' sin anpaumak-maak anbin bare ia. Ai' ho miit sin, tua?”
17 Tuaf naan nataah ee mnak, “Sin ka etan fa ia ntenin. Mes sin nak am he nnaon ntein' ein anpaumak-maak kuan Dotan.”
Rarit nai' Yusuf annao natuin sin, tar in niit sin anbin Dotan. 18 Mes oras nai' Yusuf fe'e nbi 'roo, sin niit anrair je. Onaim sin nma'akoran he nroor gwe. 19 Rarit sin nma'uab ein am nak, “Hi mkius miit. Amneit ee neem een! 20 Naa, iim nai he troor tisan. Rarit hit tait itpoirn ee neu koon hain es anbi ia. Rarit hit tatonan hit ama' mtak, mui' fui nggwin anpius gwe ma neku nrair je gwen! Maut he hit tkius tiit in amneit ein on mee!”
21 Anneen on naan ate, in tataf nai' Ruben naim raan a'po'i he nafetin naan nai' Yusuf. Onaim in nakaina' in oirf ein am nak, “Hae! Hit kais atroor gwe! 22 Reko nneis, hit t'okar tataam ee teu koon hani' re' ia. Bare ia, baer ruman. Onaim ka tiit fa tuaf re' nahiin mo'et ia. Asar hit kaisa' tniimn ee he naa' ii nsai.” In na'uab on naan, natuin in he nafeti' nai' Yusuf he nreun nggoe he nfain.
23 Oras nai' Yusuf neem antea te, sin nheek je ma nhoro' nain in baur reko naan. 24 Rarit sin nheer anfoont ee, ma n'okar nataam ee neu koon hani' naan.
25 Rarit sin ntebi nfanin ma nbukaen. Sin fe'e nbukaen on naan ate, nok askeken sin niit atoni' puukn es neman. Pukan amneemt ein naan anpaken bikaes unta. Sin nasaeb ein abrua' he nraakn ein. Baer raakn ein naan esan re': hau foo meni' in oen, bumbu huma'-huma', ma hau re'u huma'-huma'. Ankis-kisun ate, pukan amneemt ein naan, atoin Ismaelas sin re' neman na'kon kuan Gireat. Sin he nnaon neu bare 'roo neun pah Masir.
26 Rarit nai' Yahuda na'uab neu in orif-taatf ein am nak, “Hae! Reko nneis on nai. Hit kais atroor gwe. Hit tapein saa'? Maski on mee msa', hit ka neu he ta'koro' taan fa in naa'. 27 Reko nneis hit ta'soos ee teu atoin Ismaelas sin. Maski hit tmoo' je on mee msa', hit oir hoin aa. Onaim hit kaisa' tniim ne.” Rarit sin nmaktuina' rasi naan.
28 Onaim oras atoin araakn ein naanhe nkonon ate,b nai' Yusuf in taatf ein anheer napoitn ee na'ko kona' naan. Onaim sin na'soos ee neu atoin Ismaelas sin. In oosn ii roi muti' fua' bo' nua.c Rarit asoost ein naan neik nai' Yusuf antean pah Masir.
29 Oras sin na'sosa' nai' Yusuf ate, nai' Ruben ka nahiin fa. Onaim oras in nnao neu kona' naan ate, in naskeek, natuin nai' Yusuf ka et na fa heen. Rarit in npius nakrati' in paken anbi in aon, natuin in nsuus anmaet. 30 Onaim in ntebi nfain neu in oirf ein am nak, “Airoo! Nai' Usu ka et fa koon ee! Oras ia au he unsaa' a'tein?”
31 Rarit sin nroro 'biib jes. Sin nait nai' Yusuf in baur reko naan, ma nateep ee neu naa' naan. 32 Rarit sin nait baur manaa' naan ma neik je neu sin amaf, ma natonan am nak, “Aam! Hai mait baru ia. Amkius miit ee. Kais-kaisa' nai' Usu in baru.”
33 Ankius baru naan ate, nai' Yakop nahiin nain je neu in aanh ee baru. Onaim in nataah am nak, “Airoo! Batuur, au aanh ee in baur gwi es re' ia. Ka tahiin neu mui' fui nggwin npius niis ne et mee. Airoo! Au aanh ee nmate nrair!”
34 Rarit nai' Yakop anpius nakrati' in baru, ma ntainuus a'kaor bijae maa', natuin in nsuus ma nnana'reen.d In nkae nme'-me'ur a'roo neu in anah naan. 35 In aan mone ma aan feto neman ma nhaan mau gwe, mes ka nabei' je fa. In na'uab am nak, “Kahaf! Au of a'suus ma 'nana'reen tar antea au 'maet. Natuin au ka neu he 'nika' fa au anah re' ia.” Onaim nai' Yakop ansuus ma nnana'reen piut, natuin in namnau in anah nai' Yusuf.
36 Oras nai' Yakop fe' ansuus on naan ate, araakn ein naane antean nrarin pah Masir. Sin neik nai' Yusuf ma na'soos ee neu kaes kou' gwes, kaann ee nai' Potifar. In re' ia, usif pah Masir in a'naak paot.