Nai' Esau in sufan-ka'un
36
Nai' Esau in sufan-kau'n ein esan re' ia. In kanan es antein, es re' nai' Edom. 2 Nai' Esau nsao ri' feot munif nua na'kon pah Kana'an. Tuaf es, bifee na'ko atoin Hetes, kaann ee bi Ada, nai' Eron in aan feto. Es anteni' atoin Hebis. In kaann ee, bi Ohoribama. In aamf ee, kaann ee nai' Anah, ma in nai'f ee, kaann ee nai' Sibeon. 3 Nai' Esau nsao nai' Isma'el in aan feot gwes amsa', kaann ee bi Basmat. Bi Basmat in naof ee, es re' nai' Nebayot.4 Nai' Esau in fee unu, bi Ada, nahoni' nai' Elifas. Bi Basmat nahoni' nai' Rehuel. 5 Rarit bi Ohoribama nahoni' nai' Yeus, nai' Yaram, ma nai' Kora. Nai' Esau in aanh ein ok-oke', nahoni' sin anbin pah Kana'an.
6 Neot es, nai' Esau nfoo' neu pah es a'teta', na'roo na'ko nai' Yakop. In neik in fee-anah, ameupt ein, mu'it ma 'mui'f ein ok-oke'. 7 Nai' Esau nbaits on nok in orif nai' Yakop, natuin sin mui't ein namfaun, ma sin a'mu'ik bian, amfaun ii kah. Onaim sin naheun bare naan een. 8 Etun nai' Esau (es re' nai' Edom), annao natua nbi baer ma'toe'f ein et Seir.
9 Nai' Esau in sufan-kau'n ein, re' sin nteek nain je mnak, ‘atoin Edomas’, esan re' ia: sin natuan nbin baer ma'toe'f ein et Seir.
10-13 Nai' Esau in fee bi Ada, nahoni' ri'aan moen jes, kaann ee nai' Elifas. Nai' Elifas in aan moen ein tuaf niim, esan re': nai' Teman, nai' Omar, nai' Sefo, nai' Gatam ma nai' Kenas. Nai' Elifas anmui' fee pana', kaann ee bi Timna. In nahoni' ri'aan moen jes, kaann ee nai' Amalek.
Nai' Esau in fee bi Basmat nahoni' ri'aan moen jes, kaann ee nai' Rehuel. Nai' Rehuel nahoni' aan mone haa, esan re': nai' Nahat, nai' Sera, nai' Sama, ma nai' Misa.
14 Nai' Esau in fee bi Ohoribama, re' nai' Anah in aan feto, ma re' nai' Sibeon in upuf naan, nahoni' ri'aan mone teun, esan re': nai' Yeus, nai' Yaram, ma nai' Kora.
15-16 Nai' Esau in sufan-kau'n ein anbaits ok amfaun ma njarin uuf-uuf. Es-es ate nok kuun sin a'naak uuf. Nai' Esau in aan moen unu nai' Elifas aanh ein, njarin a'nakat neu uuf Teman, a'nakat neu uuf Omar, a'nakat neu uuf Sefo, a'nakat neu uuf Kenas, a'nakat neu uuf Kora, a'nakat neu uuf Gatam, ma a'nakat neu uuf Amalek. Sin aar sin re' naan, nai' Esau nok in fee bi Ada sin suufk ein.
17 Nai' Esau in anah nai' Rehuel in aanh ein anjarin a'nakat neu uuf Nahat, a'nakat neu uuf Sera, a'nakat neu uuf Sama, ma a'nakat neu uuf Misa. Sin aar sin re' naan, nai' Esau nok in fee bi Basmat sin suufk ein.
18 Nai' Esau nok in fee bi Ohoribama sin aanh ein, anjarin a'nakat neu uuf Yeus, a'nakat neu uuf Yaram, ma a'nakat neu uuf Kora.
19 Uuf ein re' naan ok-oke', nai' Esau in sufan-ka'un sin.
Nai' Seir in sufan-ka'un
20-21 Anbi bare naan amsa', anmui' naan atoin Horis es, in kaann ee nai' Seir. In aanh ein anbaits ok anjarin uuf-uuf amfaun, es-es ate nok in a'nakat. Rarit in aanh ein anjarin a'nakat neu uuf Rotan, a'nakat neu uuf Sobar, a'nakat neu uuf Sibeon, a'nakat neu uuf Anah, a'nakat neu uuf Dison, a'nakat neu uuf Eser, ma a'nakat neu uuf Disan.
22 Nai' Rotan in aanh ein, esan re' nai' Hori, ma nai' Heman (nai' Rotan in feotf ee es re' bi Timna).
23 Nai' Sobar in aanh ein, esan re': nai' Arwan, nai' Manahat, nai' Ebal, nai' Sefo, ma nai' Onam.
24 Nai' Sibeon in aanh ein, esan re': nai' Aya, ma nai' Anah. Nai' Anah in es re' niit oe maat maputu' nbi baer ruman oras in natuuk in aamf ee bikaes keledai nggwin.
25-26 Nai' Anah in aan feot gwe, es re', bi Ohoribama. Ma in aan moen je, es re' nai' Dison. Nai' Dison in aanh ein, esan re': nai' Hemdan, nai' Esban, nai' Yitran, ma nai' Keran.
27 Nai' Eser in aanh ein, esan re': nai' Birhan, nai' Sa'aban, ma nai' Akan.
28 Nai' Disan in aanh ein esan re': nai' Us ma nai' Aran.
29-30 Onaim a'naak uuf ein atoin Horis sin, esan re': nai' Rotan, nai' Sobar, nai' Sibeon, nai' Anah, nai' Dison, nai' Eser, ma nai' Disan. Sin aar sin natuan nbin pah Seir.
Pah Edom in uisf ein
31 Oras pah Isra'el ka nmui' fa usif fa fe'e te, anbi pah Edom anmu'i nrair usif. Sin kaank ein anmaktun-tuin ein, esan re':
32 Sin nait nai' Beor in anah nai' Bera, njair usif nbi kota Dinhaba.
33 Oras nai' Bera nmaet, nai' Yobap anseun ee njair usif. In aamf ee, kaann ee nai' Sera na'ko kuan Bosra.
34 Oras nai' Yobap anmaet, nai' Husam anseun ee njair usif. Nai' Husam naan, na'ko atoin Temanas sin pah.
35 Oras nai' Husam anmaet, nai' Hadat anseun ee njair usif. In aamf ee, kaann ee nai' Bedat na'ko kuan Abit. (In re' naan, es re' niis atoin Midianas sin, oras sin nmakenan nbin pah Moap.)
36 Oras nai' Hadat anmaet, nai' Samra anseun ee njair usif. Nai' Samra naan, na'ko kuan Masreka.
37 Oras nai' Samra nmaet, nai' Saul anseun ee njair usif. Nai' Saul naan na'ko kuan Rehobot et noe je panin.
38 Oras nai' Saul anmaet, nai' Ba'al-Hanan anseun ee njair usif. In aamf ee, kaann ee nai' Akbor.
39 Oras nai' Ba'al-Hanan anmaet, nai' Hadar anseun ee njair usif. Nai' Hadar naan, na'ko kuan Pau. In fee je, kaann ee bi Mehetabel. Bi Mehetabel in aamf ee, kaann ee nai' Matret. Ma in nai'f ee, kaann ee nai' Mesahap.
40-43 Onaim a'naak uuf ein re' npoin ma nboran na'kon nai' Esau in suufk ein esan re': nai' Timna, nai' Arwa, nai' Yetet, nai' Ohoribama, nai' Era, nai' Pinon, nai' Kenas, nai' Teman, nai' Mipsar, nai' Magdiel, ma nai' Iram. Sin es-es ate, nakanab sin pah anpaek kuuk sin kaank ein.
Onaim sin re' naan ok-oke', nai' Esau in sufan-ka'un. Nai' Esau njair aam uuf neu atoin Edomas sin.