Nai' Yakop sin naenan neu Betel
35
Rarit Uisneno na'uab nok nai' Yakop am nak, “Au re' ia, Uisneno re' nakriir On neu ko, oras ho maen mu'ko ho tata' nai' Esau. Oras ia, ho mfoo' nai mu'ko bare ia meu Betel. Amtea nee te, ambaik mei fuat ma mfee fua'-turu' meu Kau. Rarit ho mutua mubaar ambi naan nai.”2-3 Rarit nai' Yakop na'uab nok in uim je naan ee ok-oke' mnak, “Oras ia, hit he tnao teu Betel. Unu' te, oras au 'bi susat nana'renat, Uisneno nturun kau nbi nee. Au he 'moe' mei fuat a'bi bare naan. Onaim oras ia, hi mait imporin hi faut-fuat re' maruun ein oke'. Mikninu' hi tuam, ma mseka' hi baer paken, natuin hit he ta'ruri' ma ta'bees teu Uisneno.” 4 Onaim sin nnona' sin faut-fuat re' maruun ein ma sin faorn ein amsa'.a Rarit nai' Yakop antoup sin ma nsuub sin nbi hau kou' gwes in uun, anpaumaak kuan Sikem. 5 Oras nai' Yakop sin nnaon nasaitan Sikem, Uisneno nfee rasi mtaus neu too pah anfuun am nateef, tar antea sin ka nabranin fa he ntaon rais re'uf neu nai' Yakop sin.
6 Onaim nai' Yakop nok in too pukan naan, antean nok mamut anbin Betel et pah Kana'an. (Betel naan, unu' fe'e te, in kaann ee, Lus.) 7 Anbi naan, nai' Yakop anbaik fatu njair mei fuat. Rarit in nakanab bare naan nak El Betel (re' in oetn ii nak, ‘Betel in Uisneno’), natuin unu' te Uisneno nakriir On neu nai' Yakop anbi naan, oras in naen nasaitan in tataf.
8 Anpaumaak kuan Betel, anmui' hau uu' kou' gwes re' atoni' nakaanb ee, Aron Bakut. In a'moufn ii nak, ‘hau me'-me'ur’. In napein kanaf naan, natuin oras bi Ripka in bifee atitus, es re' bi Debora nmaet, sin nsuub ee nbi hau naan in uun.
9 Neon gwes ii, oras nai' Yakop anfain neem na'ko Padan Aram, Uisneno nakriir On antein, ma nfee ne tetus-athoen. 10 Uisneno na'uab am nak, “Anmurai oras ia, ho kaanm aan ka nai' Yakop antein fa gwen. Mes Au ukanab ko 'eik kaan fe'u es, es re' Isra'el.b 11 Au re' ia, Uisneno re' Akuaas Re'uf. Onaim ho muhoni' ma musuuf amfa-faun. Uuf-uuf ma pah-pah of anpoin ma nboran na'kon ho sufam ma ho ka'um sin. Ma ho of muhoni' maan usif-usif amsa'. 12 Pah re' nahunu te Au 'fee je 'eu ho na'i nai' Abraham ma ho ama' nai' Isak naan, oras ia Au 'fee ko gwe, ma ho sufam-ka'um sin.”
13-14 Uisneno na'uab anrair on naan ate, nai' Yakop nahake' fatu nbi naan, he njair tanar he namnau Uisneno In rais manba'an. Rarit in n'oop tua min-kase, ma mina' anbi fatu naan, ma n'onen neu Uisneno. 15 In nakanab bare naan, Betel.
Nai' Yakop in fee bi Rahel anmaet oras nahoni'
16 Rarit nai' Yakop sin annaon nasaitan Betel. Oras sin he noi nhaumaak kuan Efrata (es re' Betlehem), antea in oors aa gwen he bi Rahel nahoni'. Mes in nahoni' nok susat. 17 Oras in nakes-kees fe', bifee atuis ee natoon ee mnak, “Ain Rahel! Amha'tain ho neek maan. Ho aanh ii mone!” 18 Oras bi Rahel he noi natfeek, in nakanab ri'ana' naan, nai' Ben-Oni (re' in a'moufn ii, ‘ri'ana' na'ko au susat-nana'renat’). Rarit in natfeek. Mes nai' Yakop nakanab ri'ana' naan, nai' Benjamin (re' in oetn ii nak, ‘ri'ana' nbi au 'nimak a'ne'u’).
19 Rarit sin nsuub bi Rahel nbi ranan re' he tnao teu Efrata in ninin, (re' oras ia in kaann ee, Betlehem). 20 Rarit nai' Yakop nahake' faut natef es anbi naan. Bi Rahel in faut natef naan, et na fe', tar antea oras ia.
Nai' Yakop in aanh ein
21 Rarit nai' Yakopc nanani' bare piut-piut. Neot es, in nahake' tenas anbi tobe baik ma'nopo' Eder in aon bian. 22 Oras sin nbin naan ate, nai' Ruben antuup nok in aamf ee in fee pana' bi Bilha. Nai' Yakop nahiin rasi naan.
Nai' Yakop in aan moen ein, tuaf bo'es am nua.
23 Bi Lea in aanh ein esan re': nai' Ruben (nai' Yakop in aan moen unu), nai' Simeon, nai' Lewi, nai' Yahuda, nai' Isaskar, ma nai' Sebulon.
24 Bi Rahel in aanh ein esan re': nai' Yusuf ma nai' Benjamin.
25 Bi Rahel in ate bi Bilha in aanh ein esan re': nai' Dan ma nai' Naftali.
26 Rarit bi Lea in ate bi Silpa in aanh ein esan re': nai' Gat ma nai' Aser.
Nahonis ri'aan ein naan anbin Padan Aram.
Nai' Yakop in amaf nai' Isak anmaet
27 Rarit nai' Yakop nnao nmakius in amaf nai' Isak anbi Mamre anpaumaak kuan Kiryat-Arba (kuan naan, oras ia, in kaann ee, Hebron). Unu' te, in na'if nai' Abraham natua nbi bare naan amsa'. 28-29 Nai' Isak anmoin naan toon nautn es bo' fanu te (180), na' in nmaet. Rarit in anah nai' Esau ma nai' Yakop, ansuub ee.