Nai' Sikem ankoin bi Dina nok a'seke'
34
Neot es, bi Dina, re' nai' Yakop ma in fee bi Lea sin aan feto, annao nmakius nok ri' feot muinf ein bare naan. 2 Anbi pah naan, in uisf ee, kaann ee nai' Hemor, na'ko uuf Hebis. In aan moen je, kaann ee nai' Sikem. Neot es, nai' Sikem niit bi Dina. Onaim in nheek je, rarit in nkoin je nok a'seke'. 3 Nai' Sikem antaam nekan bi Dina. Onaim nai' Sikem ankopo' bi Dina, he karu reko te, bi Dina nroim natuin. 4 Rarit nai' Sikem na'uab neu in aamf ee mnak, “Aam! Reko te, ho mtaman mtoit bi Dina, he au 'sao.”5 Oras Nai' Yakop anneen nak anmui' atoin es ankoin in aan feto nok a'seke', in ntaa'-taa' kuun, ma ka nmoe' fa saa'-saa'. Natuin oras naan, in aan moen ein natukun mu'it anbin amnera' huun. Onaim in npao sin tar sin nfain neman ok-oke'.
6 Oras naan, nai' Sikem in amaf nai' Hemor, neem neu nai' Yakop, he ntaam antoit bi Dina. 7 Oras sin nua sin na'uab ein ate, nai' Yakop in aan moen ein, anfain neman na'kon amnera' huun. Onaim oras sin nnenan nak nai' Sikem ankoin sin feotf ee nok a'seke' te, sin neek ein namenan, ma sin nato'on mates. Rarit sin na'uab ein am nak, “Rasi on re' naan, ka nabei' fa he njari nbi pah Isra'el! Onaim ka nabei' fa he hit tkonan moe' re'uf on re' naan.”
8 Onaim nai' Hemor nfuri' nai' Yakop am nak, “Aam Ako! Batuur, au anah nai' Sikem antaam nekan ho aan feto bi Dina. In nroim he nsao. Onaim au 'toit ko henati' karu reko te, mfee kai ho anah bi Dina he au anah nai' Sikem ansao. 9 Karu reko te, hit aanh ein anmatsaon. Hi aan moen ii, ansao hai aan feton. Ma hai aan moen ein, ansao hi aan feton. 10 Maut he hi mitua mibua mok kai msa' ambi re' ia. Hi mroim kiim he mitua mbi mee-mee jah. Rarit hi mrakan, ma mipeni 'mu'if ambi ia.”
11-12 Rarit nai' Sikem na'uab nok bi Dina in amaf, ma in naof ein am nak, “Hi mtoit saa'-saa' aah, au utuin ki. Hi he mtoit roit he utai ufani' bi Dina, ma noni fak-fauk aah, au 'baen! Asar hi mroim he au 'sao hi feto'.”
13 Mes nai' Yakop in aan moen ein nahini nrarin nak nai' Sikem nkoin bi Dina nok a'seke'. Onaim sin na'uab anroro' nai' Sikem ma in amaf nai' Hemor. 14 Sin natahan am nak, “Ka nabei' fa he hai misaob hai feto' nok atoni' re' ka ma'heri' fa! Rasi naan, antao namaeb kai! 15 Mes in raan a'poi' ji on nai. Hi atoni' bare ia, et ana'-ko'u, ro he mi'heri' on re' hai. 16 Karu hi mmoe' on naan ate, na' hit matsao bian am bian. Ma hai of mitua mibua mok ki msa' ambi ia, he hit aar kit atjair on re' pah mese'. 17 Mes karu hi ka mmoe' mituin fa hai roim ein, ma ka mroim fa he mi'heri' te, hai mtoup mifani' hai feto', rarit hai mnao misaitan bare ia.”
18 Nai' Hemor ma nai' Sikem antoup sin uabk ein naan nok reko. 19 Mes nai' Sikem ka nsabaar naan fa in tuan, natuin in ntaam nekan bi Dina. Amneon ii, abitan pah naan anhormaat nai' Sikem. 20 Onaim nai' Hemor ma nai' Sikem annaon neun bare feek rasi kuan naan, et eno' he ttaam teu kuan, ma nabuan am na'uab ein nok abitan pah naan. Sin na'uab ein am nak, 21 “Aok-bian aar ki! Atoin Israelas sin re' ia anromin he nmonin nabu-buan nok kit anbin mamut. Onaim maut he sin natuan nok kit nbin hit pah re' ia. Hit pah re' ia seor mainuan neu kit ok-oke'. Hit aan moen ein bisa nsao sin aan feton. Ma sin aan moen ein msa' bisa nsao hit aan feton. 22 Sin suma ntotin rais aan'-aan' es na'ko kit. Rasi naan es re', hit ar-arkit atoni' et ana'-ko'u, mnasif-mainuki' ro he ta'heri' on re' sin. 23 Karu hit tmoin tabu-bua tok sin, sin mui't ein, ma sin a'mui'k ein ok-oke' anjarin hit pusaak ein amsa', ai'? Onaim reko nneis hit ttoup sin haan totis naan. Iim he ar-arkit ta'heri' ok-oke'! On mee? Hi mromi, oo?”
24 Rarit atoin ein re' nabuan nbin naan, nroim natuin nai' Hemor ma nai' Sikem sin uabk ein naan. Onaim atoin ein bare re' naan, sin na'heir ein ok-oke'.
25 Neno tenu te, oras sin npaap ein fe' namenan, bi Dina in naof nai' Simeon ma nai' Lewi, nait neik sin suin ein ma ntaman amninu'-mninu' neu kuan naan. Onaim sin nroor niis atoin ein naan oke'. 26 Nai' Hemor ma nai' Sikem amsa', sin nroor sin. Rarit sin nok nafani' sin fetof bi Dina na'ko nai' Sikem in umi, ma nfanin neun sin umi.
27 Rarit nai' Yakop in anah bian sin, antaman neun pah naan, ma nasiik neik pah naan in afan. Sin nato'on, natuin anmui' tuaf ankoin sin feotf ee nok a'seke' nbi bare naan. 28 Sin nasiik neik biak ein sin baer' ein oke' na'kon sin uimn ein naank ein. Ma sin napoo' neik biak ein sin mui't ein amsa' na'kon amnera' huun. 29 Sin nheek neik bifee nggwin, ri'aan ein, ma nasiik pah naan in baer ma'oos ein ok-oke'.
30 Oras nai' Yakop nahiin rasi naan ate, in na'uab neu nai' Simeon am nai' Lewi mnak, “Nansaa' am es hi mtao maan kit rais re'uf ia? Hi misusab kau! Of abitan Kana'an, abitan Peris, ma are' abitan pah re' ia, nato'on niis kau. Sin nmu'in tuaf amfaun. Hit suma fua' fauk aah. Karu sin neman nbaan kit ate, hit tre'u tkoon.”
31 Mes sin natahan nok haan to'os am nak, “Aam! Ho mutenab ate, mak ai' hai he mkonan sin he nmoe' hai feto' on re' bifee a'hake', aa oo?”