Nai' Yakop nateef in tataf nai' Esau
33
Neno naan, nai' Yakop niit nai' Esau neem neik atoni' tuaf natun haa. Rarit in nbait in aanh ein es-es ate nok sin ainaf. 2 In nahunub in aten re' in pana' sin naan nok sin aanh ein antoman maat. Rarit bi Lea nok in aanh ein, na' nbi muin ii te, bi Rahel nok in anah nai' Yusuf. 3 Mes nai' Yakop annao nahun-hunu nbi maat. Oras he noi npaumaak in taatf ee te, in nri'tuu ma na'bees nafan-fain no hiut.4 Mes oras nai' Esau niit in orif nai' Yakop, in nan-naen aah he nateef ee. Rarit in nhoo ma nneek ee suuk a'roo. Ma sin nua sin ankaen npin-piuns ein. 5 Oras nai' Esau niit bifeen naan ma ri'aan ein naan ate, in nataan am nak, “Tuaf amfa-faun ia, sekau nggwin aa?”
Onaim nai' Yakop nataah am nak, “Sin re' ia, tuaf ein re' Uisneno nfee sin neu ho ate kau.”
6 Rarit in fee paan ein naan, ma sin aanh ein neman ma na'besan neun nai' Esau. 7 Rarit bi Lea nok in aanh ein neman ma na'besan neun nai' Esau. Namuni te, nai' Yusuf nok in ainaf bi Rahel neman ma na'besan neun nai' Esau.
8 Rarit nai' Esau nataan am nak, “Pukan ahuunt ein re' ho mreek sin neun nahuun am neikin mu'it naan, ho sairt ii saa'?”
Rarit nai' Yakop nataah am nak, “On nai, taat! Au 'fee ko sin ruum-ruum, henati' ho mtoup kau nok neek mainuan ma marine.”
9 Mes nai' Esau nataah ee mnak, “Ako! Au 'mui'k ein amfaun amsa'. Onaim kais amfee kau saa'-saa'.”
10 Rarit nai' Yakop nataah am nak, “Taat honi', kais mutenab on naan. Ho ro he mtoup sin, he njair tanar nak, ho mtoup kau nok 'nima' nua. Natuin oras au 'iit ko mkumain fe'e na, on re' au 'iit Uisneno nkumain. 11 Onaim au 'toit ko taat honi', maut he ho mtoup au 'ook-soun ein naan, natuin baer' ein naan sin ka ma'oos ein fa. Uisneno nneek niis kau, es na' In nfee kau are' saa'-saa', natuin au 'perluut ein.” Nai' Yakop anfuri' in tataf nai' Esau, tar antea in nroim. Onaim nai' Esau ntoup ook-soun ein naan.
12 Rarit nai' Esau na'uab am nak, “Karu on naan ate, hi mibarab he tnao nai! Au of a'nao 'aat ki.”
13 Mes nai' Yakop nataah am nak, “Anbain kuun, taat. Amkius kuum. Ri'aan ein fe' ba-baun ein. Onaim sin ka neu he nnaon fa rab-raab. Mu'it bian fe' nahoin ein. Karu hit takseke' sin he nnaon rab-raab neno mees ahaa te, mui't ein ia of anmaten oke'. 14 Onaim reko nneis, ho muhuun. Hai mnao kre'o-kre'o ma mituin ki ambi hi kotim. Au of 'uum he 'makius ko on Seir.”
15 Rarit nai' Esau na'uab antein am nak, “Karu on naan ate, au umaika' au ameput bian he nok ko, he sin njarin maat ranan neu ki.”
Mes nai' Yakop nataah am nak, “Kais muhaeb om! Asar au uhini 'rair 'ak ho mtoup kau gwen.”
16 Anneen on naan ate, nai' Esau nnao nasaitan sin, he nfain neu Seir. 17 Mes na'ko bare naan ate, nai' Yakop annao neu Sukot. Anbi naan, in nmoe' umi, ma nmoe' o'of neu in mui't ein ok-oke'. Etun sin nakanab bare naan, Sukot (re' in oetn ii nak, ‘umi re' he natuan ntaah ein’).
18 Onaim nai' Yakop sin ntean nok ao-mina' neun kuan Sikem et pah Kana'an, na'kon Padan Aram. Rarit sin paasn ein tenas, ma natuan npaumak-maak kuan naan. 19 Afu re' sin natuan re' naan, nai' Yakop ansoos nafeek ee na'ko nai' Hemor, nai' Sikem in amaf. In nbaen ee neik roi muti' fua' nautn es. 20 Anbi naan, in nbaik fatu he nmoe' mei fuat. Rarit in nakanab bare naan, El-Elohe-Isra'el (re' in a'moufn ii, ‘Uisneno naan, Isra'el in Uisneno’).