Nai' Yakop namtau neu he nateef nok in tataf nai' Esau
32
Rarit nai' Yakop sin nnaon nkonon. Onaim Uisneno In ameupt ein na'kon neno tunan neman ma nateef nok ne. 2 Oras niit sin on naan ate, in na'uab am nak, “Re' bare ia, Uisneno In soraurs ein bare snasat!” Etun sin nakanab bare naan, Mahanaim, (re' in a'moufn ii nak ‘bare snasat mana' nua’).3 Rarit nai' Yakop anreun in ameput tuaf fauk nnaon nahunun neun pah Edom (es re' Seir), he nfee hanaf neu in tataf nai' Esau, nak in he neem. 4 Nai' Yakop na'uab neu in ameupt ein naan am nak, “Hi mnao meik hanaf meu au tata' nai' Esau mmak, ‘Aam Esau! Ho ate nai' Yakop kau a'sonu' haan buseet ma hormaat 'eu ko, tua. Na'ko afi unu' tar antea oras ia, ho ate kau, utua 'bi hit baab mone nai' Laban in umi. 5 Oras ia, ho ate kau gwi, a'mui' bijae, bikaes keledai, 'bibi, ma 'bib-kase. Au 'mui' ate msa', et atoni' ma bifee. Au 'reek tuaf ein re' ia, he neik ko hanaf, nak au he 'uum. Au ufnekan a'bi au nekak, henati' ho mtoup kau 'nima' nua, tua.’” Onaim tuaf ein naan annaon.
6 Oras sin nfain neman neun nai' Yakop, sin neikin hanaf am nak, “Hai mnao miteef amrair mok ho tata' nai' Esau. Oras ia in neem ma nok tuaf natun haa, he nateef nok ko, tua.”
7 Anneen on naan ate, nai' Yakop in ansaon ee tepo-tepo, ma in namtau nmaet. Rarit in nbait in ameupt ein ma mui't ein ok-oke', anjarin pukan nua. 8 In natenab am nak, “Karu nai' Esau neem ma nbaan pukan ahuunt ee, pukan amuint ee naenan he napenin fetin.”
9 Rarit nai' Yakop an'onen am nak, “Koi, Uisneno! Usi' re' au na'i nai' Abraham ma au ama' nai' Isak na'ruri' ma na'bees neu Ko! Amneen maan kau fe', tua. Uisneno, neon gwes ii, Ho es re' amreek kau he 'fain 'uum 'eu au umi ma au nonot-asar, 'bi pah re' ia. Ho es re' amba'an kau mmak, Ho of am'ator he mureko' sin ok-oke'. 10 Au re' ia, atoin ka maso'ik fa, mes Ho manekam meu kau nabar-baar. Unu' te, oras au 'raak noe Yarden re' ia, au 'eiki haa teas. Mes oras ia, au 'fain 'uum 'eik tuaf pukan nua ma mu'it amsa'. 11 Au umtau, kais-kaisa' au tata' nai' Esau neem ma nbaan niis kai. Onaim au 'toit Ko Usi' he mufetin maan kai na'ko nai' Esau in a'niman. Hai aar kai es re': au, ma au fee-anah sin, ma au ate sin ok-oke'. 12 Usi', Ho es amba'an mak, Ho es re' mfee kau tetus anho-hoen, ma mfee kau sufa'-ka'uf on re' snaen ein et tais je ninin, re' biak ein ka nsoik nabei' sin fa, tua.”
13 Rarit nai' Yakop antuup anbi bare naan. Noka' on naan ate, in nabarab mu'it he n'ook-soun sin neun in tataf. 14 In npiir naan a'bib ainaf natun nua, 'bib keso bo' nua, 'bib-kaes ainaf natun nua, 'bib-kaes keso bo' nua, 15 bikaes unta ainaf bo' teun re' nasuus ein fe', bijae ainaf bo' haa, bijae keso bo'es, bikaes keledai ainaf bo' nua, ma bikaes keledai mone bo'es. 16 Rarit, in nbait mui't ein naan, huum es ate neu puukn es. In nfee pukan es ate nok in atukus. In natonan sin am nak, “Hi mnao mihuun. Au utuin ki 'bi hi kotim. Hi mnao, mes pukan es nok pukan es ate sero mmaka'roon.”
17 Rarit nai' Yakop naprenat a'nakat neu pukan ahuunt ee mnak, “Karu au tata' nai' Esau nateef nok ko, ma in nataan am nak, ‘Ho he mnao on mee? Sekau in ameupt ee, es re' ho? Mui't ein re' ia, sekau iin na?’ 18 Ho mutaah am mak, ‘Mui't ein re' ia, ho ate nai' Yakop iin na, tua. In nsonu' sin neu in tataf, aam usi' nai' Esau. In et re' munin.’” 19-20 In naprenat on re' naan amsa' neu atukus pukan bian am nak, “Karu hi miteef mok au tata' nai' Esau, hi mnoon ee mui't ein re' ia. Rarit hi mitoon ee mak, au et re' munin.” Nai' Yakop natenab am nak, karu in nfee mui't ein re' naan ok-oke' te, nai' Esau of neekn ee nsesuum ma nmuni'. 21 Onaim in nsonu' mui't ein naan nahunun. Mes mabe' naan, in ntuup nabaar anbi naan.
Nai' Yakop nok Uisneno anmaboon ein
22 Mabe' naan, nai' Yakop anfeen ma n'ator in fee nggwin nua sin, in aten re' in npana' sin, ma in aanh ein bo'es am mese', he sin nnaon nrakan neun noe Yabok in panin. 23 Oras sin aar sin antean noe naan in panin, in nsonu' in pusaak ein ok-oke' neun ne.
24 Mes nai' Yakop namaik anmees anbi noe je panin. Rarit atoin es neem. Atoni' naan nok nai' Yakop anmaboon ein anbi naan, tar antea neis noi nmeu. 25 Oras atoni' naan annaben nak, nai' Yakop he niis ee jen ate, in ntuuf nai' Yakop in a'bokon, tar antea in nuin pusun uun ne natposi' npoi na'ko in tarun. 26 Onaim atoni' naan na'uab am nak, “Mufeti' kau. Kreo' gwes te maans ee he npee' jen.”
Mes nai' Yakop nataah am nak, “Ho mu'uab amfee kau tetus fe', na' au ufeti' ko.”
27 Onaim atoni' naan, nataan ee mnak, “Ho kaanm aan sekau?”
In nataah am nak, “Nai' Yakop.”
28 Rarit atoni' naan na'uab am nak, “Ho kanam naan, ka nai' Yakop fa heen. Mes anmurai oras ia, atoni' anteek ko nak, nai' Isra'el (re' in a'moufn ii, ‘nmabonan nok Uisneno’), natuin ho mmabonan ma'tani' mok mansian ma mok Uisneno, tar antea ho miis.”
29 Onaim nai' Yakop nataan am nak, “Ho kaanm aan sekau?”
Mes atoni' naan nataah am nak, “Ho he mutaan au kaank ii he saa'?” Rarit in na'uab anfee tetus neu nai' Yakop anbi naan.
30 Onaim nai' Yakop na'uab am nak, “Au 'iit a'rair Uisneno humaf nok humaf, mes au 'moin fe'.” Natuin rasi naan ate, in nakanab bare naan, Peni'el (re' in oetn ii, ‘Uisneno In human’).