Nai' Yakop naen nasaitan nai' Laban
31
Neot es, nai' Yakop anneen niit nai' Laban in aanh ein na'uab ein am nak, “Oras ia, nai' Yakop anmui' batuur-batuur oo! In na'susu' niis hit ama' in a'mu'in.” 2 Onaim nai' Yakop ankius in aam baabf ee huumn ee te namet-meot gon, ma ka on fa re' nati' he reko.3 Rarit UISNENO na'uab nok nai' Yakop am nak, “Antean in oors aa gwen, es re' ia. Onaim ho ro he mfain nai meu ho aina'-ama' sin. Au of 'ok ko.”
4 Rarit nai' Yakop anreun no'en bi Rahel ma bi Lea, he neman ma nateef nok ne nbi mnera' huun, re' sin mui't ein baark ein. 5 Rarit in na'uab neu sin am nak, “Muni' ia, au 'kius hi ama' te, huumn ee meto'-meto' neu kau. Ma in ka nkisu ntoom kau fa msa' on re' nati'-nati'. Mes Uisneno, re' au ama' na'bees neu Na ji, nok kau. 6 Hi nua ki mihiin, a'roo-'roo re' ia, au 'meup ma'tani' 'eu hi ama'! 7 Mes maski on naan amsa', in napoi kau fani-fani. In na'bani' au baen seba' no bo'es een. Maski on naan amsa', Uisneno npafa' ma npanat kau. 8 Oras hi ama' na'uab am nak, ‘Mui' ma'koto' sin anjarin ho baen puse-haet,’ mui't ein nahoin ein aan ma'koto' oke'. In nmoe' on naan neu kau fani-fani. 9 Uisneno nmoe' on naan, he In nait hi ama' in mui't ein ma nfee kau sin.
10 Neot es, oras mui't ein naan antotin he na'tein' ein ate, au umnei mnak, are' keosn ein oke' re' na'tein' ein naan, nmui' ma'koto'. 11 Rarit Uisneno In ameput na'ko neno tunan, anhaman kau nbi mneit am nak, ‘Yakop!’
Rarit au utaah am 'ak, ‘On mee, tua?’
12 Onaim in natoon kau mnak, ‘Amkius fe'! Are' keson re' na'tein' ein ia, suma nmu'i haa ma'koto'. Au 'ator on naan, natuin Au 'iit are' saa'-saa' re' nai' Laban anmoe' sin neu ko. 13 Au re' ia, Uisneno re' nakriir On neu ko nbi Betel. Anbi nee, ho muhake' fatu, rarit am'oop mina', ma m'onen meu Kau. Rarit ho muhake' rais manba'an mok Kau nbi nee. Oras ia, ho ro he mnao musaitan pah re' ia, ma mfain meu ho aina' ma ho ama' sin pah.’”
14 Rarit bi Rahel ma bi Lea natahan am nak, “Es re' ho. Hai mituin aah! Hai ka mmui' fa paa' ma nama' mtein mi'ko hai ama'. 15 A'roo-'roo re' ia, hai ama' in naan kai on re' atoin buti. In na'sosa' nrair kai. Rarit in npaek nonin naan. 16 Are' kanan a'mu'if re' Uisneno nait sin na'ko aam Laban naan, oras ia njair pusaak neu kit ma neu hit aanh ein. Onaim karu Uisneno nak on mee te, tatuin aah!”
17-18 Rarit nai' Yakop nmurai nakbua' in baer' ein. In nasaeb in fee-anah neu bikaes unta sin, ma napoo' neik in mui't ein ok-oke', ma nasaeb neik baer' ein re' in napein sin anbin Padan Aram, he nnaon neun pah Kana'an.
19 Oras naan, nai' Laban annao nkateer in 'bib-kaesn ein sin fuunk ein. Onaim bi Rahel nabaak neik in aamf ee in faut-fuat maruna'. 20 Nai' Yakop sin nfeen annaon mninu'-mninu'. Sin ka natonan fa in aam babaf. 21 In neik nain in a'mui'n ein ok-oke', rarit sin nnaon nok manapat ma nraak noe Efrat, onaim sin nnaon n'anin a'toe'f ein Gireat.
Nai' Laban anriu' natuin nai' Yakop
22 Anso'op neno teun on nai te, nai' Laban napein hanaf nak, nai' Yakop anfeen naen anrair. 23 Rarit nai' Laban no'en na'bua' iin na, ma sin nriu' natuin in aan moen feuf naan. Sin anriu' sin tar antea neno hiut, na' napein sin nbin a'toe'f ein Gireat.
24 Fain ite, Uisneno nakriir On neu nai' Laban anbi mneit. In na'uab am nak, “Laban! Nati' mpanat ho feef maan, oras ho mu'uab mok nai' Yakop.”
25 Mabe' naan, nai' Yakop nahake' nrair tenas nbi 'toe'f ein Gireat. Nai' Laban sin nahaek ein tenas amsa', ka na'roo fa na'ko bare naan.
26 Rarit nai' Laban neem nateef nok nai' Yakop. Onaim in na'uab am nak, “Yakop! Anmoe' on mee m'es ho maen meik au aan feotn ii mninu'-mninu'? Ho on re' meik tuaf re' ho mheek maan sin anbin makenat. 27 Airoo, ho maen amninu'-mninu'. Ho ka mpaek fa atoran a'kre'o he musee kau, go! Karu ho mutoon kau rek-reko te,a bait au 'fesat he useon ki eik marinet ma sakanat. 28 Ho saant es antein, ho ka mfee kau fa mainuan he au 'taeb ma 'neek aan au anah-upuf sin hena' au useon sin. Ho 'moe'm ii on re' amoont aan! 29 Au he 'sirakab ko te, rabah! Mes fini na, Uisneno, re' ho ama' na'bees neu Na ji, nakain kau mnak, karu au u'uab 'ok ko, au ro he 'panat au fefak. 30 Au uhiin 'ak ho mumnau ho kuan ee, he mfain. Mes nansaa' am es ho mubaak meik au faut-fuat re' maruun ein?”
31 Rarit nai' Yakop nataah am nak, “Aam, kais muto'on kau! Au 'fena 'nao mninu'-mninu' natuin au utiun gok, karu ho ka mroim fa he mkonan kau ri'aan ein he nok kau te, of on mee?” 32 Mes nai' Yakop ka nahiin fa neu in fee bi Rahel es nabaak neik faut-fuat re' maruun ein naan. Onaim in na'uab am nak, “Aam, re' faut-fuat maruun ein naan ate, ho maim kuum! Karu ho mupein sin anbin sekau te, mu'mate he. Ampukai hai brua' ein oke'! Karu mupein ho baer pusaak bian amsa' ate, mait mufani' sin. Maut he tuaf ein re' ia njarin saksii.”
33 Rarit nai' Laban anpoi ma ntaman sin teens ein mese'-mese'. Nahunun nai' Yakop in tenas. Rarit bi Lea. Rarit neu bi Bilha ma bi Silpa sin imsa'. Mes ka niit fa baer' ein naan. Namuni te, in ntaam neu bi Rahel in tenas. 34 Mes bi Rahel ankonob na'koro' faut-fuat maruun ein naan anbin a'pein bikaes unta. Rarit in ntook natau 'peni' naan. Nai' Laban nparikas bi Rahel in teens ee naan ne ok-oke', mes ka napein fa baer' ein naan.
35 Onaim bi Rahel na'uab nok in aamf ee mnak, “Aam honi', kais mutoo'. Au ka 'feen fa, tua, natuin au upein funan.” Onaim nai' Laban naim piut, mes ka niit fa faut-fuat maruun ein naan.
36 Nai' Yakop natoo' ma huumn ee npuut, onaim in naskarak in aam babaf nai' Laban am nak, “Au ureu' ho saa'? Tar ho mriu' mutuin kau, on re' au atoin aburarut kau. 37 Ho mpukai murair are' au baer' ein ok-oke'. Onaim ho mupein saa'? Mait meik je neem meu matan ia he hit ttiit ok-oke'. Maut he hit aok-bian sin re' ia, nafeek nitan nak bare' naan, sekau iin ja. 38 Toon bo' nua gwen au 'aetn ok a'bi ko. Oras au utuuk ho mui't ein naan, ka ti-tiit fa es he nropo'. Au ka 'tuun he 'euk 'iit fa mese' msa'. 39 Karu nmui' mui' fui na'maet ho mui't ein, au ka utoon ko fa, mes au 'seka' sin, tua. Karu nmui' tuaf nabaak naan ho nggwin, ho mreun kau he 'senu', maski au ka 'saan fa. 40 Man-mana te, maans ee nraar kau. Fa-fai te, au 'maniik tar u'ta'i 'maet. Au 'bee', ma ka 'tuup reko fa, natuin au 'panat ho mui't ein naan, tua. 41 Toon bo' nua naan namneo! Au 'meup toon bo'es am haa he 'sao ho aan feton. Rarit a'kuri 'tein toon nee, he 'heit. Au 'aetn ok a'roo-'roo re' naan, mes ho mubanit au baen seba' naan no bo'es. 42 Ken-kenu' te, anmui' Uisneno re' au na'i nai' Abraham ma au ama' nai' Isak na'besan neu Ne. Karu In ka npanat kau fa te, ho mri'u mrair kau, ma au 'feen a'nao ruum-ruum aah. Mes Uisneno ka nforon ma nkoson fa au susat. In niit kau neu au 'meup ma'tani'. Es na' fini na, In neem ma nakain ko, tua.”
Nai' Yakop ma nai' Laban nahaekb ein rais manba'an
43 Anneen nai' Yakop na'uab on naan ate, nai' Laban nataah am nak, “Henat on nai! Bifee nua' ein naan, au aanh ein. Ri'aan ein re' sin nahoni' sin naan, sin au upu' ok-oke'. Mui't ein re' ia, batuur au nggoa. Are' saa'-saa' re' ho miit sin nbin ia, au nggoa. Mes au he unsaa'? Au ka ubei' fa he 'tahan sin. 44 Onaim reko nneis hit nua kit tahakeb rais manba'an. Ma hit nua kit ro he tmoin tatuin hit rais manba'an naan.”
45 Rarit nai' Yakop nait faut kou' gwes, ma nahaekb ee nbi naan, he njair tanar. 46 Rarit nai' Yakop anreun in ameupt ein he nkaubuub ein fatu, ma ntupu' sin. Onaim sin ntokon ma nbukaen bu'-bua' mpaumaak fatun naan. 47 Onaim nai' Laban nakanab faut tunab naan am nak, Yegar Sahaduta. Mes nai' Yakop nakaanb ee, Galeet.b
48 Rarit nai' Laban na'uab am nak, “Faut tunab ia, njair tanar re' nsaksii hit rais manba'an.” Es naan ate, bare naan, in kaann ee, Galeet. 49 Nai' Laban nakanab bare naan amsa' nak, Mispa (re' he noi on re' kata bian re' in a'moufn ii ‘baer paot re' na'raat’), natuin in na'uab am nak, “UISNENO of neikn On ansuntiur kit, he maski hit nua kit atmaka'roon amsa', hit kais attanhai hit rais manba'an ia. 50 Karu ho mmoe' amre'ut meu au aanh ein ii, ai' amsao bifee sona', au of ka uhiin fa. Mes mumnau! Uisneno njair saksii neu hit nua kit. 51-52 Amkius miit faut ahaket ia, ma faut tuunb ein ia. Mumnau! Fatun re' ia amsa', njarin nakat. Ho ka mubei' fa he mtanhai fatun re' ia, he mmoe' amre'ut meu kau. Ma au on naan amsa'. 53 Hit tahake' rais manba'an ia, tpaek hit be'i-na'i sin Uisneno. Esan re' ho na'i nai' Abraham, ma au na'i nai' Nahor sin Uisneno. In of neikn On anjair Afeek Rasi neu hit rasin.”
Anneen anrair on naan ate, nai' Yakop ansuup anpaek kanaf Uisneno re' in amaf nai' Isak na'ruri' ma na'bees neu Ne.
54 Rarit nai' Yakop anroor mu'it, in nait neik sin siisk ein ma nafuat sin neun Uisneno nbin a'toe'f ein naan. Onaim in naskau tuaf ein re' anbin naan, ma sin nbukaen bu'-bua', ma nbe'en tar anmeu nfiin.
55 Kik-kiuk ana' on naan ate, nai' Laban nhoo ma nneek in anah-upuf sin ok-oke'. Rarit in na'uab anfeen sin tetus, ma ntebi nfain neu in pah.