2 Onaim nai' Yakop naskaar ee mnak, “Ho mak au Uisneno kau? Au ka 'moe' uhiin fa ri'ana' he 'fee ko.”

3 Rarit bi Rahel na'uab am nak, “On nai! Reko nneis ho mtuup mok au ate bi Bilha. Maut he on mee te, in nahoni' ri'ana' nfee kau.”

4 Rarit in nnona' bi Bilha neu in mone. Onaim nai' Yakop antuup nokan. 5 Rarit bi Bilha na'apu', ma in nahoni' ri'aan moen jes. 6 Onaim bi Rahel na'uab am nak, “Uisneno nneen au onen. Etun In nfee kau ri'aan moen jes. Uisneno nafeek nataib ahaa au rasi.” Onaim in nakanab ri'ana' naan nai' Dan (re' in a'moufn ii nak ‘afeek rasi’).

7 Rarit bi Bilha na'apu ntein, ma nahoni' ri'aan moen jes. 8 Onaim bi Rahel na'uab am nak, “Au 'ok au tata' mmari'un mahoint ii. Onaim au 'iis 'aan ee.” Etun in nakanab ri'ana' naan nai' Naftali (re' in a'moufn ii nak ‘anmari'un’).

9 Oras bi Lea nnaben nahiin neu in ka nahoni' fa heen, in nnona' bi Silpa he nai' Yakop ansao. 10 Rarit bi Silpa nahoni' ri'aan moen jes. 11 Rarit bi Lea na'uab am nak, “Au ua reko kau.” Onaim in nakanab ri'ana' naan nai' Gat (re' in a'moufn ii, nak ‘ua reko’).

12 Rarit bi Silpa nahoni' ntein ri'aan moen jes. 13 Onaim bi Lea na'uab am nak, “Hoe! Oras ia, na' au 'mariin! Amkius kiim, of bifeen gwin na'uab ein am nak, au 'iis mainenu'.” Etun in nakanab ri'ana' naan, nai' Aser (re' in a'moufn ii nak ‘marinet’).

14 Neot es, nateef oras amnonut, nai' Ruben annao nbi nasi. In napein hau re'u re' nturun tuaf he karu reko te nahoni'. Rarit in neik je neu in ainaf bi Lea. Ankius niit on naan ate, bi Rahel antoit bi Lea mnak, “Airoo, taat! Amfee maan kau re'u kre'o re' nai' Ruben neik je naan.”

15 Mes bi Lea nataah am nak, “Hoe! Ho bainesi' ko! Ho musiik amrair au mone. Ma oras ia, he musiik amtein re'u na'ko au anah. Ho ka mumaeb om fa, joo?”

Mes bi Rahel na'uab am nak, “On nai taat. Karu au upein re'u naan ate, mabe' ia ho mok hit mone.” Bi Lea nroim on naan.

16 Maans ee nmaeb on naan ate, nai' Yakop anfain neem na'ko rene. Onaim bi Lea nnao nateef nok ne, ma na'uab ee mnak, “Aam! Ho ro he mtuup mok kau mabe' ia! Natuin au 'baen a'rair ko 'eik au aanh ee in re'u.” Rarit mabe' naan, nai' Yakop antuup nok bi Lea.

17 Rarit Uisneno nneen bi Lea in onen. Onaim in na'apu', ma nahoni' ri'aan moen jes. Neot ia, in nahoni' no niim een. 18 Rarit bi Lea nakanab ri'ana' naan nai' Isaskar (re' in a'moufn ii nak ‘baena' haet’), natuin in na'uab am nak, “Uisneno nbaen anrair au haet, natuin au 'nona' 'rair bi Silpa he nsao au mone.”

19 Rarit bi Lea na'apu' ntein, ma nahoni' ri'aan moen jes. Re' ia, no nee jen. 20 In na'uab am nak, “Uisneno n'ook-soun kau. Onaim oras ia, au moen je ro he nhormaat kau, natuin au uhoni' 'rair ri'aan mone nee jen.” Etun in nakanab ri'ana' naan nai' Sebulon (re' in a'moufn ii nak ‘nfee hormaat’).

21 Rarit bi Lea nahoni' ri'aan feot gwes. Onaim in nakaanb ee, bi Dina.

22 Mes Uisneno namnau bi Rahel amsa', ma In nneen in onen totis. Etun In nfei bi Rahel in apun. 23 Onaim in na'apu' ma nahoni' ri'aan moen jes. In na'uab am nak, “Uisneno nait inporin au rais mae.” 24 Onaim in nakanab ri'ana' naan, nai' Yusuf (re' in a'moufn ii oni' nak ‘maut he in na'baba'’), natuin in na'uab am nak, “Au 'toit he Uisneno na'baba' kau ri'aan moen jes antein.”

25 Oras bi Rahel nahoni' nrair nai' Yusuf, nai' Yakop na'uab nok nai' Laban am nak, “Aam! Karu reko te, au 'fain 'eu alu pah ee fe'. 26 Maut he au 'eik au fee ma au aanh ein amsa'. Ho muhini mrair, au 'meup ma'tani' 'eu ko. Onaim au 'baen ufeek sin een. Natuin rasi naan, oras ia sin nfanin au nggoa jen.”

27 Rarit in aam baabf ee nataah am nak, “Ako! Ho mneen fe'. Au uketi' ma takseer a'soba'. Au 'iit a'rair, onaim au uhiin 'ak Uisneno npaek ko he nfee kau tetus-athoen. 28 Onaim oras ia ho mtoit fak-fauk aah. Au 'baen! Asar ho mutua mok kau mbi ia, ma mmepu mfee kau.”

29 Rarit nai' Yakop nataah am nak, “Aam, ho miit kuum, au mepun. Nok ranan naan, ho mui't ein na'baab ok piut. 30 Oras au ka 'uum fa fe'e te, ho 'mui'm ein ka mfaun fa fe'. Mes oras ia, ho atoin amu'it. Uisneno nfee ko tetus, natuin au mepuk. Oras ia, ntea in oors aa gwen he au 'meup 'eu au fee-anah sin.”

31 Rarit nai' Laban nataan am nak, “Reko. Onaim au he 'baen on mee 'eu ko?”

Nai' Yakop nataah am nak, “Aam, ho kais musuusb om he mfee kau saa'-saa'. Au of utuuk ukonob ho mui't ein, mes asar au 'moe' 'aan taos es. 32 Amfee kau mainuan, he neno ia au 'nao 'eu ho mui't ein. Au he 'piir 'aan a'bibi ma 'bib-kase re' ka ma'koto' fa. Sin re' naan, ho nggoa, tua. Mes re' ma'koot ein ee, au nggwin. Ma au 'heit are' 'bib-kaes metan amsa'. Maut he sin ok-oke' naan, anjarin baen neu au suus-haet.^a 33 Anbi neon amuint ate, of na' ho muhiin mak au neek ii kninu', ai' kaah? Oras mee-mee jah, ho uum he muprikas au mui't ein. Karu ho miit a'bibi re' ka ma'koto' fa, ai' 'bib-kase re' muti' te, ho muhiin mak au es re' ubaak 'aan ho nggoan.”

34 Rarit nai' Laban anroim natuin am nak, “On re' naan ate, reko.” 35 Mes anbi neno naan, nai' Laban anbatis a'bib-kasen re' ma'koto', ma a'bib-kasen re' metan. Rarit in nreun in aanh ein he natuuk mui't ein naan. 36 Rarit sin neik mui't ein naan annaon na'roon na'kon nai' Yakop, neu baer jes re' in a'roon ii tnao hae te neno teun fe'e te na' attea. Rarit nai' Yakop natuuk in aam baabf ee in a'bibin ma 'bib-kaes aneist ein naan fe'.

37 Rarit nai' Yakop ankeut naan hau-taef na'ko hau huma' teun. In nsapi ntui raan hau-taef ein naan. 38 In ntao hau-taef ein re' in ntui raan sin naan, anbin a'bai oe. Mui't ein naan nati' te anma'tein' ein nbin bare naan. 39 Onaim oras mui't ein naan anma'tein' ein npaumaak hau taef matui raanf ein naan ate, sin of nahoin ein ana' 'koto'.

40 Rarit karu nai' Laban in mui't ein esan re' he anma'tein' ein ate, nai' Yakop na'ekab sin neu a'bibi ai' a'bib-kase re' ma'koto'. Rarit sin nahoin ein aan ma'koto' msa'. Nok ranan naan, in mui't ein kuun na'baab ok piut. Rarit in nbetis sin na'kon nai' Laban iin ein. 41 Oras mu'it mee re' ma'tani' na'teni' te, nai' Yakop antao hau taef re' in nruun sin naan, antoom a'bai oe, re' nhaumaak sin maatk ein. 42 Mes karu in nkisu ma mu'it mee n'oer oras he na'teni' te, in ka ntao fa hau taef ein naan. Onaim nai' Laban in napein mui' makna'u ma a'oret. Mes nai' Yakop iin na ok-oke' esan re' apokat ma ma'tani'. 43 Nok ranan naan ate, nai' Yakop anjair atoin amu'it. In nmu'i 'bibi, 'bib-kase, bikaes unta, bikaes keledai, ma ate, re' mfaun ii kah een.