Nai' Yakop antea in babaf nai' Laban in umi
29
Rarit nai' Yakop annao nkono n'ain pasa' neon-saet. 2 In nna-nao te, in niit oe hain es npaumaak kuan es. Anpaumaak oe hani' naan, anmu'i 'bibi ma 'bib-kase, pukan teun, re' anpaon he napenin oe mninu'. Mes anmui' faut kou' gwes antoeb naan oe hani' naan. 3 Nati' te, karu mui't ein naan nabua nrarin ate, na' atuuks ein antitar na'roob fatu naan, rarit ankuin oe ma na' na'inu' sin. Ninu nrarin ate, sin ntoeb nafain' ee.4 Onaim nai' Yakop annao nataan atuuks ein naan am nak, “Hoore, tua! Hi mi'ko mee, tua?”
Sin natahan am nak, “Hai mi'ko kuan Haran, tua.”
5 Rarit nai' Yakop nataan antein am nak, “Hi mihiin au baba' nai' Laban, aa oo? In re' naan, nai' Nahor in anah.”
Onaim sin natahan am nak, “Hai mihiin je, tua.”
6 Nai' Yakop nataan piut am nak, “In n'ao-mina', oo?”
Sin natahan am nak, “A'naef ee et re' nee. In reko. Amkius. In aan feto bi Rahel napoo' neik in mui't ein neman he na'inu' sin anbin re' ia. Ho mpao mbi ia.”
7 Rarit nai' Yakop na'uab antein am nak, “Maans ee na'puup fe'. Onaim reko nneis mui't ein re' neem nabuan nrarin ia, hi mi'inu' sin nai. Rarit hi mipoo' meik sin he sin nekun huun.”
8 Mes sin npenan mates, nak, “Hoe, ka on fa naan! Hai ro he mpao atuuks ein neman ok-oke' neik sin mui't ein ntean ia fe'. Hena' hai mtitar fatu ne, he mi'inu' mui't ein naan.” 9 Nai' Yakop fe' na'ub-uab nok atoin ein naan ate, bi Rahel neem antea nok in aamf ee mui't ein. Nati' te, in natuuk mui't ein naan.
10 Oras nai' Yakop niit bi Rahel nok in a'bibin ma 'bib-kasen naan ate, in nnao ntitar nain faut tobef naan. Rarit in na'inu' in baabf ee in mui't ein. 11 Rarit in nneek bi Rahel, ma nkae. 12 Rarit in na'aub neu bi Rahel am nak, “Au re' ia, ho baab feto bi Ripka in anah.” Onaim bi Rahel naen anfain neu umi he natoon neu in amaf.
13 Oras nai' Laban anneen haan tonas nak nai' Yakop naan, in fetof bi Ripka anah, in naen anseun gwe. Oras sin natefan ate, nai' Laban nneek ma nhoo gwe. Rarit in nok ne neu in umi'. Onaim nai' Yakop nareta' are' saa'-saa' neu in babaf. 14a Onaim nai' Laban na'uab am nak, “Batuur! Hit nua kit umi nanan!”
Nai' Yakop ansao bi Lea ma bi Rahel
14b Oras nai' Yakop natua nok sin fuun es, 15 nai' Laban na'uab neu ne mnak, “Ako! Au ka 'roim fa he ho mmeup ruum-ruum meu kau, natuin hit nua kit umi nanan. Onaim ho mtoit fauk?”
16 Nai' Laban anmui' aan feto nua. Ahuunt ee, in kaann ee bi Lea. Amuint ee, in kaann ee bi Rahel. 17 Bi Lea in maat firo.a Mes bi Rahel in huumn ee mamasa', ma in aon ee msa' ro reko. 18 Nai' Yakop in ntaam nekan bi Rahel. Onaim in nataah nai' Laban am nak, “Au 'mepu 'fee ko toon hiut, asar ho mroim he au 'sao bi Rahel.”
19 Rarit nai' Laban nataah am nak, “Reko! Naan es re' reko nneis, natuin hit nua kit umi nanan. Maut he au anah bi Rahel kais ansao atoin sona'. Onaim ho mutua mbi ia, he mbiur meu kau.” 20 Rarit nai' Yakop nmeup toon hiut, henati' in bisa nsao bi Rahel. In nneek niis bi Rahel. Etun toon hiut re' naan, on re' neno fauk aah.
21 Toon hiut namsopu te, nai' Yakop namnauba' babaf nai' Laban am nak, “Baab! Au 'meup toon hiut gwen. Oras ia, mnona' kau bi Rahel he au 'sao.”
22 Onaim nai' Laban nahoeb ma narais neu kabin naan. In naskau too mfaun anbin kuan naan. 23-27 Mabe' naan, nai' Laban ka nfee fa bi Rahel, mes in nfee bi Lea he ntaam neu nai' Yakop in tenar. Onaim nai' Yakop antuup nok bi Lea. Kik-kiku te, na' nai' Yakop nahiin nak in ntuup nok bi Lea. Onaim nai' Yakop anmatoe in aam babaf nai' Laban am nak, “Au 'aetn ok toon hiut he 'sao bi Rahel! Te ho mseun ee nok bi Lea! Nansaa' am es ho mu'e'ob kau on re' ia?”
Rarit nai' Laban nataah am nak, “Ho kais mutoo'! Tatuin hai harat anbi bare ia, feot muni ka nabei' fa he nsao nahunun feot unu. Onaim reko nneis on nai! Ho mpao he fesat neno hiut namsoup fe', na' ho mupein bi Rahel. Mes ho ro he mmepu mtein toon hiut meu kau.” Rarit nai' Laban anfee in ate bi Silpa he njair bi Lea in ate.
28 Nai' Yakop anroim natuin. Onaim fesat neno hiut namsopu te, nai' Laban anfee bi Rahel he nai' Yakop ansao. 29 Rarit nai' Laban anfee in ate bi Bilha he njair bi Rahel in ate. 30 Onaim nai' Yakop ansao bi Rahel amsa'. In nneek nanesib bi Rahel. Onaim in nmepu ntein toon hiut neu in aam babaf.
Nai' Yakop in aanh ein
31 Mes UISNENO nahiin nak nai' Yakop anneek nanesib bi Rahel. Es naan ate, In nkonan bi Lea he nahoni'. Mes bi Rahel kahaf. 32 Bi Lea na'apu', ma nahoni' ri'aan moen jes. In nakanab ri'ana' naan nai' Ruben (re' in a'moufn ii nak ‘mkius, nmui' anah’),b natuin in na'uab am nak, “UISNENO nkius niit au susat. Etun es oras ia, au moen je he nkius kau.”
33 Rarit bi Lea na'apu' ntein, ma nahoni' ri'aan moen jes. In nakaanb ee, nai' Simeon (re' in a'moufn ii oni' nak ‘atoni' nneen anrair’), natuin in nak, “UISNENO nneen anrair nak au moen je ka nfairoir kau fa. Es na' In nfee ntein kau ri'ana' ia.”
34 Rarit bi Lea na'apu' ntein, ma nahoni' ri'aan moen jes. In nakanab ri'ana' naan nai' Lewi,c natuin in na'uab am nak, “Nok re' ri'ana' ia, au rais ji, oke' nrair. Namneo, au moen ji of na'kii' inbi kau, natuin au uhoni' ri'aan mone teun gwen ma 'fee ne sin.”
35 Rarit bi Lea na'apu' ntein, ma nahoni' ri'aan moen jes. In nakanab ri'ana' naan nai' Yahuda (re' in a'moufn ii oni' nak ‘bo'is’), natuin in na'uab am nak, “Neot re' ia, au he 'bo'is UISNENO!” Rarit bi Lea ka nahoni' fa heen.