28
Rarit nai' Isak no'en nai' Yakop, ma nfee ne tetus ma fainekat am nak, “Amneen murek-reko'! Ho kaisa' msao bifee munif na'ko pah Kana'an. 2 Mes ho mnao meu Padan Aram, meu ho na'i nai' Betuel in umi. Ho mnao ma msao ho baba' nai' Laban in aan feot gwes.a 3 Maut he Uisneno re' Akuaas Re'uf naan, es anfee ko tetus, he ho anah-upuf sin namfaun, ma ho sufam-kau'm ein anjarin uuf-uuf amfaun re' ma'tain ein. 4 Maut he Uisneno In rais manba'an neu nai' Abraham naneet neu ko, ma neu ho sufam-ka'um sin. Maut he ho mpaar pah ia, re' Uisneno nba'an anrair je neu nai' Abraham.”b 5 Na'uab anrair on naan ate, nai Isak nafetin nai' Yakop he nnao neu Padan Aram, neu in babaf nai' Laban ma na'if nai' Betuel sin umi.Nai' Esau nsao nai' Isma'el aan feot gwes
6 Nai' Esau nneen, nak nai' Isak nfee nrair tetus neu nai' Yakop, ma ntaar ee he kais ansao ri' feot munif na'ko pah Kana'an. In nneen amsa' nak in aamf ee nreun gwe he nnao nsao baabf ee aan feot gwes et Padan Aram. 7 Rarit nai' Yakop natuin in ainaf-amaf sin fainekat, onaim in nnao neu Padan Aram.
8 Nai' Esau nahini msa' nak, in aamf ee ka nroim fa in fee nggwin na'kon pah Kana'an. 9 Onaim in nnao neu in aam kouf nai' Isma'el, rarit in nsao nai' Isma'el aan feto bi Maharat. Bi Maharat naan, nai' Nebayot fetof.
Nai' Yakop namnei nbi Betel
10 Rarit nai' Yakop annao nasaitan Beer Seba neu kuan Haran. 11 Oras maans ee nmouf, in ntea baer jes, ma in ntuup anbi naan. Oras in he ntuup ate, in nait faut gwes he n'aka'nunu'.
12 Mabe' naan in namnei. In niit era' fua' es, re' in tuun ne nasnait on anbi neno. Rarit Uisneno In ameput neno tunan sin ansae-nsanun nbin erak naan. 13 Anbi mneit naan, nai' Yakop niit UISNENO nhake nbi in abnapan, rarit In na'uab am nak, “Au re' ia, UISNENO, ho na'i nai' Abraham ma ho ama' nai' Isak sin Uisneno. Au of a'fee ko pah ia 'eu ko ma 'eu ho sufam-ka'um sin. 14 Ho sufam-kau'm ein of amfaun on re' skuku'. Ma sin of ansei jok ma nbaits ok neun bare-bare. Na'ko ho sufam-ka'um, are' uuf anbin pah-pinan of napenin tetus-athoen.c 15 Mumnau murek-reko'! Ho mnao meu mee-mee jah, Au 'ok ko, 'pafa' ma 'panat ko. Au of 'eik ko mfain uum meu pah ia. Au ka 'konan ko mmees fa. Ma Au of uteaba' rais manbaa'n ein re' Au 'fee ko sin.”
16 Oras nai' Yakop anfeen na'ko tupas naan, in na'uab am nak, “Au fe' uhiin 'ak, UISNENO et bare re' ia msa'!” 17 Onaim in namtau. Ma in natenab am nak, “Bare ia nmoe' kau m'au fuunk ein natoron. Namneo-namneo, Uisneno In uim ji et re' ia! Ma eno' he ttaam teu sonaf neno tunan, es re' ia.”d
18 Kik-kiku te, nai' Yakop anfeen. Rarit in nait faut aka'nunu' naan, ma nahaek ee njair tanar. Rarit in n'oop mina' nbi fatu naan, ma n'onen neu Uisneno. 19 In nakanab bare naan Betel, re' in a'moufn ii nak ‘Umi Uisneno’. (Unu' te bare naan, kaann ee, Lus).
20 Rarit nai' Yakop ansuup am nak, “Karu Uisneno nok kau, npao ma npanat kau 'bi au ranan ia, ma nfee kau mnahat ma pake, 21 tar antea au 'fain 'uum 'bi mamut ma ao-mina', UISNENO of anjair au Uisneno. 22 Fatu re' au uhaek ee ia, njair baer onen neu Uisneno. Ma saa'-saa' re' Uisneno nfee kau sin, au of a'fee ufani' sapaaf es na'ko bait bo'.”