Bi Ripka napoi aam Isak he nfee tetus neu nai' Yakop
27
Oras nai' Isak namnais inrair, in maatk ein ankupu nmaten. Onaim in no'en in aan moen unu re' in nneek niis ne ji mnak, “Esau! Ho uum fe'!”Nai' Esau nataah am nak, “On mee, tua?”
2 Nai' Isak natoon ee mnak, “On nai! Au umnais jen. Au ka uhiin fa au neno 'maten. 3 Onaim mait ho baer seokt ein naan, mnao nai he mseok maan kau mui' fui jes. 4 Rarit ho muhaan maan kau mnaah amin-minat re' au 'romi, rarit meik je neem. Au 'uah a'rari te, au 'fee ko tetus. Ma karu au 'fee 'rair ko tetus ate, au 'mate msa' reko.”
5 Rarit nai' Esau nnao nseok. Mes bi Ripka nneen niit nai' Isak in uaban naan. 6 Rarit bi Ripka na'uab neu nai' Yakop am nak, “Hoe, Ako! Amneen murek-reko'! Fe'e na au 'neen ho ama' na'uab nok ho tata' nai' Esau, mnak: 7 ‘Ho mnao mseok maan kau mui' fui jes, he muhaan ee namin-miin neu kau. Karu au 'uah a'rari te, au 'fee ko tetus nbi UISNENO In matan.’ 8 Onaim ho mneen murek-reko'! Au u'uab saa' ate, mutuin. 9 Oras ia, mnao nai meu hit a'bib-kaesn ee, mpiir maan a'bib tiup apokat nua. Amroor sin, ma mait meik sin siisk ein naan neman neu kau. Au of uhaan sin utuin ho ama' in romin. 10 Karu au uhaan a'rari te, ho meik sin meu ho ama' he in nbukae. Rarit in nfee ko tetus fe', hena' in nmaet. Nok ranan naan, ho es mupein teuts ee. Ka ho tata' fa.”
11 Mes nai' Yakop na'uab nok in ainf ee mnak, “Ain! Mes au tata' nai' Esau in aon ee ma'funu'. Au aok ii kaah fa! 12 Kais-kaisa' ama' nreo' au aok ii, ma in nahiin nain nak au upoi. Onaim in nkaas kau!”
13 Onaim in ainf ee nak, “Ako. Kais neek maan nabait. Anbain he au es a'ator! Karu ho ama' nkaas ko, maut he au es re' usaah. Oras ia, mnao nai he mroro 'bibin naan.”
14 Rarit nai' Yakop annao npiir naan a'bibin naan. Onaim in nroor sin, ma neik sin siisk ein neun in ainaf. Onaim bi Ripka nahaan sin namin-minan on re' nai' Isak in romin. 15 Rarit bi Ripka nnao nait nai' Esau in baer paken re' namasan, ma nfeen nai' Yakop sin he npaek sin. 16 In n'aum nai' Yakop in a'niimk ein ma in neon, npaek pasu 'bibi naan. 17 Rarit in nfee sisi mtaas ein naan nok utunu' neu nai' Yakop.
18 Rarit nai' Yakop neik sisi mtaas ein naan neu in amaf. In na'uab am nak, “Aam! Au 'uum een.”
Nai' Isak nataah am nak, “Hoe! Ho sekau ko?”
19 Onaim nai' Yakop nataah am nak, “Au re' ia, ho aan moen unu', nai' Esau! Au 'tao utuin ho rekat. Amfeen nai he mbukae. Au uhaan sisi na'ko mui' fui re' au 'heek 'aan. Ambukae nai, hena' rari te mu'uab amfee kau tetus, tua!”
20 Rarit nai' Isak na'uab am nak, “Ho ma'tain re'uf ko! Ho mseok rabah, oo!”
On nai te, nai' Yakop nataah am nak, “Au upein raab aah, natuin UISNENO re' ama' ho mu'bees meu Na ji, es re' anturun ma nbaab kau.”
21 Onaim nai' Isak anhaman nai' Yakop am nak, “Ho mpaumaak kau fe', he au 'reo' 'iit ko! Nai' Esau es re' ho, oo?”
22 Rarit nai' Yakop ansiri' ntaam ma npaumak-maak in amaf. Onaim a'naef ee nreo' gwe, ma na'uab am nak, “In haan ii, on re' nai' Yakop in hanan! Mes in a'niim ii, on re' nai' Esau in a'niman.” 23 Mes nai' Isak ka nahiin fa nai' Yakop natuin in a'niimn ein ma'funu' on re' nai' Esau. Mes oras in he nfee tetus neu nai' Yakop, 24 in nataan antein am nak, “Ho re' ia, nai' Esau batuur-batuur, aa oo?”
Onaim nai' Yakop nataah am nak, “Batuur, tua!”
25 Rarit nai' Isak na'uab am nak, “Ho mnona' sisi naan he au 'euk. Rarit na' au 'fee ko tetus.” Onaim nai' Yakop ansoron sisi ma tua min-kase neu in aamf ee, ma in nbukae. 26 Rarit in aamf ee na'uab am nak, “Airoo. Ampaumaak uum he mhoo ma mneek maan kau.”
27 Oras nai' Yakop anpaumaak he nhoo ma nneek in aamf ee te, nai' Isak nafoi nahiin nai' Esau in paekn ein fook ein. Rarit in nfee tetus neu nai' Yakop am nak,
“Au aanh ii in foon ii, on re' mnera' huun re' UISNENO nasanut tetus,
28 Maut he Uisneno nasanut pinis na'ko neno,
he namriab ma nasnaub ho renen!
Maut he In nfee ko pena'-maka' nho-hoen,
ma ho poo' anggur sin nafuan nho-hoen.
29 Uuf-uuf of anjarin ho aten sin,
Ma uuf-uuf na'ko pah-pah of na'ruri' ma nhormaat ko.
Maut he ho muprenat ho aom-bian sin ok-oke',
ma sin aar sin of anri'tuun nbin ho humam ma ho matam.
Sekau es re' ankaas ko, sin of napenin kasat amsa'.
Mes sekau es re' anfee ko tetus, sin of napenin tetus amsa'.”
Nai' Esau nfain neem ma ntoit tetus na'ko nai' Isak
30 Oras nai' Isak anfee nrair tetus, ma nai' Yakop fe' anpoi nasaitan in aamf ee te, in tataf nai' Esau nfain neem ma neik mui' fui re' in nheek naan ee. 31 Onaim in nnao nahaan ee, rarit in neik je neu in amaf. In na'uab am nak, “Aam! Amfeen he mbukae nai, tua. Au uhaan a'rair siis fui re' au 'nao 'seok 'aan. Ambukae mrari te, amfee kau tetus.”
32 Nai' Isak naskeek. In nataan am nak, “Hoe! Ho sekau ko mtein?”
Rarit nai' Esau nataah am nak, “Au nai' Esau kau! Au ho aan moen unu.”
33 Onaim nai' Isak na'ta'i. Rarit a'naef ee nataan am nak, “Karu on naan ate, fe'e na sekau es re' neik kau sisi ma au 'euk? Au 'eku 'rair, ma 'fee 'rair tetus 'eu tuaf naan. Ma au ka ubei' fa he 'heer ufani' tetus re' au 'fee je naan.”
34 Anneen in aamf ee na'uab on naan ate, nai' Esau neekn ee nameen, ma nkae npin-pinus. Ma na'aub naher-heer am nak, “Koi, aam! Amfee kau tetus amsa', tua!”
35 Mes nai' Isak nak, “Ho ori' neem am napoi nrair kau, ma nabaak naan ho tetus.”
36 Rarit nai' Esau na'uab am nak, “In napoi kau no nua gwen. Nahunu te, in napoi kau ma ntoup naan au hak aan moen unu. Oras ia, in napoi kau ntein ma ntoup naan au tetus. Etun in kaann ee ‘Yakop’. Mes ho mmui' tetus bian antein he mfee kau, oo?” (Kanaf Yakop in oetn ii ‘nnaa' haen 'tikan’. Mes in oten bian ‘apoit’.)
37 Rarit nai' Isak nataah am nak, “Au u'ratan a'rair ho ori' njair ho usi'. Ma in aok-bian sin oke' njarin in ate sin. Au 'fee ne pena'-maka' nho-hoen, ma hau fua anggur nho-hoen amsa'. Onaim Esau! Oras ia au he 'fee ko tetus saa' a'tein?”
38 Anneen on naan ate, nai' Esau noik aamf ee piut am nak, “Aam, ho mmu'i haa tetus mese', aa oo? Au 'tebes, ho of ammu'i mtein bian. Maski aan'-ana' msa', reko!” Onaim in nmurai nkae ntein.
39 Rarit nai' Isak nataah in anah nai' Esau mnak,
“Ho 'moin maan of na'roo na'ko reen amriat ein,
ka tiit fa pinis nsaun na'ko neno he napeet ho afun.
40 Ho suin aan of es anfee ko he mmoin.
Mes maski on mee-mee msa', ho mjair ate meu ho ori'.
Suma karu ho mraban mubei' je, of na' ho mufetin maan om mu'ko in a'niman.”
Bi Ripka nreun nai' Yakop he naen
41 Nai' Esau nato'on nai' Yakop re'-re'uf, natuin nai' Yakop nasiik naan in tetus. Mes in natenab am nak, “Ka 'roo fa te, ama' nmaet. Onaim au 'pao. Bee't ee oke' te, au 'roro!”
42-43 Oras bi Ripka nneen nai' Esau in sarit naan ate, in no'en nai' Yakop am nak, “Ho mneen murek-reko'! Ho tata' nareon anrair he nbaras in neek menas. In he nroor niis ko. Onaim ho maen nai meu ho baba' nai' Laban et Haran. 44 Amnao mutua mtahan ambi nee, tar antea ho tata' in neekn ee nmuni'. 45 Karu in nnikan nain saa'-saa' re' ho mmoe' sin neu ne te, au of a'reek tuaf he neit naan ko. Natuin au ka 'roim fa he unekun au aanh ein nua sin no mese' nain.”
46 Rarit bi Ripka na'uab nok nai' Isak am nak, “Au 'renan nai' Esau in fee nua' ein re' na'kon atoin Hetes sin ia! Karu nai' Yakop ansao ri' feot munif Hetes, reko nneis au 'maet nai.”