Nai' Isak ma usif Abimerek
26
Neot es, amnaahs ii ntaman pah naan, on re' amnahas oras nai' Abraham anmoin fe'. Onaim nai' Isak antoit he karu reko te usif Abimerek, atoin Filistinas sin usif, anfee ne mainuan he in natuan nbi kuan Gerar. 2 In nmoe' on re' naan, natuin UISNENO nakriir On neu ne mnak, “Ho kais amnao meu pah Masir. Au of ukrira' ko bare 'teta'. 3-4 Karu ho mutua on re' atoin anao-amnemat mbi bare naan, Au of 'ok ko, ma 'fee ko teuts am athoen huma'-huma'. Au of a'moe' ho suufm ein amfau-rutu on re' kfuun ein et neno. Ma Au 'fee 'eu ho sufam sin pah re' ia ma in kuan ein oke'. Na'ko ho sufam-kau'm ein naan, of are' uuf-uuf nbin pah-pinan ia napenin teuts am athoen. Nok ranan naan, Au uteaba' Au rais manba'an 'ok ho ama' nai' Abraham.a 5 Au 'moe' on re' ia, natuin ho ama' natuin Au romik, Au prenat, ma Au atoran.” 6 Onaim nai' Isak natua ntahan nbi kuan Gerar.7 Bi Ripka naan mamasa'. Onaim oras atoin ein re' nbin bare naan niit ee, sin nmaktaan ein nok ne. Mes nai' Isak nataah am nak, “Bi Ripka naan, au feto'.” In namtau karu in nmanaku' nak in fee ja te, atoin ein naan of anroor gwe ma ntoup neik bi Ripka. 8 Nai' Isak natua suuk a'roo nbi naan. Neot es, uisf ee nasneku' niit nai' Isak nok bi Ripka na'ko in eno sneer. In niit sin anmahoon fee-mone. 9 Onaim in nreek tuaf he nnao no'en nai' Isak, ma nakain ee mnak, “Isak! Au uhiin urek-reko' 'rair, bifee naan, ho fee ja! On nai te, neu saa' am es ho mak ho feto'?”
Onaim nai' Isak nataah am nak, “On nai, aam usi. Au umtau karu au utoon am 'ak au fee ja te, kais-kaisa' biak ein anroor niis kau.”
10 Rarit uisf ee nataah am nak, “Karu nmui' tuaf anbi re' ia re' ntuup nok ho fee, ho ro he musaan kai! Nansaa' am es ho mmoe' on naan meu kai?”
11 Rarit nai' Abimerek namnaub neik haan ma'tani' neu in too nggwin am nak, “Hi aar ki mimnau mirek-reko'! Sekau-sekau re' nmoe' re'uf neu atoni' ia ai' in fee, au of a'hukun u'mate.”
Sin nmatoena' oe hain ein
12 Oras naan nai' Isak narene nbi pah naan. In napein in reen ne aafk ein anfain no nautn es, natuin UISNENO nfee ne tetus-athoen. 13 In a'mui'n ein na'baab ok piut, tar antea in nfain atoin amu'it batuur-batuur. 14 In bijae, 'bibi, ma 'bib-kase nma'baab ein amfaun. In ameupt ein namfaun amsa'. Tar antea atoin Filistinas sin seor natenab re'uf neu ne.
15 Unu' te, nai' Isak in amaf nai' Abraham sin nhanin oe hani' mfaun. Mes oras ia, atoin Filistinas sin nkuub nareu' oe hain ein naan neikin afu.
16 Rarit usif Abimerek na'uab nok nai' Isak am nak, “Isak! Reko nneis ho mnao musaitan hai pah ii nai. Hai mkis-kisu te, ho ma'tainm ii, nneisi nrair kai.”
17 Rarit nai' Isak nnao nasaitan kuan naan, ma nfain natua nbi karopu mnera' Gerar. 18 Onaim in nhain nafani' oe hain ein re' sin nkuub sin naan. Ma in nakanab oe hain ein naan, natuin kaanf ein re' unu' te in aamf ee nakanab anrair sin.
19 Oras nai' Isak in ameupt ein anhanin oe nbin mnera' Gerar naan te, sin nhain napein oe maat es, re' nasfurak anpoi. 20 Mes atuuks ein na'kon Gerar anmatoen nok nai' Isak in atuuks ein, natuin oe hani' naan. Sin nak, “Ia hai oe!” Es na' nai' Isak nakanab oe hani' naan Esek, re' in a'moufn ii, ‘matoes’.
21 Rarit nai' Isak iin na, nhain oe jes anteni'. Mes sin nmatoen ntein' ein, natuin oe hani' naan. Es na' nai' Isak nakanab oe hani' naan Sitna, re' in a'moufn ii ‘anmaraabn ein’.
22 Rarit in nasaitan bare naan, ma nhani ntein oe hain es. Neot re' ia, sin ka nmatoen fa. Es na' nai' Isak nakanab oe hani' naan Rehobot, re' in a'moufn ii ‘baer mainuan’. Ma in na'uab am nak, “Oras ia, Uisneno nfee kai bare he mitua mbi baer mainuan ia. Anbi ia te, na' hai bisa mihoni' ma mimsai' he mi'baab om.”
23 Na'ko naan ate, nai' Isak sin nnaon n'anin Beer Seba, he natuan nbin naan. 24 Mabe' naan, UISNENO nakriir On neu ne, ma na'uab am nak, “Isak! Au re' ia, ho ama' nai' Abraham in Uisneno. Onaim kais mumtau, natuin Au 'pao ma 'panat ko. Au of a'fee ko teuts am athoen. Ma ho sufam-kau'm ein of na'baab ok amfaun. Au 'moe' on re' ia, natuin Au rais manba'an 'ok ho ama'.”
25 Rarit nai' Isak anbaik fatu he nafena' mei fuat anbi naan. Onaim in ntoit makasi neu UISNENO nbi bare naan. In natua nbi naan, ma in ameupt ein nmurai nhanin oe ntenin.
Usif Abimerek ma nai' Isak nmaraem ok
26 Oras naan, usif Abimerek neem na'ko kuan Gerar. In nok in soob reko nai' Ahusat, ma in meo pa'e nai' Fikor, neman ma nateef nok nai' Isak. 27 Onaim nai' Isak nataan am nak, “Aam usi'! Unu' te hi mriu' kai mpoi mi'ko hi pah. Onaim oras ia hi iim he minsaa' amtein?”
28 Rarit sin natahan am nak, “On nai! Oras ia hai mihiin mak Uisneno npao ma npanat ko, anhao ma nfait ko. Natuin rasi naan, hai miten-tenab ate, reko nneis hit nua kit tahakeb rais manba'an. Ho msuup am mak, 29 hi of ka mmoe' fa rais re'uf meu kai, on re' hai ka mmoe' fa rais re'uf meu ki msa'. Batuur hai neekm ein reko mok ki. Es na' neon gwes ii, hi misaitan hai pah ii nok mamut. Hai mihiin batuur-batuur, UISNENO es anfee ki tetus-athoen.”
30 Rarit nai' Isak anmoe' fesat neu sin. Sin nbukaen bu'-bua'. 31 Anmeu nfiin on naan ate, sin nsupan. Onaim nai' Isak nafetin sin he nfanin nok mamut.
32 Neno naan, nai' Isak in ameupt ein neman ma natonan am nak, “Aam! Hai mipeni mrair oe.” 33 Rarit nai' Isak nakanab oe hani' naan Seba, re' in a'moufn ii nak ‘supat’. Onaim sin nakanab kota naan Beer Seba ntea oras ia.b
Nai' Esau nsao bifee nua na'kon uuf a'teta'