Nai' Abraham ansao ntein
25
Nai' Abraham ansao ntein bifee jes, kaann ee bi Ketura. 2 Bi Ketura nahoni' ri'aan ein re' ia: nai' Simran, nai' Yoksan, nai' Medan, nai' Midian, nai' Isbak, ma nai' Sua. 3 Nai' Yoksan in aanh ein, esan re' nai' Seba ma nai' Dedan. Nai' Dedan in suufk ein, esan re': atoin Asuras, atoin Retus, ma atoin Reumas. 4 Nai' Midian in aanh ein esan re': nai' Efa, nai' Efer, nai' Henok, nai' Abida ma nai' Erdaa. Sin ok-oke' re' ia, ain Ketura in sufan.5-6 Oras nai' Abraham anmoin fe', in nbait nain neu ain Hagar ma ain Ketura sin aanh ein, es-es ate nok in a'mu'in. Rarit in nreun sin, he nnaon natuan nbin pah Kana'an ntoom pasa' neon-saet, he sin na'roon na'ko in anah nai' Isak. Mes in baer pusaak ein ok-oke', in nnona' sin neu nai' Isak.
Nai' Abraham nasaeb on
7-8 Nai' Abraham anmaet oras in nmoin naan toon nautn es bo' hitu mniim (175). 9-10 Rarit in anah nai' Isak ma nai' Isma'el ansuub ee nbi nuat Makpera, re' npaumaak kuan Mamre. Unu' te, nai' Abraham ansoos po'on naan na'ko atoin Hetes es, re' in kaann ee nai' Efron, nai' Sohar in anah. Sin nsuub nahunun ain Sara' nbi nuat naan. 11 Nai' Abraham anmate nrair. Uisneno nfee tetus-athoen neu nai' Isak ma in nmoni nbi tetus ao-mina' ma mamut. Oras naan, nai' Isak natua npaumaak oe hani' Beer Lahai Roi.
Nai' Isma'el in sufan
12 Nai' Isma'el in reetn ii on nai. In re' naan, nai' Abraham nok in fee tnana' ain Hagar sin anah. Ain Hagar naan, ain Sara' in ate na'ko pah Masir. 13-16 Nai' Isma'el in aan moen ne tuaf bo'es am nua. In aanh ein esan re' ia, nmaktun-tuin ein na'ko moen unu ntea aheit susu, esan re': nai' Nebayot, nai' Kedar, nai' Atbeel, nai' Mibsam, nai' Misma, nai' Duma, nai' Masa, nai' Hadat, nai' Tema, nai' Yetur, nai' Nafis, ma nai' Ketma. Ri'aan monen re' ia, sin njarin aam uuf neu too pah bo'es am nua, es-es ate, nmui' kuun in pah. Sin nakanab sin pah, es-es ate natuin sin be'i-na'i sin kaank ein.
17 Nai' Isma'el anmaet oras in nmoin naan toon nautn es bo' tenu mhiut (137). 18 Mes in suufk ein naan, anmamusun es nok es. Rarit sin npe'en ma natuan nbaits ok nmurai na'ko Habira tar antea Sur, re' anmanaak nok pah Masir, nkono ntean pah Asur.a
Reta' na'ko nai' Esau ma nai' Yakop
19 Nai' Abraham in anah nai' Isak in reetn ii, es re' ia. 20 Oras nai' Isak ansao bi Ripka, nai' Isak nmoin naan toon bo' haa. Bi Ripka in aamf ee, es re' nai' Betuel. In naof ee, es re' nai' Laban. Sin re' naan atoin Aramas, na'kon pah Padan Aram.b
21 Bi Ripka ka nahoni' fa. Etun nai' Isak an'onen ma ntoit UISNENO he nfei bi Ripka in apun. UISNENO nneen in onen naan, es na' bi Ripka na'apu'. 22 Bi Ripka nnaben ate, in na'apu' ri'aan koen. Ri'aan ein naan anmasaapn ein piut nbin sin ainf ee apun. Onaim bi Ripka natenab am nak, “Nansaa' am es ri'aan nua' ein ia, on re' ia?” Rarit in nataan neu UISNENO.
23 Ma UISNENO nataah ee mnak,
“Anbi ho aup maan, anmui' naan ri'ana' nua re' of he njarin uuf nua re' sin of anmamusun piut-piut.
Aan muin aan of na'be'i nneis na'ko aan uun aan.
Ma taatf aan of anjair ameput neu in orif.”
24 Oras in neon ne ntea te, bi Ripka nahoni' ri'aan koen. Monen oke'. 25 Ahuunt ee me'-me'e, ma in aon ee ma'funu'. Es na' sin nakaanb ee nai' Esau (re' he noi on re' kata es, re' in a'moufn ii ‘ma'funu'’).
26 Rarit na' in orif. Mes oras in npoi, in nnaa' in taatf ee in haen tikan. Es na' sin nakaanb ee nai' Yakop (re' he noi on re' kata es, re' in a'moufn ii ‘haen tikan’). Oras nahoni' sin ite, nai' Isak nmoin naan toon bo' nee jen (60).
Nai' Esau nnona' in hak aan moen unu
27 Oras ri'aan koen naan na'naen ate, nai' Esau njair asekot. In nroim he natua nbi nasi. Mes nai' Yakop atoin ata'as. In nroim he nbi-bi haa umi. 28 Nai' Isak biasa nroim he neuk siis fui. Es naan ate, in nneek nanes-nesib nai' Esau. Mes bi Ripka nneek nanesib nai' Yakop.
29 Neot es, oras nai' Yakop nahaan oef aknaa', nai' Esau nfain neem na'ko sekot. In nhae nmaet ma namnaah anmate msa'. 30 Onaim in na'uab neu nai' Yakop am nak, “Ako! Ho msoon maan kau oef me'-me'e re' ho muhaan ee naan. Maski kre'-re'o, he au 'ha'tain! Au umnaah ka ubei' fa heen.” (Etun sin nteek ee te Edom, re' he noi on re' kata es, re' in a'moufn ii, ‘me'e’.)
31 Rarit nai' Yakop nataah am nak, “Reko, taat honi'. Mes karu ho mfee kau ho hak aan moen unu naan fe'!”c
32 Onaim nai' Esau nataah am nak, “Ahh. Ma on saa' na' es re' hak aan moen uun gwi! Ho mpaar. Au umnaah ka ubei' fa heen. Ho msoon maan kau oef rabah he meik je neem. Au he 'uah een.”
33 Mes nai' Yakop na'uab anteni' mnak, “Airoo, taat honi'. Ampao kre'-kre'o. Ho msuup fe' mak, ho mnona' kau hak naan.” Onaim nai' Esau nsuup on re' naan. 34 Rarit nai' Yakop ansono nfeen ee oef aknaa' naan ma nfee ne nok utunu'. Nai' Esau nbukae nrari te, in nfeen annao kuun.
Nok ranan naan, nai' Esau nnona' nain in hak aan moen unu.