Sin namin nai' Isak bifee he nsao
24
Nai' Abraham in ua mnaun, tar antea in namnais re'-re'uf. UISNENO npaant ee, ma nfee ne tetus-athoen. 2-3 Nai' Abraham anmui' in atoin pirsai' jes, re' n'urus are' kanan in a'mu'in. Neot es, nai' Abraham noe'n ee mnak, “Amneen murek-reko'! Au 'toit ko, he ho msuupa ampaek UISNENO re' nmoe' neno tunan ma pah-pinan In kanan mak, ho kaisa' mtoit bifee munif na'ko atoin Kananas sin he musaob ee nok au anah nai' Isak. 4 Mes ho ro he mnao meu au kua-mnasi', meu au nonot-asar sin. Ho maim bifee muinf es ambi nee, he tasaob ee nok au anah.”5 Rarit ate naan nataan nai' Abraham am nak, “Reko, tua! Mes au he 'moe' on mee, karu bifee munif naan ka nroim fa he neem nok on ia? Karu on naan ate, au ro he 'eik nai' Isak he tmatsaob ee on nee, ai' on mee?”
6 Nai' Abraham nataah am nak, “Ho mumnau murek-reko'! Maski on mee msa', ho ka mubei' fa he meik au aanh ee nnao neu nee! 7 Mumnau, UISNENO re' annaa' kuasa et neno tunan, neik kau 'poi 'rair u'ko au kua-mnasi', ma neik kau 'taam a'tea bare ia. Ma In nahakeb rais manba'an nok kau msa' am nak, ‘Au of a'fee ko bare ia ok-oke' 'eu ho sufam-ka'um sin.’ Onaim kais ho nekam naan na'oni'. Ho mnao. Uisneno of anreek In ameput na'ko sonaf neno tunan he nfei ranan neu ko, he ho bisa muteef mok bifee munif, re' he njair au aanh ee in fee. 8 Mes karu bifee naan ka nroim fa he neem nok ko neu ia te, ho supat ia ka naah ko fa. Maski on mee msa', ka nabei' fa he ho meik nai' Isak meu nee.”
9 Rarit ate naan ansuup anbi nai' Abraham am nak, “Reko, tua. Au 'moe' utuin ho uabam naan ok-oke', tua.”
10 Onaim ate naan anpiir naan bikaes unta bo'es. In nasaeb baer mamasa' ma ma'osa' huma'-huma' anbi bikaes unta sin. Onaim in nok in aok-bian sin nnaon neun nai' Nahor in kota et pah Mesopotamia.b
11 Ate naan in nnao piut tar antea kota naan in ninin. Rarit in nasnasab in bikaes unta sin anbin naan, anpaumaak oe hain es. Oras naan maans ee nmaeb jen. Nati' te, bifee muinf ein neman he nkuin oe nbi oe hani' naan. 12 Rarit ate naan an'onen am nak, “UISNENO re' au aam usi' Abraham in Uisneno. Amturun amfei kau ranan, maut he au sairt ii ntea ma upein in afan nesan arekot. Mukrira' Uisneno Ho nekam arekot meu au aam usi', ma mumnau in rais manba'an meu kau. Maut he reko te, au uteef 'ok nai' Isak in fee nbi bare ia. 13 Usi', au 'haek et oe hain ii ninin. Ri' feot muinf ein neman na'kon kota he nkuin ma nsuun oe na'kon oe hani' ia. 14 Onaim au 'toit Ko, tua, on nai: Karu au u'uab 'ok bifee muinf es 'ak, ‘Parmisi, tua. Karu reko te, musanut ho 'nai oe jan he au 'iun aan akre'o.’ Karu in nataah am nak, ‘Reko, tua. Ma au of u'inu' ho unta sin imsa'.’ Naa, re' naan anjair tanar nak, bifee munif naan es re' Uisneno Ho mpiir je njair nai' Isak in fee! Nok tanar naan, au uhiin 'ak, Uisneno mururu' mrair Ho maneekm ii meu au aam usi', nai' Abraham.”
Nai' Abraham in ate nateef ri' feto bi Ripka
15-16 In ka n'onen anrair fa fe'e te, ri' feot muinf es neem. In kaann ee, bi Ripka. In re' naan nai' Abraham in orif nai' Nahor ma bi Milka sin upuf. In aamf ee, nai' Betuel. Bi Ripka mamasa' batuur, ma fe' ao-'temef. In nsaun neu oe hani' naan, rarit in nkui oe neu in a'nai oe, rari te in nsae nfain.
17 Oras bi Ripka nsae nfani te, nai' Abraham in ate naan naen neem anseun gwe. Rarit in ntoti mnak, “Parmisi, tua! Amfee maan kau oe he au 'iun 'aan akre'o.”
18 Rarit bifee munif naan nataah am nak, “Reko, tua!” Rarit in nasanut in a'nai oe naan rabah, ma nfeen ate naan he niun. 19 Ninu nrair on naan ate, bifee munif naan na'uab am nak, “Maut he au 'kui oe he u'inu' ho bikaes unta sin. Maut he sin ninun tar namsenan.” 20 Rarit in nnao n'opa' oe nesif naan nbi 'bai oe. Rarit in nsae-nsaun he nkui oe na'ko oe hani' naan, ma na'inu' unta sin ok-oke', tar antea namsenan. 21 Nai' Abraham in ate naan anhake ma ntaa'-taa' kuun, mes ankius narek-reko' ri' feot munif naan anbiur. In naten-tenab am nak, “Re' Uisneno npiir je ji, es re' ia, oo?”
22 Unta sin ok-oke' ninun tar namsenan. Onaim ate naan nait ikreni mnatu' re' sin nati' te ntao gwe nbi sin paank ein, ma niti mnatu' paasn es ma nanitib bifee munif naan in a'niimn ein nua sin.c 23 Rarit ate naan nataan am nak, “Ho ama' in kaann ee, sekau? Karu reko te, mabe' ia au 'tuup a'tahan 'bi ho ama' in umi.”
24 Onaim bifee munif naan, nataah am nak, “Au ama', kaann ee nai' Betuel. Au na'i, es re' nai' Nahor. Au be'i, es re' bi Milka. 25 Anbi hai uim je nmui' hara' tupa' neu ki. Ma nmui' huun neu ho mui't ein.”
26 Rarit ate naan na'ruri' ma na'bees neu UISNENO. 27 Onaim in na'uab am nak, “Pures ma bo'is neu Uisneno! Usi' nfei ranan neu kau, tar antea au uteef 'ok au aam usi' in nonot-asar sin anbin ia. Nok ranan naan, Uisneno nakrira' In nekan arekot neu au aam usi', nai' Abraham, ma najarib in rais manba'an neu kau.”
28 Rarit bifee munif naan naen anfain rabah, he natoon rasi naan neu in uim je nanan. 29-30 Bi Ripka in naof ee, kaann ee nai' Laban. Oras in niit mnaut ein, ma nneen bi Ripka in uaban naan ate, nai' Laban naen anpoi rab-raab, he nateef nok ate, re' nhaek nabaar fe' nok in bikaes unta sin npaumaak oe hani' naan. 31 Rarit nai' Laban na'uab am nak, “Aam! UISNENO neik ko mtea ia gwen nok ao-mina'. Onaim kais amhaek mubaar ambi ia. Au uskau he tnao teu hai umi. Hai mibarab ke'en, ma bukae neu ko ma neu ho unta sin, tua.”
Nai' Abraham in ate ntaam antoit bi Ripka
32 Rarit nai' Abraham in ate naan nnao natuin nai' Laban, he nnaon neu nai' Betuel in umi. Nai' Laban sin nasanut anturun sin baer' ein na'kon unta sin. Rarit sin na'eku' unta sin nok huun. Sin neikin oe msa' he ate naan nok in aok-biak ein nafanun. 33 Oras sin n'ator bukaet anbi mei te, ate naan na'uab am nak, “Nahuun na'ko hai he mbukae te, au 'toit mainuan a'kre'o he utoon aan hai sairt ii fe', tua.”
Onaim nai' Laban nataah am nak, “Neu! Reko, tua.”
34 Ate naan na'uab am nak, “Au re' ia, hi na'i nai' Abraham in ate. 35 UISNENO nfee tetus nathoe neu au aam usi', tar antea in nmui' batuur-batuur. Uisneno nfee ne muti'-mnatu', ate (et bifee ma atoni'), ma mu'it amfau-rutu, es re': bijae, bikaes unta, bikaes keledai, 'bibi, ma 'bib-kase. 36 Oras au aam usi' ma au ain usi' namnasin on nai te, ain Sara' nahoni' naan ri'aan moen jes. In es re' he antoup aam usi' Abraham in pusaak ein ok-oke'. 37 Onaim au aam usi' nai' Abraham anreun kau he 'suup am 'ak, ‘Ka mubei' fa he ho mait bifee munif Kananas, he musaob ee nok nai' Isak. 38 Mes ho ro he mait bifee munif mu'ko au nonot-asar sin, he njair nai' Isak in fee.’
39 Rarit au utaan au aam usi' m'ak ‘Mes on mee karu ri' feot munif naan ka nroim fa he neem nok neu ia?’
40 Rarit in nataah am nak, ‘UISNENO re' au utuin In roimn ee piut naan, of anreek In ameput na'ko sonaf neno tunan he nfei ranan neu ko, he ho bisa muteef mok ri' feot munif, re' he njair au aanh ee in fee. 41 Mes karu au nonot-asar sin ka nromin fa he nkonan ri' feot munif naan he neem nok ko neu ia te, ho supat ia ka naah ko fa.’
42 Onaim fe'e na au 'uum a'tea oe hain ee te, au 'onen a'bi au nekak 'ak, ‘UISNENO re' au aam usi' Abraham in Uisneno. Amturun amfei kau ranan, maut he au sairt ii ntea ma upein in afan nesan arekot. Maut he reko te, au uteef 'ok nai' Isak in fee nbi bare ia. 43 Usi', au 'haek et oe hain ii ninin. Ma ri' feot muinf ein neman na'kon kota he nkuin ma nsuun oe nbin ia. Onaim au 'toit on nai: karu au u'uab 'ok bifee muinf es 'ak, “Parmisi, tua! Karu reko te, musanut ho 'nai oe jan he au 'iun 'aan akre'o.” 44 Karu in nataah am nak, “Reko, tua! Ma au of u'inu' ho unta sin imsa'.” Naa, re' naan anjair tanar nak, bifee munif naan es re' Uisneno Ho mpiir je njair nai' Isak in fee!’
45 Au ka 'onen urair fa fe'e te, bi non Ripka neem neik in a'nai oe, ma nkui oe nbi oe hani' naan. Oras in nsae nfain, au 'toit 'ak, ‘Parmisi, tua! Amfee maan kau oe he au 'iun 'aan akre'o.’ 46 Onaim in nasanut in a'nai oe naan rabah am nak, ‘Reko, tua! Maut he au 'kui oe he u'inu' ho bikaes unta sin.’ Rarit au 'iun, ma au bikaes unta sin ninun amsa'.
47 Rarit au utaan ee m'ak, ‘Ho ama' in kaann ee, sekau?’
In nataah am nak, ‘Au ama', es re' nai' Betuel. Au na'i, es re' nai' Nahor. Ma au be'i, es re' bi Milka.’ Rarit au ukrein je nbi in panan, ma uniitb ee niti mnatu' paasn es.
48 Onaim au u'ruri' ma u'bees 'eu Uisneno, m'ak ‘Pures-bo'is 'eu Uisneno! Usi' Ho mfei ranan meu kau, tar antea au uteef 'ok au aam usi' in nonot-asar sin anbin bare ia. Ma au uteef a'rair 'ok nai' Isak in fee msa'.’ 49 Onaim oras ia, karu sin ama aar ki mneek au aam usi' Abraham ate, mitoon kau kninu'. Karu kaah fa te, mitoon kau kninu' msa'. Maut he au uhiin 'ak, au he 'moe' on mee.”
Bi Ripka in nonot-asar sin antoup oko'
50 Ate naan na'uab anrair on naan ate, nai' Laban ma nai' Betuel natahan am nak, “Karu UISNENO es an'ator on naan ate, hai he mak saa' ntein. 51 Bi Ripka es ia. Mok ne mnao nai. Maut he in njair na'i nai' Abraham in nanef, tatuin saa' re' UISNENO n'ator nain je.”
52 Anneen on naan ate, nai' Abraham in ate naan, na'bees antea afu, ma ntoit makasi neu UISNENO. 53 Onaim in nait napoit noni mnatu' ma noin muti', ma baer paken amasat, rarit anfee sin neu bi Ripka. In nfee neu bi Ripka in naof ma ainaf amsa' ook-sonu' re' ma'osa'. 54 Rarit nai' Abraham in ate naan, ma in aok-bian sin, nbukaen bu'-bua'. Rarit sin ntupan nbin naan. Noka' on naan ate, sin nfenan. Rarit ate naan natoon neu uim tuaf ein am nak, “Au 'toit mainuan he mkonan kau, karu reko te, hai mfain nai oras ia meu au aam usi'.”
55 Mes bi Ripka in naof ma in ainaf nak, “Hi mmanaap mi'sek-seke' he saa'? Maut he bi Ripka namaik naan nok kai neno bo'es a'saa'. Rarit na' hi mkoen om mok ne.”
56 Mes ate naan nataah am nak, “Koi, ain! Kaisa' mtahan amtein kau! UISNENO nturun anrair kau, tar antea au uteef a'rair 'ok nai' Isak in fee. Onaim ain, hi mifetin kai he hai mfain ma meik rasi ia meu hai aam usi'.”
57 Onaim sin nataah ate naan nak, “Hena te, on nai! Hit taskau bi Ripka he tataan teu ne. In nroimn ii, on mee?”
58 Onaim sin nhaman bi Ripka ma nataan ee mnak, “Ripka! Oras ia, et re' ho. Ho mroim he mok main atoni' ia, oo, ai' on mee?”
Rarit bi Ripka nataah am nak, “Au 'roim he 'ok, tua.”
Nai' Isak ma bi Ripka nmatsaon
59-60 Rarit sin nafetin bi Ripka, ma in ate re' n'uurs ee na'ko in aan'-ana', he nnaon bu'-bua' nok nai' Abraham in aten naan. Onaim sin naseon bi Ripka neikin tetus-athoen am nak, “Ripka! Maut he reko te, Uisneno nfee ko anah mfa-faun, he ho sufam-kau'm ein namsa'in nifun-nifun. Ma hai mifneek henati' ho sufam-kau'm ein niis sin musun sin imsa'!”
61 Rarit bi Ripka nok in ate naan, sin nakbua' sin abrua' ein, ma nsaen bikaes unta, ma nnao nanin, natuin nai' Abraham in ate sin.
62 Nai' Isak natua et pah Negep. Oras naan, in fe' anfain neem na'ko oe hani' Beer Lahai Roi. 63 Neon maeb es ate, in npoi na'ko in tenas he nna-nao kuun. In nait in matan, ma napen-peen kuun on naan ate, in niit unta puukn es annaon neman.
64 Oras bi Ripka nkius niit nai' Isak te, in nsaun rabah na'ko in unta. 65 Onaim in nataan nai' Abraham in ate naan am nak, “Aam, atoni' re' annao neem re' nee, sekau?”
Ate naan nataah am nak, “Nai' Isak es re' nee.” Onaim bi Ripka nait in po'uk ma nsakteun he nkuub naan in human.