Nai' Abraham napoi usif Abimerek
20
Rarit nai' Abraham nanani' na'ko Mamre, nnao neu pah Negep et pasa' haa'-nua. In natua nbi kuan Kades ma kuan Sur sin atnaank ein. Mes ka 'roo fa on naan ate, in natnani ntein neu kuan Gerar. 2 Ma in natonan abitan kuan naan am nak, ain Sara' naan, in fetof. Es naan ate, nai' Abimerek, usif Gerar, nreek tuaf ma ntaam antoit bi Sara'. Rarit sin neik je neu uisf ee in sonaf.Rarit UISNENO nasnasab bifee ahoni' ma nakiuba' bifee munif, na'ko usif Abimerek in too nggwin, natuin in ntoup naan nai' Abraham in fee.a
3 Fai jes, Uisneno nakriir On anbi mneit neu usif naan. In na'uab am nak, “Ho he mmaet een! Natuin ho mtoup maan atoni' in fee!”
4-5 Mes nai' Abimerek nataah am nak, “Usi'! Au ka 're'-reo' 'iit fa bifee naan. Ma au ka 'saan fa msa'. Nai' Abraham neikn on natoon am nak, in fetof! Bifee naan anmanaku' on re' naan amsa'. Es naan ate, au 'reek tuaf ma ntaam antoot je nok neek akninu'. Onaim Usi' kais musaan kau, tua!”
6 Onaim Uisneno nataah am nak, “Batuur. Au uhiin 'ak ho nekam naan kninu'. Ma Au es re' a'kahe' ko he kaisa' mreo' bifee naan. Nok ranan naan ate, ho ka musanab fa meu Kau. 7 Oras ia, mnona' mufani' bifee naan meu in mone. Atoni' re' naan, Au mafefa kninu'. Onaim amtoot je he n'onen henati' ho kaisa' mmaet. Mes karu ho ka mnona' mufani' fa bifee naan, ho mumnau murek-reko'! Ho mok ho too nggwin of anmaet sapu'-sapu'.”
8 Kik-kiku te, uisf ee no'en in ameupt ein oke', ma nareta' in amneit naan. Onaim sin aar sin namtaun. 9 Rarit uisf ee no'en nai' Abraham, ma nataan ee mnak, “Au 'tao 'saan ko saa', es ho mmoe' he hai msiraak om? Ho kais mupoi on re' naan. 10 Ho mutenab saa', es ho mmoe' on re' ia?”
11 Onaim nai' Abraham nataah am nak, “Aam usi'! Au 'baiseun. Au utenab 'ak hi ar-arki ka mihiin fa Uisneno. Onaim hi of mi'maet kau, he msao au fee. 12 Au u'uab batuur, 'ak bi Sara' naan au feto'. Hai nua kai ama' mese', mes es-es ate mi'ain kiim. Es na' hai matsao on re' ia. 13 Onaim oras Uisneno nreek kai he mpoi mi'ko hai kuan, ma mnao mi'roo-'roo meu kua-'teta', au utoon ain 'eu au fee ji m'ak, ‘Hit tbi mee-mee jah, karu atoni' natanan anmatoom nok hit nua kit, ma karu ho mneek kau te, mutaah am mak, hit meu fetof-naof.’”
14-16 Rarit usif Abimerek nnona' nafani bi Sara'. Onaim in na'uab nok bi Sara' mnak, “Oras ia, au 'baen roi muti' fua' niuf gwes 'eu ho na'o, he njair tanar am nak, au ka 'saan fa saa'-saa' 'eu ko. Maut he aar pah ii nahinin on re' naan!”
Rarit uisf ee na'uab neu nai' Abraham am nak, “Abraham! Au pah ii mainuan neu ko. Ho mroim he mutua mbi mee-mee jah, es re' ho.” Rarit in nfee ne bijae, 'bibi, ma 'bib-kase. In nfee ne ate msa', et atoni' ma bifee.
17-18 Oras uisf ee nnona' nafani' bi Sara' neu in mone, nai' Abraham an'onen he Uisneno nfei bifeen nggwin naan sin 'aupk ein. Ma sin bisa nahoin ein antenin.b