Abitan Sodom sin maufinu
19
Oras Uisneno fe' na'uab nok nai' Abraham, In ameupt ein re' tua nua' ein naan, annaon nkonon neun kota Sodom. Sin ntean ne te, maans ee he noi nmouf gwen. Oras naan, nai' Rot fe' ntoko nbi eno' he ttaam teu kota naan.a In niit tua nua' ein naan ate, in nnao nseun sin. In nri'tuu ma na'ruri' nbi sin maatk ein. 2 Rarit in na'uab am nak, “Sin ama' aar ki! Au uskau ki he mkoen om iim meu au uim je fe', tua. Maut he hi mifaun ma mtuup maan fai jes ambi ia. Nneis noi nmeu te, na' hi mnao mkoon, tua.”Mes sin natahan am nak, “Makasi, tua. Mes ho kais muhaeb om! Maut he hai mtuup ambi kota ia in amneran.”
3 Mes nai' Rot anfuri' sin piut, tar antea sin nromin he ntuup antaahn ein anbin in umi. Onaim nai' Rot sin ntunun utunu', ma nabaarb ein bukae, ma sin nbukaen bu'-bua'. 4 Oras sin fe' ka ntupan fa fe'e te, atoin ein Sodom, ana'-ko'u neman oke'. Sin nhaken nfuun naan nai' Rot in umi. 5 Sin nhuun ein ma nakan nai' Rot tafi'-tafi' am nak, “Hoe, Rot! Atoin nua' ein fe'e na, etan mee? Mupoit sin neman, hai he mi'babi' sin!”
6 Onaim nai' Rot anpoi, rarit na'eek eno'. 7 In na'uab am nak, “Aok-bian aar ki! Hi kaisa' mmoe' re'uf on naan meu au tamun ia. 8 Bait hi mneen fe'! Au aan feotn ii, tuaf nua. Sin muin rek-rekon, ma ao 'temef fe'. Maut he au 'nona' ki sin. Hi he minsaa' sin imsa', es re' hi. Mes hi kaisa' mmoe' saa'-saa' meu au tamun ia. Tatuin hit haart ii te, au ro he 'panat sin.”
9 Mes atoin Sodom sin nkoa' ein am nak, “Ho kaisa' mseor mok! Ho atoin amnemat. Ho atoin sona'. Onaim ho ka mmui' fa hak he m'ator kai. Reko nneis ho mu'roo mu'ko bare ia. Karu kaah fa te, hai mmoe' re'uf meu ko, anneis na'ko meu tua nua' ein naan!” Rarit sin ntitar ma nsapar napasib nai' Rot. Ma sin aar sin bu'-bua' nnaon he ntuut nareu' eno'.
10 Mes taum nua' ein naan, nsoron napoitan sin a'niimk ein ma nheer nataam nai' Rot neu uim je nanan, ma sin na'seni' eno'. 11 Rarit sin naforob atoin Sodom re' abitan eno', etun sin nabre-reon gwah he namin eno'. Mes sin ka niit ee fa.
Uisneno napoit nai' Rot sin na'ko Sodom
12-13 Rarit taum nua' ein naan, nak nai' Rot am nak, “Rot! UISNENO nahini nrair abitan kota ia sin maufinun. Onaim In nreek kai he iim mireu' main kota ia. Onaim ho mmu'i mteni' asar bian et kota ia, ai' kaah? Karu nmui' aan mone, aan feto, aan nanef, ai' sekau-sekau. Meik sin ampoi nai mi'ko kota ia!”
14 Onaim nai' Rot annao na'uab nok atoin munif nua re' nafrei in aan feotn ee, mnak, “Amneen mirek-reko'! Oras ia, maen ampoi rabah mi'ko kota ia nai! Natuin UISNENO he nareu' niis kota ia!” Mes sin nateenb ein nak ai' nai' Rot napoi.
15 Neis noi nmeu te, Uisneno In ameupt ein naan, na'seke' nai' Rot sin he naen anpoin rab-raab nai. Sin na'uab ein am nak, “Rot! Amfeen nai! Meik ho fee, ma ho aan feot nua' ein naan, maen ampoi misaitan kota ia nai. Kais-kaisa' hi mmaet ruum-ruum, ma mimreu' bua'-bua' mok kota ia.”
16 Mes nai' Rot fe' he na'eokb on. Te kaah, amneon ii, UISNENO he nsoi nafetin naan ee. Etun es taum nua' ein naan ansaok naan nai' Rot in a'niman, in fee, ma in aan feot nua' ein naan, he napoitan sin na'kon kota naan. 17 Onaim tuaf es na'ko re' taum nua' ein naan, nak, “Maen miheer, he mmoin! Kaisa' mniik! Kais misnaas ambi mnera'! Maen amsae meu 'to'ef nee he hi mmoin!”
18 Mes nai' Rot nataah am nak, “Koi, aam! Kais on naan, tua! 19 Ho mturun kai he hai mmoin. Mes a'to'ef nee, na'roo! Kais-kaisa' hai ka mtea maan fa nee te, amreu't ii napein kai nbi raan atnana', tua. 20 Amkius miit. Anmui' naan kuan aan es ka na'roo fa na'ko ia. Kuan re' nee, ka mateka' fa, natuin in aan'-ana'. Onaim karu ho mromi te, maut he hai m'ain naa, hena' hai mmoin, tua.”
21 Onaim in nataah am nak, “Reko! Amnao nai! Au of ka ureu' fa kuan re' naan. 22 Oras ia, hi maen nai meu kuan naan! Natuin au of ka 'moe' saa'-saa' fa fe', karu hi ka mtea fa fe'.” Anmurai na'ko oras naan, atoni' nteek kuan naan nak, Soar, re' in a'moufn ii nak ‘ana'’.
Kota Sodom ma Gomora nputu nmaten
23 Oras maans ee nsae te, nai' Rot sin ntean Soar. 24 Nok askeken, UISNENO n'opa' uur-ai ma bariri re' anpiin, ansaun neem na'ko neno neu kota Sodom ma kota Gomora. 25 UISNENO nout nakrati' koat ein naan ok-oke' ma kuan ein re' anbin bare naan, ma are' kanan amonit, et mansian, mu'it, ma hau anbin naan.
26 Oras nai' Rot sin naenan, in fee je, anniik. Nok askeken ate, in njair nii masik.
27 Noka' kik-kiku te, nai' Abraham anfani nteni' neu bare re' afi naa in nhake ma ntabar UISNENO. 28 Onaim in napene nsaun neu Sodom ma Gomora ma karopu mneer ko'u naan oke'. In nkisu te, maus ein nsaen on neon gwe kbo'es-akbo'es anbi mee-mee. Ma ai pina' naan nout niis are' saa'-saa'.
29 Onaim oras Usi' nout nakrat-rati' koat ein naan, In namnau In rais manba'an neu nai' Abraham. Etun In nturun ma napoit nai' Rot na'ko bare re' In nareu' gwe naan.
Nai' Rot am in aan feton
30 Oras naan, nai' Rot namtau he natua nabaar anbi kuan Soar. Es naan ate, in nok in aan feot nua' ein naan, nanain ein neun a'to'ef. Rarit sin natuan nbin nuat es.
31 Neot es, in aan feot unu, nak in oirf ee mnak, “Anbi bare ia, nfuun am nateef ka tiit-tiit fa atoni' he nsao kit. Ma ka 'roo fa te, hit ama' namnais kuun een, ma ka namsa'i ntein fa heen. 32 Onaim reko nneis, hit tamauf hit ama'. Rarit hit ttuup tokn ee. Maut he hit tamsa'ib hit ama'.”
33 Fain ite, sin na'inu' sin aamf ee nok tua min-kase, tar anmafu nmaet. Rarit feot uun ee nnao ma ntuup nok in amaf. Mes a'naef ee nmafu nmaet, onaim in ka nahiin fa neu in nmoe' saa' nok in aan feto.
34 Anmeu nfiin ite, feot unu naan, natoon neu in oirf ee mnak, “Fiin ii na, au 'tuup a'rair 'ok hit ama'. Mabe' ia, ho sapaam. Hit tamafu ttein hit ama', rarit ho mtaam amtuup mok ne. Nok ranan naan, hit nua kit of tahoni' ma ttaur hit ama' in sufan.”
35 Mabe' naan, sin namafu nteni' 'naef. Rarit aan feot aheit susu, nnao ma ntuup nok in amaf. Mes a'naef ee nmafu nmaet, onaim in ka nahiin fa neu in nmoe' saa' nok in aan feto.
36 Nok ranan naan, sin nua sin na'aup ein na'kon sin aam honif. 37 Rarit nai' Rot in aan feot unu nahoni' ri'aan moen jes. Feot unu naan nakanab in anah naan, nai' Moap (re' he noi huma' mese' on re' kata es anteni', in a'moufn ii ‘neem na'ko ama'’). In es re' njair aam uuf neu atoin Moapas oras ia. 38 Rarit aan feot aheit suus gwe, nahoni' ri'aan moen jes. In nakaanb ee, nai' Ben Ami (in a'moufn ii ‘ri'ana' na'ko au nggoa’). In es anjair aam uuf neu atoin Amonas sin oras ia.b