Tuaf teun neman ma nateef nok nai' Abraham
18
Oors es, nai' Abraham natua npaumaak hau kou' gwin Mamre. UISNENO neem ma nakriir On neu ne. In reetn ii on nai: neno naan, maans ee mapuutn ii kah een, onaim nai' Abraham ntook ma nmainenu nbi in teens ee in enon. 2 Oras nai' Abraham nait matan on naan ate, in niit tuaf teun nhaken nbin naan. Onaim in naen anseun sin. In nri'tuu, 3 ma in na'uab neu sin am nak, “Sin aam ein! Karu reko te, au uskau he tkoen nok teem teu hi ate kau au tenas ia. Maski mbukae oe ruum-ruum ahaa msa', reko tua. 4 Sin ama' ki aar ki misnaas akre'o mbi haun gwin sin maofk ein. Maut he au aten sin neikin oe ma nafaun ki. 5 Au 'nao ubarab bukae 'eu ki, maut he hi mipein ha'tanis akre'o, hena' hi mkoen om amkoon. Au 'mariin, he 'tuthae 'aan ki, tua.”Rarit sin natahan am nak, “Reko, tua. Hai meis mok naan, tua.”
6 Rarit nai' Abraham naen antaam neu tenas naan, ma natonan bi Sara' mnak, “Rabah! Mait maan uut arekot, sauk gwes. Ammoe' maan kit utunu'.”a
7 Rarit in naen neu in bijae nggwin, ma npiir naan bijae apokat aan es. In nreun in ameupt es he nroor gwe ma nahaan in sisin. 8 Rarit nai' Abraham annao nait susu, suus aritas, ma siis hana' re' fe' nahaan anrair je, rarit in neik sin neu amneem fe'un naan. Oras sin nbukaen ate, in nhake nbi hau gwes uun ma ntuthae sin.
9 Onaim sin nataan ee mnak, “Abraham! Ho fee bi Sara' et mee?”
Rarit in nataah am nak, “Et teens ee naan ee, tua.”
10 Onaim tuaf es na'ko sin teun ein naan na'uab am nak, “Of anmanfain on re' ia te, Au 'fain 'uum. Oras naan, ho fee bi Sara' of nahoni' nrair ri'aan moen jes.”
Oras sin na'uab ein on naan ate, bi Sara' nneen na'ko eon' ee 'kain. 11 Oras naan, nai' Abraham ma bi Sara' sin namnasin re'-reu'f een. Bi Sara' ka napeni ntein fa funan. 12 Anneen sin uabk ein on naan ate, bi Sara' nmain neek aah. In natenab am nak, “Hmmh! Au umnais re'-reu'f een. Saa' anteni', au moen je nma'nuur re'-reu'f een. Nok ranan mee kah, he hai aom ein anmonin on re' amatsao feu'n ee, he mipein anah?”
13 Rarit UISNENO nataan nai' Abraham am nak, “Nansaa' am es bi Sara' nmain? In natenab nak ai' saa' re' Au u'uab ee ia of ka njair fa, natuin in namnasi, oo? 14 Au re' ia, UISNENO! Ka tiit tain fa saa' es re' Au ka bisa 'moo' je fa. Mumnau murek-reok, oo! Karu Au 'fain 'uum toon amnemat, bi Sara' of nahoni' nrair ri'aan moen jes.”
15 Anneen on naan ate, bi Sara' namtau. Rarit in npeen mates am nak, “Au ka 'main kuuk fa, tua!”
Mes Uisneno nataah am nak, “Fe'e na ho mmain batuur ate.”
Nai' Abraham antabar Uisneno he kais anhukun abitan Sodom
16 Rarit tua teun ein naan nnaon nkonon neun kota Sodom. Nai' Abraham annao nasain sin ntean raan atnana'. Antean naan ate, sin napeen niit kota Sodom. 17 Rarit UISNENO natenab am nak, “Reko nneis, Au utoon 'eu nai' Abraham am 'ak, Au he ureu' kota Sodom. 18 Natuin nai' Abraham in suufk ein of nma'baab ok tar namfaun, ma njarin uuf es, re' ma'tani'. In of anjair amneik tetus-athoen amsa' neu are' kanan uuf anbi pah-pinan ia. 19 Au 'piri 'rair je, he in nanoni' in aanh ein ma tuaf bian antein, he natuin UISNENO In raan ee piut, ma nmonin nok neek amneot ma amnonot. Karu sin nmo'en on re' naan ate, Au rais manba'an 'eu sin of nateab on.”
20 Onaim UISNENO na'uab neu nai' Abraham am, nak “On nai! Au 'neen a'rair too mfaun ein nsakoina' abitan kota Sodom ma kota Gomora sin maufiunk ein. Sin baiseek ein een. 21 Etun Au 'saun 'uum, he 'iit nok Au matak ma uhiin are' saa'-saa' re' Au 'neen sin naan, batuur, aa oo, ai' kaah. Karu kaah fa te, Au of uhini msa'.”
22 Oras UISNENO fe' na'uab nok nai' Abraham, tua nua' ein naan sin nnaon nkonon neun kota Sodom. 23 Nai' Abraham nsiri' npaumak-maak Uisneno, rarit in nbaisenu ntaabr Ee mnak, “Koi, Aam Usi'! On mee? Ho he mureu' atoin reko ma atoin re'uf no mese' nani, oo? 24 Karu nmui' tua reko bo' niim (50) nbin kota naan, Ho he mureu' sin oke' msa', aa oo? Ai' Ho ka mureu' fa kota naan, natuin Ho mneek sin. 25 Aam Usi'! Kaisa' mmoe' on naan! Kais-kaisa' atoin rekon naan nmaten amsa', oras Ho mureu' atoin maufinus sin. Aam Usi', Ho es amjair Afeek Rasi et neno tunan ma pah-pinan. Es naan ate, Ho meikn Om muhiin mak re' naan ka namneo fa, tua.”
26 UISNENO nataah am nak, “Karu Au upein tua reko bo' niim anbin kota Sodom, Au ka 'hukun fa kota naan, natuin Au 'neek sin.”
27 Nai' Abraham na'uab anteni' mnak, “Aam Usi'. Kais muto'on kau, tua. Reko te, au he u'uab a'teni'. Au re' ia suma mansian amonot. Au ka uhiin fa saa'-saa', tua. 28 Tareta', karu ka ntea fa tua reko bo' niim, mes suma tuaf bo' haa mniim aah, on mee, tua? Karu nkuurn ahaa tuaf niim ate, on mee? Ho he mureu' kota naan fe'e, oo?”
Uisneno nataah am nak, “Karu Au upein tua reko bo' haa mniim anbin kota naan, Au ka 'eu he ureu' gwe fa.”
29 Rarit nai' Abraham antabar anteni' mnak, “Karu suma tua reko bo' haa te, on mee, Aam Usi'?”
In nataah am nak, “Karu Au upein tua reko bo' haa, Au ka 'hukun sin fa.”
30 Nai' Abraham na'siti' ntein am nak, “Aam Usi', kais mutoo', tua. Mes karu suma tua reko bo' teun gwah, on mee, tua?”
In nataah nak, “Karu Au upein tua reko bo' teun, Au ka 'hukun sin fa.”
31 Rarit nai' Abraham na'siti' anteni' mnak, “Aam Usi', kais mutoo', tua. Au he utaan a'teni' kre'o. Karu suma tua reko bo' nua gwah, on mee, tua?”
In nataah antein am nak, “Karu nmui' tua reko bo' nua, Au ka 'eu fa he 'hukun kota naan.”
32 Nai' Abraham nasoup in haan totis am nak, “Aam Usi'. Au u'siti' haef es anteni', mes kais muto'on kau, tua. Karu suma nmu'i haa tua reko bo'es, on mee, tua?”
In nataah amsa' am nak, “Karu Au upein tua reko bo'es anbin naan, Au ka ureu' fa kota naan.”
33 Na'uab anrair on naan ate, UISNENO nnao nkoon. Onaim nai' Abraham antebi nfain.