3 Onaim nai' Abram nri'tuu ma na'ruri' tar ntea afu. Rarit Uisneno na'uab ankono mnak, 4-5 “Au 'moe' rais manba'an 'ok ko, on nai: ho of amjair aam uuf meu uuf amfaun. Es naan ate, ho kanam naan ka nai' Abram fa heen (re' in oetn ii nak ‘amaf re' mateka'’), mes nai' Abraham (re' in oetn ii nak ‘aam uuf neu uuf amfaun’). 6 Au of a'moe' ho sufam-kau'm ein amfau-rutun. Au of uhakeb uuf namfau u'ko sin, ma usif amfaun of anpoin ma nboran na'ko sin.

7 Au 'naa' uher-heran rais manba'an ia 'ok ko ma ho sufam-kau'm ein. Rais manba'an ia nabar-baar, natuin Au re' ia, Uisneno 'eu ko ma 'eu ho sufam-ka'um sin. 8 Au of a'fee pah Kana'an ok-oke' 'eu ko ma 'eu ho sufam-ka'um sin. Oras ia, ho suma mutua mtaah naah. Mes of ho sufam-kau'm ein npaar pah Kana'an ia, tar antea nabar-baar. Ma Au of a'jair sin Uisneon goa msa'. 9-10 Mes ho mok ho sufam-kau'm ein ro he mnaa' miher-heran rais manba'an ia. Atoin ein ok-oke' ro he na'heir ein. 11-13 Anmurai oras ia, are' atoni' re' nmoin naan neno faun neiki nsae, ro he na'heir ein. Ho mok ho nonot-asar, ho ameupt ein oke', ho aten re' ho msoos maan sin nbin pah bian, hi aar ki ro he mi'heri'. 'Heri' naan, anjair tanar nak hit nua kit hit rais manba'an ia mamarak anbi hi aom ein. 14 Atoni' mee ja re' ka na'heri' fa te, ka napein fa paa' ma nama' anbi Au rais manba'an, ma ka maso'ik fa nbi Au too.”

15 Rarit Uisneno ntuut In uaban am nak, “Anmurai oras ia, ho kaisa' mteek amtein ho fee je te mak Sarai, mes mak Sara'. 16 Au of a'fee tetus-athoen 'eu ain Sara', he in nahoni' nfee ko ri'aan moen jes. Tebe! Ain Sara' of anjair ain uuf neu uuf amfaun. Ma usif amfaun of anpoin ma nboran na'ko in sufan.”

17 Onaim nai' Abraham anri'tuu ma na'ruri' tar antea afu. Mes anbi in nekan naan ee te, in main. In natenab am nak, “Atoni mnais re'-re'uf on re' au, toon nautn es, of upein ri'ana' on mee? Ma ain Sara' re' nmoin toon bo' seo gwen, ma namnais re'-reu'f een amsa', in bisa nahoni' on mee?” 18 Onaim in nbaiseun Uisneno mnak, “Usi'. Maut he nai' Isma'el es anpaar au pusaak ein. Ka saa'-saa' fa, tua.”

19 Mes Uisneno nataah am nak, “Kahaf! Ho fee bi Sara' of nahoni' ri'aan moen jes. Ho mukaanb ee, nai' Isak. Au rais manba'an naan of nateab on neu ne, ma neu in sufan-kau'n ein, tar antea nabar-baar. 20 Au 'neen a'rari msa', saa' re' ho mtoot je meu nai' Isma'el. Es naan ate, Au 'fee ne tetus-athoen ma Au 'moe' in sufan-kau'n ein namfaun. A'naak uuf bo'es am nua of anboran na'kon in sufan-ka'un sin. Ma in sufan-ka'un of anjarin pah kou' gwes. 21 Maski on naan amsa', Au rais manba'an ia, nmafuut nok ahaa ho anah nai' Isak. Anmanfain on re' ia te, bi Sara' of nahoins ee.” 22 Na'uab anrair on naan ate, Uisneno naneuk Gon na'ko nai' Abraham.

23-27 Neno naan amsa', nai' Abraham nmoe' natuin Uisneno In aprenat. Onaim in na'heri'. Rarit in na'heri' nai' Isma'el, ma atoin ein abitan in uim je nanan. In na'heri' atoin aten amsa'. Oras naan nai' Abraham anmoin naan toon bo' seo mseo (99), ma nai' Isma'el toon bo'es am teun (13).