Ain Hagar ma in anah nai' Isma'el
16
1-3 Oras naan, nai' Abram anfain neem een na'ko pah Masir, ma natua naan toon bo'es een anbi pah Kana'an. In fee bi Sarai, ka nahoni' fa fe'. Bi Sarai nmui' aet bifee jes, na'ko pah Masir, in kaann ee, bi Hagar.Neot es, bi Sarai nak in moen je mnak, “Aam! UISNENO n'eek au apuk. Reko nneis, ho mtuup mok au ate bi Hagar, maut he au 'mui' anah.”
Onaim nai' Abram natuin in fee je hanan. Rarit bi Sarai nfee bi Hagar he nai' Abram anpana' sin. 4 Rarit nai' Abram antuup nok bi Hagar. Ma bi Hagar na'apu'. Mes oras bi Hagar nahiin neu in na'apu' te, in nabeo'. In ka na'paarn on fa neu ain Sarai.
5 Onaim ain Sarai na'uab nok in moen je mnak, “Au es a'fee ko ate naan he njair ho fee. Mes oras in ntaiboko te, in ka nkisu ntoom kau fa. Ia ho ras-rasim! Anbain he UISNENO es nafeek hit rasi. Maut hena' ho muhiin!”
6 Rarit nai' Abram nataah am nak, “On nai! Au 'sao ko nahuun. In namuin. Onaim ho es re' he mupreent ee. Es naan ate, ho he mmoe' saa'-saa' meu ne te, es re' ho!” Rarit ain Sarai nmurai nha'mui' bi Hagar, tar antea bi Hagar naen nasaitn ee.
7 In naen antea baer ruumn es. Onaim UISNENO In ameput neno tunan es neem nateef ee nbi bare re' npaumaak oe mata' nbi ranan he nnao neu Sur. 8 Rarit in nak, “Hoe! Hagar, ain Sarai in ate! Nansaa' am es ho es ia? Ho mu'ko mee, ma he mnao meu mee?”
Onaim bi Hagar nataah am nak, “Au 'aen usaitan au ain usi'.”
9 Rarit UISNENO In ameput naan na'uab nok ne rek-reko mnak, “On nai! Reko nneis ho mfain meu ho ain usi'. In nmoe' ko on mee msa', mtoup gwe. 10 Kais mumtau. Au of a'moe' ho sufam-kau'm ein amfau-rutu, tar antea ka maso'ik fa. 11 Oras ia, ho mu'apu'. Ka 'roo fa te, ho of muhoni' ri'aan moen jes. Ho ro he mukaanb ee, nai' Isma'el (re' he noi namnees nok kata es, re' in a'moufn ii nak ‘Uisneno nneen’), natuin UISNENO nahini nrair ho susat ma nana'renat. 12 Mes oras ri'ana' naan na'nae, in of anmoin na'roo na'ko in orif-tataf sin. Natuin in on re' bikaes fui, re' ka nroim fa he natuin aprenat. Sekau-sekau msa', in nraban sin. Ma are' atoin ein of anraban nafain' ee oke'.”
13 Anneen anrair on naan ate, bi Hagar natenab anbi in nekan, nak, “Au 'iit a'rair UISNENO, re' In niit ma npanat kau.” Rarit in nmurai nteek Uisneno npaek kanaf, “Usi' re' nfairoir kau.” 14 Etun atoni' nakanab oe mata' naan, Beer Lahai Roi, (re' in a'moufn ii, “Oe mata' na'ko Usi' Amonit, re' anfairoir kau.”) In baern ee et kuan Kades ma kuan Beret sin atnaank ein. Oras ia, oe mata' naan fe' etan.