Uisneno nmanba'an nok nai' Abram
15
Rarit UISNENO nakriir On neu nai' Abram, ma na'uab am nak, “Abram! Ho kais mumtau. Au es a'panat ko u'ko ho musun. Ma Au 'fee ko mnisat ko'u.”2-3 Mes nai' Abram nak, “Koi, Usi'. Maski Ho mfee kau saa'-saa' nathoe, noki-noki te, ruman. Natuin au ka 'mui' fa anah he nfain au sufak. Onaim au 'mui' pusaak amfaun he saa'? Namuni te, au ate nai' Eliaser atoin Damsik naan es anpaar sin.”
4 Mes UISNENO nataah am nak, “Ka on naan fa! Ho aanh aan kuum of es re' antoup pusaak naan. Ka ho ate naan fa.”
5 Onaim In neik nai' Abram anpoi, rarit In nak, “Ho mbaiseun miit on neon gwe! Amkius miit akfuun ein naan. Ho msoi' maan sin ii, oo? Ho sufam-kau'm ein of amfau-rutu on re' kfuun ein naan!”
6 Onaim nai' Abram antebes UISNENO In uaban naan, rarit UISNENO nsoi' je ntaam atoin neek amne'o, natuin nai' Abram anpirsai Je.
7 Rarit UISNENO ntuut antein In uaban naan am nak, “Au re' ia, Uisneno. Au es re' 'eik ko mpoi mu'ko ho kua-mnasi' Ur et pah atoin Kasdimas sin. Ma Au es re' 'fee bare re' ia, njair ho auf pusaak.”
8 Mes nai' Abram nataan am nak, “Mes on mee, UISNENO? Nok ranan mee te, na' au uhini m'ak bare ia njair au auf pusaak aa?”
9 Onaim In nataah am nak, “On nai! Uum he hit ttao taan moe't es, he tfuut saa' re' Au u'uab ee fe'e na. Oras ia, ho mnao mait mu'it meu Kau: mait bijae ainf es, 'bib ainf es, ma 'bib-kaes keos gwes. Sin re' naan ro he toon ten-teun gwah. Rarit ho mheek maan kor-otos es, ma kor-keif jes.”
10 Onaim nai' Abram annao nheek mui't ein naan oke'. Rarit in roor sin, ma nkaah anbait mui't ein naan. Rarit sin siisk ein, in n'ator sin ranan nua nmaktun-tuin ein anbin afu, es ate anbani' neu in bian. Mes koorn ein in ka nkaah sin fa. 11 Rarit koor amneuk siis puun ein neman he nroi neik naan sisin re' naan. Mes nai' Abram anriu' sin.
12 Oras maans ee nmouf, nai' Abram antuup anfiin. In namnei mnak, meis'ookn ii nkuub naan ee. Ma in namtau nmaet.
13-15 Rarit Uisneno na'uab neu ne mnak,
“Abram! Ho of ammoin tar amtea mumnais ma mnu'ir re'-re'uf, ma ho of ammate mbi neek mamut, onaim sin of ansuub ko nok rek-reko.
Mes ho sufam-kau'm ein of annaon njarin atoin amnemat nbi uuf bian sin pah.
Kua-tuaf abitan pah naan of na'aet sin, na'peni' ma nha'mui' sin, tar antea toon natun haa.
Mes Au of a'hukun abitan pah naan.
Rarit Au of 'eik upoitan ho sufam-kau'm ein na'kon bare naan, ma sin of neikin baer pusaak amfau-rutu.
16 Au of a'ator he ho uup-ka'um batan niim amneemt ein, sin anfain neman neun bare ia ntenin.
Oras ia, atoin Amoris sin natuan esan bare ia. Atoin ein ia amoe' reu'f ein, mes fe' ba-baun.
Neot es ate, karu ho uup-ka'um sin anfain neman ntean bare ia te, Au of a'paek sin he 'hukun ureu' atoin Amoris sin. Natuin oras naan, sin maufiunk ein kah een.”
17 Anfai on naan ate, nok askeken, a'nai konat es napoitan masu', ma paku 'nopo' es anpiin, sin nnaon npeo' sisin naan sin atnaank ein. 18 Oras naan, UISNENO nahakeb rais manba'an nok nai' Abram nak, “Au 'ba'an 'ain, Au of a'fee bare ia 'eu ho sufam-kau'm ein, nmurai na'ko noe Masira tar antea noe Efrat, 19 ma atoin Kenis sin pah, atoin Kenas sin pah, atoin Katmons sin pah, 20 atoin Hetes sin pah, atoin Feris sin pah, atoin Refaimas sin pah, 21 atoin Amoris sin pah, atoin Kananas sin pah, atoin Girgasis sin pah, ma atoin Jebus sin pah.”