Nai' Abram annao ma nok nafani' nai' Rot na'ko makenat
14
Oras naan, usif haa nabuan. Sin esan re': Amrafel, usif pah Sinear; Ariok, usif pah Elasar; Kedarlaomer, usif pah Elam; ma Tidear, usif pah Goyim. 2 Oras naan amsa', usif niim antein nabuan. Sin esan re': Bera, usif pah Sodom; Birsa, usif pah Gomora; Sinap, usif pah Adema; Semeber, usif pah Seboim; ma Bela, usif pah Soar. Rarit uis haa' ein naan anmakenan nok uis niim' ein naan. 3 Uis niim' ein naan nabuan nok sin soraurs ein anbin karopu mneer ko'u Sidim, (re' oras ia sin nteek ee nak, Tasi 'Maten).4 Makenat naan, na'uub on na'ko rasi re' ia: unu' te, usif Kedarlaomer naprenat uis niim' ein naan, toon bo'es am nua. Mes toon bo'es am teun ii ntaam ate, sin nmurai nraban usif Kedarlaomer.
5 Oras toon bo'es am haan ii ntaam ate, usif Kedarlaomer nok usif teun, neman nok sin soraurs ein. Onaim sin nmakenan ma niis pah-pah bian sin, esan re': atoin Refaimas et pah Asterot-Karnaim, atoin Susimas et pah Ham, atoin Emimas et pah Sawe-Kirjataim, 6 ma atoin Horis re' et a'to'ef Seir ntean baer ruman El Paran in ninin. 7 Rarit sin ntebi nfanin neun En Mispat (re' oras ia, in kaann ee Kades). Rarit sin nkuaas atoin Amalekas sin pah, ma nkuaas atoin Amoris re' natuan nbin pah Haseson-Tamar.
8-9 Rarit uis niim' ein naan an'ator sin soraurs ein nbin karopu mnera' Sidim. Onaim sin nmakenan nraban uis haa' ein naan. 10 Anbi mnera' naan, anmui' tepas ter amfaun. Oras makenat naan, usif Sodom ma usif Gomora nok sin soraurs ein, anfeen naenan. Bian anmoufu ntaman neun tepas ter ein naan. Ma bian naenan neun a'toe'f ein. 11 Onaim uis haa' ein re' nisan nbin makenat naan, nasiik naan ma neik are' bare' ma mnahat na'ko Sodom ma Gomora. Rarit sin ntebin nfanin.
12 Oras naan, nai' Abram in anah nai' Rot natua et Sodom. Onaim uis haa' ein naan anheek neik nai' Rot sin, ma nasiik neik sin baer' ein ok-oke'.
13 Mes anmui' tuaf es anfosuk naan on. Onaim in naen natonan nai' Abram, atoin Ibranis. Oras naan, anmui' atoin Amoris es, kaann ee nai' Mamre. Nai' Abram natua npaumaak nai' Mamre in hau kou' gwin. Nai' Mamre in aok-bian ein, esan re' nai' Eskor ma nai' Aner. Sin nua sin, nai' Abram in soob rekon. 14 Oras nai' Abram ntoup hanaf nak atoin ein anheek neik in oirf ee aanh ee te, in nabuaba' in atoin ameupt ein re' nmakeen nahinin. Sin aar sin natun tenu mbo'es am faun (318). Rarit sin nriu' natuin uis haa' ein naan na'roon ntean kuan Dan, et pasa' ponain.
15 Anbi naan nai' Abram nbait in ameupt ein naan anjarin pukan-pukan. Oras fai on naan ate, sin ntaman ntaisibun atoin ein naan, mes bian naenan. Rarit nai' Abram nok iin na, nriu' sin ntean kuan Hoba, et kota Damsik in pasa' ponain. 16 Rarit nai' Abram napein nafani' nai' Rot, in ameupt ein, ma in baer' ein oke', ma nafetin tuaf bian amsa'.
Nai' Melkisedek nateef nai' Abram. In re' naan, usif ma a'naak pirsait neu Uisneno
17 Oras nai' Abram anfain neem na'ko makenat re' in niis naan uis haa' ein naan ate, usif Sodom neem anseun nggoe nbi karopu mnera' Sabe (re' atoin ein nati' te, nteek ee nak, Mnera' Usif). 18 Oras naan, nai' Melkisedek usif kota Salem,a ma in a'naak pirsait amsa' neu Uisneno re' A'raat re'uf. In neem neik utunu' ma tua min-kase neu nai' Abram. 19-20 Rarit in nfee tetus neu nai' Abram am nak, “Maut he Uisneno re' A'raat re'uf naan, re' nmoe' neno tunan ma pah-pinan naan, anfee tetus-athoen neu ko. Pures ma bo'is neu Uisneno, re' nfee ko rasi mnisat na'ko ho musu sin!”
Rarit nai' Abram nfeen usif Melkisedek baits es na'ko bait bo' na'ko are' saa'-saa' re' in nasiik nafani' sin.
21 Rarit usif Sodom anbaiseun nai' Abram. In na'uab am nak, “Aam Abram. Baer' ein re' ho musiik meik sin mu'ko au musun naan, maut he ho mpaar sin. Mes au 'toit ufain ahaa, au too nggwin.”
22 Mes nai' Abram nataah am nak, “Au 'suup a'paek Uisneno A'raat re'uf, re' nmoe' neno tunan ma pah-pinan In kaann ee, 23 m'ak, au of ka 'ait fa baer saa'-saa' es u'ko ho baer' ein naan. Maski abas tuka' mese' msa', au of ka 'ait fa, tua. Nok ranan naan, neot es ate, ho ka bisa mu'uaba' fa mmak, ‘Au es umu'ib nai' Abram.’ 24 Au ka 'roim fa saa'-saa'. Suma bare' mee ja re' au ameupt ein anpake nrair sin ate, ho kais mutenab amtein sin nai. Ma maut he au soob teun ein ia, nai' Aner, nai' Eskor, ma nai' Mamre, nait neik sin sapaak ein, tua.”