Nai' Abram ma nai' Rot anbaits ok
13
Rarit nai' Abram nasaitan pah Masir, he ntebi nfain neun pah Negep. In neik in fee, ma in baer pusaak ein oke'. In oirf ee anah nai' Rot nok amsa'. 2 Nai' Abram naan, atoin amu'it. In mui't ein amfau-rutu. Noni mnatu' msa', mfaun.3 Na'ko Negep in natnan-nain he nfain on kuan Betel ma kuan Ai sin atnaank ein. Unu' te, in natua nbi naan. 4 Ma in nbaik mei fuat amsa'. Rarit in na'ruri' ma na'bees neu UISNENO nbi bare naan.
5 Nai' Rot, re' nok nai' Abram naan, nmui' mu'it amsa'. In mui't ein amfaun. Ma in nmui' ameput namfau msa'. 6-7 Mes bare naan ka mainuan reko fa neu nai' Abram ma nai' Rot sin. Natuin sin a'mui'k ein namfaun, etun sin ka bisa fa he nmoin nabuan. Onaim nai' Abram ma nai' Rot sin atuuks ein anmatoen, natuin huun re' nbi bare naan ka nanokab fa neu sin mui't ein. (Oras naan, atoin Kananas ma atoin Feris fe' natuan nbin naan amsa'.)
8 Onaim nai' Abram nak neu in anah nai' Rot am, nak “Rot! Hit nua kit umi nanan. Nati' hit nua kit kaisa' tmatenab, ma hit atuuks ein amsa' kaisa' nmatoen piut. 9 Reko nneis hit nua kit atbaits ok. Bare ia, mainuan fe'. Onaim karu ho mpiir bare nbi pasa' ponain, henat au 'ait abit pasa' haa'-nua. Mes karu ho mpiir bare nbi pasa' haa'-nua, henat au 'ait abit pasa' ponain.”
10 Rarit nai' Rot ankisu nfuun am nateef. Ma in niit karopu mneer ko'u noe Yarden re' oe ji nho-hoe, ntea kuan Soar. Bare naan in amrian ii on re' UISNENO in po'on, ma on re' pah Masir. (Oras naan, UISNENO fe' ka nareu' fa kota Sodom ma kota Gomora. Etun bare naan reko fe'.) 11 Onaim nai' Rot anpiir naan bare nbi karopu mneer ko'u noe Yarden naan. Ma nua sin anbaits ok. Rarit nai' Rot annao n'ain pasa' maans ee 'saen. 12 Mes nai' Abram natua nabaar anbi pah Kana'an. Nai' Rot annao natua nbi kuan-kuan re' anhaumaak kota Sodom et karopu mneer ko'u noe Yarden. 13 Mes abitan kota Sodom naan, atoin aburaurt ein. Ma sin ka nfairoir fa UISNENO msa'.
14 Oras nai' Rot ma nai' Abram anbaits ok, UISNENO nak nai' Abram am nak, “Abram! Ho mkius mutef-tefan miit bare-bare mu'ko bare re' ho mhaek naan. Amkius murek-reko' 'rii-'ne'u, koti-mmaat. 15 Au of a'fee afu bare-bare re' ho mkius sin naan, 'eu ko ma 'eu ho sufam-kau'm ein, he njarin sin auf pusaak tar antea nabar-baar. 16 Au of a'moe' ho sufam-kau'm ein he nfain too mfaun on re' snaen anbi tais je ninin. Tar atoni' ka nsoi' nabei' sin fa msa'. 17 Oras ia, ho mnao mnoon bare-bare re' ho miit murair sin naan, natuin Au he 'fee sin 'eu ko!”
18 Rarit nai' Abram sin natnanin, ma nfain natua ntein' ein nbin hau kou' gwin Mamre, npaumaak kuan Hebron. Rarit in nbaik mei fuat, onaim na'ruri' ma na'besan neun UISNENO nbin naan.