Uisneno no'en nai' Abram
12
Oras naan, UISNENO na'uab neu nai' Abram am nak, “Abram! Ho mnao musait ho nonot-asar, ho ama' in umi, ma ho kuan. Ho mnao meu baer jes, re' Au of ukriir ee 'eu ko.2 Au of a'fee tetus-athoen 'eu ko.
Ma ho sufam-kau'm ein of amfau-rutu,
ma of anjarin uuf ma'tani', tar ho kanam naan of mateka'.
Rarit ho mjair atoin amneik tetus meu atoin sona'.
3 Au of a'fee tetus 'eu tuaf-tuaf re' nfee tetus neu ko.
Mes Au of a'fee kasat 'eu tuaf-tuaf re' nkaas ko.
Amneen murek-reko'!
Are' uuf-uuf anbi pah-pinan ia of napenin tetus, natuin ho.”
4-5 Oras naan, nai' Abram anmoin naan toon bo' hitu mniim (75). In neik in fee bi Sarai, ma orif nai' Haran in anah nai' Rot, ma in baer pusaak ein ok-oke', ma ameupt ein in uim je nanan re' in napein sin anbin kota Haran. Onaim nai' Abram annao nasaitan kota Haran, neu bare re' UISNENO nba'an anrair je he nakriir ee neu ne. Sin nnaon nkonon ntean pah es, in kaann ee, pah Kana'an.
6 Antean bare naan ate, nai' Abram sin annoon gwe nfuun am nateef, tar sin mpaumakan ntean kuan Sikem. Rarit sin natuan ntaahn ein anpaumaak hau kou' gwes et More. Oras naan, abitan Kana'an fe' natuan nbin naan. 7 Anbi bare naan, UISNENO nakriir On neu nai' Abram. In na'uab am nak, “Au of a'fee bare ia 'eu ho sufam-ka'um sin.” Rarit nai' Abram nbakin mei fatu he njair mei fuat neu UISNENO re' nakriir On anbi naan.
8 Rarit nai' Abram sin nanain ein bare. Sin nnaon neun a'to'ef et pasa' haa'-nua. Rarit sin natua ntaahn ein nbin kuan Betel ma kuan Ai sin atnanak. Anbi bare naan, in nbaik mei fuat, ma na'bees neu UISNENO. 9 Rarit sin natnan-nain bare, na'ko baar jes neu baar jes, ntean pah Negep et Kana'an pasa' haa'-nua.
Nai' Abram annao neu pah Masir
10 Neot es, amnahas ma'tani' antaman pah Kana'an. Es naan ate, nai' Abram sin nnaon na'roo ntein' ein neu pasa' haa'-nua, ntean pah Masir. Sin natuan ntaahn ein anbin naan. 11 Oras sin he ntaman neun pah Masir, in na'uab neu in fee bi Sarai mnak, “Sarai, ho maas maan reokn ii kaah! 12 Onaim karu abitan pah Masir niit ho maasm ii te, sin of na'maet kau, natuin au re' ia ho mone. Onaim sin of ansao ko. 13 Onaim reko nneis, ho mutonan sin am mak, au re' ia, ho na'o. Nok ranan naan, sin ka neu nroor kau fa, mes sin of nok kau te, reko, natuin sin nroim ko.”
14 Onaim oras nai' Abram sin ntean pah Masir, abitan naan niit ain Sarai in masan arekot naan. 15 Oras usif pah Masir in atuta'-abha'et sin niit ee te, sin nboi's ahaa bifee naan nbi uisf ee in matan. Onaim sin neik bifee naan neu uisf ee in sonaf. 16 Onaim usif naan nok nai' Abram nmonin reko, natuin bi Sarai. Rarit uisf ee nfeen nai' Abram bijae, bikaes keledai, bikaes unta, 'bibi, ma 'bib-kase. Uisf ee nfee sin ruum aah. In nfee ate neu nai' Abram amsa', et bifee ma atoni'.
17 Mes natuin uisf ee nataam atoni' in fee nbi in sonaf, es naan ate, UISNENO nhukun usif naan. Etun uisf ee napein hukun huma'-huma', et in ma in uim je naan ee msa'. 18 Rarit uisf ee no'en nai' Abram ma nataan ee mnak, “Abram! Ho mmoe' kau on mee? Nansaa' am es ho ka mutoon fa mmak bifee ia, ho fee ja? 19 Mes ho mak in re' ia, ho feto'! Aar akre'o te, au 'sao! Amtoup mufani' ho fee. Oras ia, meik je ma mpoi maen mimneuk nai! Au ka 'iit a'tein ki fa mbi bare ia!” 20 Rarit uisf ee naprenat in ameupt ein he nriu' napoitan nai' Abram ma in fee, ma sin baer' ein ok-oke'. Sin ro he nasaitan bare naan.