3-4 Sin aar sin anma'akoran am nak, “Hoe! Aok-bian aar ki! Iim he hit tafena' kuuk kota kou' gwes. Onaim hit tmoe' faut me'e, rarit hit tout sin tar naheran. Hit taktuta' fatun naan ma traem sin tpaek ter. Rarit hit tahake' koat ma'uim fatu mnaun es anbi kota ko'u naan in nanan. Koat ma'uim fatu naan, in a'puupn ee ansutrai neno, henati' hit mateka' kit. Ma maut he hit tjair uuf kou' gwes, ma kaisa' tbaits ok.”

5 Onaim UISNENO nsaun neem ma nnoon kota ma koat ma'uim faut maktuta mnaun a'ratas re' mansian ein naan nafeen ee. 6 Rarit In na'uab am nak, “Sin re' ia, uuf mese' ma uab mese'. Saa' re' sin nmoo' je oras ia, fe' nfaat noon. Noka'-nmeu, karu sin aar sin nmafutun njarin mese' on re' oras ia, sin of nabe'in he nmo'en saa'-saa' ahaa. 7 Reko nneis Hit tsaun he trikrakan sin uab, he njair uaba' huma'-huma'. Maut henati' es-es ate ka nahiin fa es in uaban.”

8 Rarit Uisneno nsanu ma nrikrakan sin uab. Nok ranan naan, In nmoe' mansian ein ansiksakn ok neun are' bare nbin pah-pinan. Onaim sin ka nafena' nakonob fa kota naan. 9 Natuin UISNENO nrikrakan sin uab, ma nsiksakan sin neun are' bare nbin pah-pinan, etun sin nakanab kota naan Babel (re' he noi huma' mese' on re' kata es, re' in oetn ii ‘taka'nana'’).

10 Nai' Sem in suufk ein esan re' ia: oras noe sako' naan namsau toon nua, nai' Sem anmoin naan toon nautn es (100), in nahoni' ri'aan moen jes, ma nakaanb ee nai' Arpaksat. 11 Rarit in nmoni ntein toon natun niim (500) fe', ma in nahoni nteni' ri'aan mone ma ri'aan feto.

12 Oras nai' Arpaksat nmoin naan toon bo' tenu mniim (35), in nahoni' ri'aan moen jes, ma nakaanb ee, nai' Sera. 13 Rarit nai' Arpaksat nmoni ntein toon natun haa mtoon teun (403) fe', ma in nahoni nteni' ri'aan mone ma ri'aan feto.

14 Oras nai' Sera nmoin naan toon bo' teun (30), in nahoni' ri'aan moen jes, es re' nai' Eber. 15 Rarit nai' Sera nmoni ntein toon natun haa mtoon teun (403) fe', ma in nahoni nteni' ri'aan mone ma ri'aan feto.

16 Oras nai' Eber nmoin naan toon bo' tenu mhaa (34), in nahoni' ri'aan moen jes, es re' nai' Pelek. 17 Rarit nai' Eber nmoni ntein toon natun haa mbo' teun (430) fe', ma in nahoni nteni' ri'aan mone ma ri'aan feto.

18 Oras nai' Pelek anmoin naan toon bo' teun (30), in nahoni' ri'aan moen jes, es re' nai' Rehu. 19 Rarit nai' Pelek nmoni ntein toon natun nua mtoon seo (209) fe', ma in nahoni nteni' ri'aan mone ma ri'aan feto.

20 Oras nai' Rehu nmoin naan toon bo' tenu mnua (32), in nahoni' ri'aan moen jes, es re' nai' Seruk. 21 Rarit nai' Rehu nmoni ntein toon natun nua mtoon hiut (207) fe', ma in nahoni nteni' ri'aan mone ma ri'aan feto.

22 Oras nai' Seruk anmoin naan toon bo' teun (30), in nahoni' ri'aan moen jes, es re' nai' Nahor. 23 Rarit nai' Seruk nmoni ntein toon natun nua (200) fe', ma in nahoni nteni' ri'aan mone ma ri'aan feto.

24 Oras nai' Nahor anmoin naan toon bo' nua mseo (29), in nahoni' ri'aan moen jes, es re' nai' Tera. 25 Rarit nai' Nahor nmoni ntein toon nautn es bo'es am seo (119) fe', ma in nahoni nteni' ri'aan mone ma ri'aan feto.

26 Oras nai' Tera nmoin naan toon bo' hitu nneis, in nahoni' ri'aan mone teun, esan re': nai' Abram, nai' Nahor, ma nai' Haran.

27 Nai' Tera in sufan-kau'n ein, esan re' ia: nai' Tera in aanh ein, nai' Abram, nai' Nahor, ma nai' Haran. Nai' Haran nahoni' ri'aan moen jes, es re' nai' Rot. 28 Nai' Haran nmate nbi in kua mnasi' Ur, et pah atoin Kasdimas. Oras in anmaet, in amaf nai' Tera nmoin fe'. 29 Nai' Abram ansao bi Sarai. Nai' Nahor ansao nai' Haran in aan feto, bi Milka. Nai' Haran nahoni' ri'aan moen jes amsa', es re' nai' Jiska. 30 Mes bi Sarai nkiu.

31 Neot es, nai' Tera neik in anah nai' Abram, in aan nanef bi Sarai, ma in upuf nai' Rot. Sin npoin ma nnaon nasaitan sin kua-mnasi' Ur. Oras naan, sin he nnaon neu pah Kana'an. Mes antean pah Haran, sin natuan nbin naan.

32 Anbin naan, nai' Tera nmaet, oras in nmoin naan toon natun nua mtoon niim (205).