Nai' Noh ma nai' Yafet sin sufa'-ka'uf sin
10
Noe sako' naan namsau nrair on nai te, nai' Noh in aanh ein nmurai nahoin ein. In napein sufaf na'ko nai' Sem, nai' Yafet, ma nai' Ham.2-5 Nai' Yafet in suufk ein esan re': nai' Gomer, nai' Magok, nai' Madai, nai' Jawan, nai' Tubal, nai' Mesek, ma nai' Tiras. Es-es ate nok in uab, in uuf, ma in pah.
Nai' Gomer in suufk ein esan re': nai' Askenas, nai' Rifat, ma nai' Togarma.
Nai' Jawan in suufk ein esan re': nai' Elisa, nai' Tarsis, abitan Kitim, ma abitan Dodanim re' natuan et tais je ninin.a
Nai' Ham in sufan-ka'un
6 Nai' Ham in suufk ein, esan re': nai' Kus, nai' Misraim, nai' Put, ma nai' Kana'an.b
7 Nai' Kus in suufk ein esan re': nai' Seba, nai' Habira, nai' Sapta, nai' Raema, ma nai' Sapteka.
Nai' Raema in suufk ein esan re': nai' Seba ma nai' Dedan.
8 Nai' Kus in aan moen je, es re' nai' Nimrot. Atoni' re' ia, meo pa'e ahun-hunut re' ma'tain besi. 9 In ma'tanin naan amneemn ii na'ko UISNENO, tar antea in nfain aseok reok gwes. Etun sin ntekan nee te, nak, “Maut he ho mjair aseok reok gwes on re' nai' Nimrot, re' napein in ma'tain ee na'ko UISNENO.” 10 Nahunu te in pah ee nmurai na'ko Babel, Erek Akat, ma Karne. Baren re' ia sin etan pah ko'u Sinear.c 11 Na'ko naan in nhainua ntein in kua-prenat antea Asur. Rarit in nafena' kota Niniwe, kota Rehobot-Ir, kota Kara, 12 ma kota Resen, re' et Niniwe ma Kara sin atnaank ein. Baren naan, pah ko'un.
13 Nai' Misraim in suufk ein, esan re': abitan Rudim, abitan Ananim, abitan Rehabim, abitan Naftuhim, 14 abitan Patrusim, abitan Kasruhim, ma abitan Kaftorim. Abitan Kasruhim naan, esan re' atoin Filistinas sin beif-na'if sin.
15 Nai' Kana'an in aan moen uun gwe es re' nai' Sidon. Nai' Kana'an anfain aam uuf neu atoin Hetes, 16 atoin Jebusis, atoin Amoris, atoin Girgasis, 17 atoin Hibisas, atoin Arkis, atoin Sinis, 18 atoin Arbadis, atoin Semaris, ma atoin Hamatis.
Nai' Kana'an in suufk ein ansei jok ntean bare 'roo-'roo, 19 tar antea sin a'naakt ein nmurai na'kon kota Sidon nkoon kuan Gerar ntean pah Gasa. Na'ko naan, nkoon neun kota Sodom, kota Gomora, kota Atma, ma kota Seboim, tar antean kota Rasa.
20 Sin aar sin re' naan, nai' Ham in sufan. Es-es ate nok in uab, in uuf, ma in pah.
Nai' Sem in sufan-ka'un
21 Nai' Yafet in tataf nai' Sem anjair abitan Eber sin aam uuf.d
22 Nai' Sem in suufk ein, esan re': nai' Elam, nai' Asur, nai' Arpaksat, nai' Lut ma nai' Aram.
23 Nai' Aram in suufk ein, esan re': abitan Us, abitan Hur, abitan Geter, ma abitan Mas.e
24 Nai' Arpaksat in aanh ee, es re' nai' Sera. Nai' Sera in aanh ee, nai' Eber.
25 Nai' Eber napein ri'aan mone nua. Atoin kou' gwe, kaann ee nai' Pelek (re' in a'moufn ii ‘batis ai' sisa'et’), natuin oras naan, mansian ein anbaits ok neu are' bare-bare nbin pah-pinan. In oirf ee, kaann ee nai' Joktan.
26 Nai' Joktan in suufk ein, esan re': nai' Armodat, nai' Seref, nai' Hasar-Mabet, nai' Jera, 27 nai' Hadoram, nai' Usar, nai' Dikra, 28 nai' Obal, nai' Abimaer, nai' Seba, 29 nai' Ofir, nai' Habira, ma nai' Jobap. Sin aar sin re' ia, nai' Joktan in sufan.
30 Bare-bare re' sin natua nggwin, anmurai na'kon Mesa nkono ntean Sefar, esan re' baer ma'toe'f ein et pasa' neon-saet.
31 Sin aar sin nai' Sem in sufan. Es-es ate nok in uab, in uuf, ma in pah.
32 Sin aar sin ok-oke', nai' Noh in sufan-ka'un, es-es ate nok in uuf aa kuun. Oras noe sako' naan namsau, sin re' ia es re' ansei jok ma nbaits ok ma naheun pah-pinan.