Uisneno nahakeb rais manba'an nok nai' Noh
9
Uisneno nfee tetus-athoen neu nai' Noh ma in fee-anah sin. In na'uab am nak, “Hi mihoni' ma mimsai' he miheun pah-piin ii mtein. 2 Mui' fui nggwin ma koro, ika' of namtausan ki. Au 'nona' sin 'eu ki. 3 Hi bole meuk mui't ein naan sin siisk ein on re' hi bole miah ai' meuk hau fua' sin. Au 'fee are' saa'-saa' ein re' ia 'eu ki.4 Mes hi kais meuk sisi re' in naa' ee ka nsai npoi fa fe', natuin mui't ein sin a'moink ein et naa' naan.
5-6 Au 'moe' mansian ii natuin Au huumk am Au masak, Au moe'k am Au taos. Es naan ate, kais amroor mansian. Karu nmui' tuaf, ai' mu'it, na'maet mansian, hi ro he mi'maet je msa'. Prenat re' ia, neem na'ko Kau. 7 Hi ro he mihoni' ma mimsai', he miheun pah-piin ii mtein.”
8 Uisneno ntuut In uaban naan am nak, 9 “Oras ia, Au he uhake' manba'an 'ok ki tar antea hi sufam-kau'm ein imsa'. 10 Rais manba'an re' ia nmatoon nok are' kanan amonit amsa'. Esan re': mui' aem, mui' fui, ma koro. Para' te, apoit ein re' nok ki na'ko bnao naan in nanan. 11 Au rais manba'an naan, on nai: Au ka 'fee 'teni' fa noe sako' he nmemun na'maet are' kanan amonit anbin pah-pinan ia.
12-13 Au 'tao Au eons ee 'bi neon gwe he nfain tanar. Enous naan, of namnauba' Kau 'eu Au rais manba'an ia re' ka natfeek niit fa 'eu ki, 'eu amoint ein ok-oke', ma 'eu pah-pinan ia msa'. 14-17 Karu nmui' nope nbi neno, rarit eons ee npoi, in of namnauba' Kau mnak: noe sako' of ka nare'u nteni' fa are' amoint ein nbin pah-pinan ia. Nok ranan naan, Au rais manba'an abar-barat ia, nmafuut piut nok ki, ma nok are' kanan amonit.”
Nai' Noh anmauf tua min-kase
18 Nai' Noh in aanh ein re' npoin na'kon abnao naan esan re': nai' Sem, nai' Yafet, ma nai' Ham. (Nai' Ham naan, es re' nai' Kana'an in amaf). 19 Mansian pah-pinan ia ok-oke', amneemk ein na'kon nai' Noh in aan teun ein re' ia.
20 Nai' Noh naan, atoin tani. In es re' aroe hau anggur ahun-hunut. 21 Neot es, nai' Noh niun raur anggur tar antea nmauf ka nahiin jon fa. Onaim in nhoro' nain in paken, rarit in ntuup natneen af-aaf aah nbi in tenas. 22 Oras nai' Ham antaam ate, in niit in aamf ee ntuup aaf aah. Onaim in naen anpoi, ma nnao natonan in tataf, nai' Sem ma nai' Yafet. 23 Rarit sin nua sin naitin tais ma npira' na'ratan tais naan anbi sin haunk ein. Rarit sin nnaon ntet-kotin ntaman neun tenas naan, ma nkuub naan sin amaf. Sin ka niit fa sin aamf ee 'maen. Rarit sin npoin nfanin.
24 Oras nai' Noh in mauf gwe oke', in nahiin in aan moen aheit suus gwe in a'mo'en. 25 Rarit in na'uab am nak, “Hoe! Kana'an amaf! Au 'kaas ko! Ho of amfain ate meu sin ho tata'!
26 Pures-bo'is neu UISNENO, natuin nai' Sem!
Mes nai' Kana'an anjair nai' Sem in aan renu'.
27 Maut he Uisneno anfeons am anhainua ntein nai' Yafet in pah.
Ma in suufk ein nmonin nbin mamut ma rame' nok nai' Sem in sufan.
Mes maut he nai' Kana'an anjair nai' Yafet in aan reka'.”