Auf gwi nmurai nmeot
8
Mes Uisneno ka nnika' fa nai' Noh ma are' mui't ein anbin abnao naan. Onaim In npaek anin he nfuu nameit oe naan. 2 In nkeeh nain oe maat ein, ma nasnasab uran. 3 Onaim oe naan ansaun piut. Neno nautn es bo' niim (150) namsoup on nai te, oe naan in asraatn ii nheer on a'kre'o. 4 Nateef fuun hiut ii ntaam neno bo'es am hiut on nai te, bnao naan na'rae't on nbi 'toe' a'raats es, kaann ee, Ararat. 5 Oe naan ansaun piut. Oras naan fuun bo' ii ntaam neno mese', a'toe'f ein sin a'puupk ein mamniit ein een. 6 Ankoon na'ko neno bo' haa on naan ate, nai' Noh nasoit abnao naan in eno sneer. 7 Rarit in nafetin kor-kaa' es. Koro naan natpeen neu-mneem tar antea oe naan ansaun batuur-batuur. Ma in ka nfain fa on abnao naan. 8 Onaim nai' Noh nafeti' ntein kor-kefi he nriun ma nahiin niit kar-karu ai' oe naan nmeit inrair. 9 Mes oe naan fe' nmemun pah-pinan, etun koro naan ka napein fa bare he ntook. Onaim in nfain on abnao. Nai' Noh annona' in a'niman, ma ntoup nataam koro naan anfain neu bnao.
10 Nai' Noh anpao ntein neno hiut. Onaim in nafeti' ntein kor-kefi naan. 11 Maans ee nmaeb on naan ate, kor-kefi naan anfain neem. In nteo neik hau noo saitun es. Rarit nai' Noh nahiin nak oe naan ansaun batuur een. 12 In npao ntein neno hiut. In nafeti' ntein kor-kefi naan. Mes neot re' ia, kor-kefi naan ka nfain neem af.
13 Fuun mees ii ntaam neno mese', oras nai' Noh nmoin naan toon natun nee mtoon mese' (601), oe naan anmeit inrair. Nai' Noh nasoit antein' eno sneer. In napeen ete, auf gwi nmeto nrair. 14 Anbi fuun nua' ii ntaam neno bo' nua mhiut, afu naan anmeto nkoon gwen.
15 Rarit Uisneno nreun nai' Noh am nak, 16 “Noh! Oras ia, hi msaun nai mi'ko bnao naan. 17 Misanut mui't ein naan ok-oke'! Esan re': mui' aem, mui' fui, anonok, ma koro. Maut he sin namsa'in, he naheun pah-pinan.”
18-19 Rarit nai' Noh, in fee, in aanh ein, ma in aan naenf ein, ansanun oke' na'kon abnao naan. Mui't ein naan ansanun amsa', es-es ate natuin in nonot.
Nai' Noh anfee fua'-turu' he nseun banin Uisneno In manekan
20 Rarit nai' Noh nbakin fatu he ntao mei fuat neu UISNENO. Na'ko mui't ein re' nabei' he npaek sin anjarin fua'-turu', nai' Noh nheek mes-mese'. Rarit in nroor sin ma nout sin anbin mei fuat, he njair tanar nak in nasaeb seun-banit neu UISNENO. 21 Oras UISNENO nafoi niit fua'-tuur' ein naan sin foo meink ein, In nmariin. Onaim In natenab am nak,
“Anmurai oras ia, Au ka 'kaas a'teni' fa pah-pinan natuin mansian ein sin 'moe' re'uf. Maski sin nateenb ahaa rais re'uf na'kon aan'-ana', mes Au of ka ure'u 'tein fa are' kanan amonit, on re' Au fe' ureu' urair je naan. 22 Anbi oras pah-pinan ia fe'e nbi naa, oors ein nanaob ok piut, natuin ahaa sin atreek ein. Esan re': oras senat ma sekit, oras mainikin ma maputu', oras fauk-nais ma uur napu, fai ma manas.”