Noe sako'
7
Rarit UISNENO na'uab neu nai' Noh am nak, “Au 'kisu 'bi mee-mee, mes arahaa ho mmees-mees jah es neek amne'o. Onaim ho mok ho fee-anah sin mtaam nai meu bnao naan. 2-3 Na'ko are' kanan mu'it re' sin siisk ein nabei' he hi meuk sin, ma re' nabei' he hi mifuat sin meu Kau, ho mutaam pasan hit-hiut meu bnao naan. Na'ko are' kanan koro ho mutaam pasan hit-hitu msa'. Mes mu'it bian anteni' ho suma mutaam pasan mes-mees' aah. Nok ranan naan, mui't ein naan, anjarin on re' fini neu sin suufk ein, he sin nmonin amsa'.4 Mumnau murek-reko'! Aar neno hitu te, Au of usanut uran re' ka nasnaas niit fa, tar antea neno bo' haa ma fai bo' haa. Au 'paek ranan naan, he u'maet 'ain are' amoint ein nbin auf meto', re' Au 'mo'e 'rair sin.”
5 Rarit nai' Noh nmoe' natuin on re' UISNENO In aprenat naan oke'. 6 Oras noe sako' naan nsae te, nai' Noh nmoin naan toon natun nee jen (600). 7 Rarit nai' Noh nok in fee, ma in aanh ein, ma in aan naenf ein, ntaman neun bnao naan, he sin nsoi naan ok. 8-9 Nai' Noh natuin UISNENO In aprenat naan, onaim in nataam are' kanan koro ma mu'it, es-es ate nok nain in bian, na'ko mu'it re' he mansian bole neuk sin siisk ein, ma na'ko mu'it re' ka bole fa he neuk sin siisk ein. 10 Neno hiut namsopu te, noe sako' naan neem ma nmurai nmemun pah-piin ii no mes-mese'.
11 Oras nai' Noh anmoin naan toon natun nee (600) mfunan nua mneno bo'es am hiut on naan ate, noe saok gwi nmurai ntaam. Oras naan on re' neon gwe natfe'i, es na' oe ji nat'oop aah. Ma are' oe maat ein anpe'en rafu'-rafu' ma npuran napoitn ein oe. 12 Onaim uran naan ansaun ka nasnaas niit fa, fai-manas, tar antea neno bo' haa.
13 Mes neno naan, nai' Noh, in fee, in aanh ein teun sin, esan re': nai' Sem, nai' Yafet, ma nai' Ham, ma in aan naenf ein ntaman oke' neun abnao naan. 14 Sin ntaam nabuan nok mui' aem ein, mui' fui nggwin, mui' anoonk ein, koron, ma mu'it bian re' manini' msa'. 15-16 Pasan mese'-mese' na'ko are' amoint ein, ntaam nabuan nok nai' Noh nbin abnao, natai nok saa' re' Uisneno napreent ee.
Oras sin ntaman nrarin oke' te, UISNENO neikn On na'eek ma na'retu' bnao naan in enon.
17-19 Uur ko'u naan nsaun piut, tar antea neno bo' haa. Onaim noe sako' nsae piut tar antea bnao naan natboe. Oe ji nsae piut tar nmemun naneuk 'to'e mnaun ein oke'. 20 Oe naan nsae piut, tar in a'raatn ii meter hiut nneis na'ko 'to'e mnaun re'uf.