Maufinu na'ko mansian
6
Oras naan, mansian ii mfau-rutu. Ma sin nmonin nsisae'n ok nbin are' bare-bare. Sin nahoin ein ri'aan feto msa'. 2 Uisneno In aan monena niit ri' feot munif mansian ein ate, ro maas reu' fein. Onaim sin es-es ate nnao nsao ri' feto mee re' in romi. 3 Rarit UISNENO nak, “Au 'hae 'maet jen nok mansian ii sin a'monit amre'ut. Au Smanak re' namonib sin naan, ka nroim fa he sin nmonin piut.b Sin ro he nmaten. Onaim sin nmoni ntu'un toon nautn es bo' nua gwah (120).”4 Na'ko batan naan, tar batan-batan amunit, atoin hae-brako anmonin nbin pah-pinan.c Oras naan Uisneno In aan moen ein ansao mansian ein sin aan feot muinf ein, ma nahoin ein atoin ma'tani', es re' a'naak makenat, re' mateka' nbin reta' ahunut.
5 Oras naan, UISNENO nkisu te mansian anbin pah-pinan anmo'en re'uf bainesi'. Sin nopaak ein ii arahaa nateenb ein rais amre'ut piut. 6 Onaim UISNENO nme'-mei' Jon, natuin In nmo'e nrair sin, ma natokob sin anbin pah-pinan ia. Rasi naan ro nasusab niis Uisneno. 7 Etun In na'uab am nak, “Es naan ate, Au of ureu' mansian re' Au 'moe' urair sin anbin pah-pinan ia. Au of u'maet are' kanan koro ma mu'it bian amsa'. Au 'mei' Jok ma 'sain Jok, natuin Au 'mo'e 'rair sin.” 8 Mes arahaa nai' Noh, es re' nhariin UISNENO In nekan.
Nai' Noh in retan
9-10 Nai' Noh in reetn ii, on nai: in nmui' aan mone teun, esan re': nai' Sem, nai' Yafet, ma nai' Ham. Nai' Noh anmoin nok neek amne'o neu Uisneno, ma ka nmoe' fa 'moe' re'uf. Oras naan, arahaa in es re' atoin reko. In nmoni nhaumaakb on nok Uisneno.
11-12 Mes Uisneno nkisu te are' kanan mansian ii amoe' re'uf sapu'-sapu'. Anbi mee-mee jah mansian ii namre'u nmaet. Uisneno nkisu te mansian anbin pah-pinan naan, anmoe'n ahaa rais re'uf. 13 Rarit Uisneno na'uab neu nai' Noh am nak, “Au 'iit a'rair mansian ii in a'moe' re'uf anbi bare mee-mee. Onaim Au ufeek urair 'ak, Au ro he ureu' ain pah-pinan ia nok in afan ok-oke'. 14 Es naan ate, on nai, Noh! Oras ia ho mmoe' maan abnao oe kou' gwes mpaek hau ma'tani'. Ho mmoe' ke'en-ke'en anbi bnao naan in nanan. Rarit ho mraep je koti-mnaan meik ter. 15 Ho mmoe' bnao naan in amnaun ii meter nautn es bo' tenu mteun (133); in mainuan tuuk am tuuk meter bo' nua mnua (22); ma in a'raatn ee meter bo'es am teun (13). 16 Mtefi bnao naan, ma mruip je mpaek hau 'been pisa'. Mes mufreiba' tefis naan on re' mete steen es na'ko ruip taan in fafon. Ho mbati bnao naan ktuta' teun. Rarit ammoe' eon es anbi in abnapan.
17 Mumnau murek-reko'! Au of usanut uur noe sako' he nmemun niis are' amonit anbi npah-pinan, tar antea saup tuki'. 18 Mes Au he 'moe' rais manba'an 'ok ko. Ho of amtaam meu bnao naan, mok ho fee-anah, ma ho aan naenf ein.
19-20 Na'ko are' kanan mu'it pah-pinan ia, ho ro he meik mutaam pasan-pasan meu bnao naan in nanan, maut he sin nmonin amsa' on re' ho. Sin esan re': mui' aem, koro, anonok, maut he sin nmonin. 21 Ho ro he mutaam mnahat huma'-huma' meu bnao naan in nanan neu ki ma neu mui't ein naan amsa'.”
22 Rarit nai' Noh nmoe' natuin Uisneno In kabin ma prenat naan oke'.