1-2 Oras Uisneno nmoe' mansian, In nmoe' sin natuin In huumn am In masan In moe'n am In taon. In nmoe' sin atoni' ma bifee. Rarit In nteek sin nak “mansian”, ma In nfeen sin tetus nathoe msa'.

3 Oras nai' Adam in nmoin naan toon nautn es bo' teun (130), in napein ri'aan moen jes. Ri'ana' ia in noes naah in amaf. Onaim in nakanab ri'ana' naan, nai' Set. 4 Rarit nai' Adam nmoin fe' toon natun faun (800). In napeni nteni' ri'aan mone ma ri'aan feto. 5 In nmaet oras in nmoin naan toon natun seo mbo' teun (930).

6 Oras nai' Set nmoin naan toon nautn es toon niim (105), in napein ri'aan moen jes, es re' nai' Enos. 7 Rarit nai' Set nmoin fe' toon natun fanu mtoon hiut (807), ma in napeni nteni' ri'aan mone ma ri'aan feto. 8 In nmaet oras in nmoin naan toon natun seo mbo' es am nua (912).

9 Oras nai' Enos nmoin naan toon bo' seo (90), in napein ri'aan moen jes, es re' nai' Kenan. 10 Rarit nai' Enos nmoin fe' toon natun fanu mbo'es am niim (815), ma in napeni nteni' ri'aan mone ma ri'aan feto. 11 In nmaet oras in nmoin naan toon natun seo mtoon niim (905).

12 Oras nai' Kenan nmoin naan toon bo' hiut (70), in napein ri'aan moen jes, es re' nai' Mahararel. 13 Rarit nai' Kenan nmoin fe' toon natun fanu mbo' haa (840), ma in napeni nteni' ri'aan mone ma ri'aan feto. 14 In nmaet oras in nmoin naan toon natun seo mtoon bo'es (910).

15 Oras nai' Mahararel nmoin naan toon bo' nee mniim (65), in napein ri'aan moen jes, es re' nai' Yaret. 16 Rarit nai' Mahararel nmoin fe' toon natun fanu mbo' teun (830), ma in napeni nteni' ri'aan mone ma ri'aan feto. 17 In nmaet oras in nmoin naan toon natun fanu mtoon bo' seo mniim (895).

18 Oras nai' Yaret nmoin naan toon nautn es bo' nee mnua (162), in napein ri'aan moen jes, es re' nai' Henok. 19 Rarit nai' Yaret fe' anmoni ntein toon natun faun (800), ma in napeni nteni' ri'aan mone ma ri'aan feto. 20 In nmaet oras in nmoin naan toon natun seo mbo' nee mnua (962).

21 Oras nai' Henok nmoin naan toon bo' nee mniim (65), in napein ri'aan moen jes, es re' nai' Metusalak. 22 Rarit nai' Henok in nmoni nmafuut neek nok Uisneno tar antea toon natun tenu ntein. Ma in napeni nteni' ri'aan mone ma ri'aan feto. 23-24 In nmoin ma anneek mees nok Uisneno. Oras in nmoin naan toon natun tenu mbo' nee mniim (365), in ka mamnita' fa, natuin Uisneno nait nasaeb ee.

25 Oras nai' Metusalak in nmoin naan toon nautn es bo' fanu mhiut (187), in napein ri'aan moen jes, es re' nai' Lamek. 26 Rarit nai' Metusalak fe' anmoni ntein toon natun hitu mbo' fanu mnua (782), ma in napeni nteni' ri'aan mone ma ri'aan feto. 27 In nmaet oras in nmoin naan toon natun seo mbo' nee mseo (969).

28 Oras nai' Lamek nmoin naan toon nautn es bo' fanu mnua (182), in napein ri'aan moen jes. 29 Nai' Lamek nakanab ri'ana' naan nai' Noh (re' in haan ee, on re' kata es, re' in a'moufn ii, ‘nfee harinet ma haan maut’), natuin in nak, “Ri'ana' ia of anfee harinet ma haan maut neu hit neek suust ii nbi afu re' napein kasat na'ko Uisneno.” 30 Rarit nai' Lamek nmoin fe' toon natun niim ambo' seo mniim (595), ma in napeni nteni' ri'aan mone ma ri'aan feto. 31 In nmaet oras in nmoin naan toon natun hitu mbo' hitu mhiut (777).