Reta' anmatoom nok nai' Kain ma nai' Habel
4
Neot es, nai' Adam antuup nok in fee bi Hawa. Onaim bifee naan na'apu'. Rarit in nahoni' ri'aan moen jes. Ma in nak, “Au uhoni' upoitan aan ri'aan moen jes, natuin UISNENO nturun kau.” Onaim in nakanab ri'aan mone naan, nai' Kain, (re' in a'moufn ii, ‘napoitan’). 2 Rarit bi Hawa nahoni' ntein ri'aan moen jes. Onaim in nakaanb ee, nai' Habel.Oras sin nua sin na'naen on naan ate, nai' Habel natuuk mu'it, ma nai' Kain ameup rene. 3 Oors es ate, nai' Kain neik in reen ee sin aafk ein bian, ma nafuata' sin neun UISNENO. 4 Nai' Habel neik in a'bib-kaes ainf ein sin aan uun ein amsa'. In nroro 'bib-kasen naan, rarit in natnaat neik sisi 'tuur arekot neu Uisneno. Ankius niit on naan ate, UISNENO nmarinan nai' Habel in fua'-tuur' ein naan. 5 Mes In ka nroim fa nai' Kain in fua'-tuur' ein naan. Onaim nai' Kain nato'o nmaet, tar antea in huum puut batuur-batuur.
6 Onaim UISNENO na'uab nok nai' Kain am nak, “Hoe, Kain! Nansaa' am es ho mutoo' on naan? On mee m'es ho mhuum mpuut on naan? 7 Bait ho mmoe' reko te, Au 'toup ko nok reko. Mes mumnau, goo! Karu ho mmoe' re'uf ate, 'mo'et naan of naah nafani' ko, on re' meo goan nnuu' he nheke knafo. Onaim karu ho mutenab he mmoe' re'uf ate, reko nneis ho mpori' main tenab naan!”
8 Neot es, nai' Kain anfuri' nai' Habel am nak, “Habel! Uum he nua kit atnao on rene.”a Oras sin ntean ate, nok askeken nai' Kain anbeos niis in orif.
9 Rarit UISNENO nataan nai' Kain am nak, “Hoe, Kain! Ho ori' et mee?”
Nai' Kain nataah am nak, “Au ka uhinif! Au es ka 'naa' fa in haen-niman!”
10 Onaim Uisneno na'uab am nak, “Nansaa' am es ho mmoe' rais maufinu on naan? Ho kais mutenab mak ho ori' in naa' ee nmeti nrari nbi auf gwi 'pinan. Au 'iit urair saa' re' ho mmoo' je meu ho ori'! 11 Oras ia, naa' ee nsaena' ko. Oras ho mroor miis ho ori', auf gwi nmuis in naa'. Es naan ate, auf gwi ka nfee nteni' ko fa in afan he ho mmoin. 12 Karu ho mureen, auf gwi of ka nfee ko fa afa' saa'-saa'. Anmurai oras ia, ho of amfain atoes re' mpaisuun om tafi'-tafi' mbi pah-pinan ia.”
13 Mes nai' Kain na'uab neik haan ma'fena' neu UISNENO mnak, “Hae, Usi'! Nansaa' am es Ho mfee maan kau kasat ma'tan-tani' naan? Au ka usaah ubei' je fa! 14 Natuin Ho mri'u mrair kau u'ko bare ia, au of u'roo Ko, tua. Au of a'toe 'bi mee-mee on re' anao-amnemat. Rarit sekau-sekau re' nateef nok kau te, of anroor niis kau, tua.”
15 Mes UISNENO nataah ee mnak, “Ka on naan fa! Sekau es anroor ko, Au 'huukn ee ma'fena' nneis no hiut!” Rarit UISNENO ntao tanar nbi nai' Kain, henati' tuaf sekau-sekau re' nateef nok ne te, nahinin nak sin ka nabei' fa he nroor niis ne. 16 Rarit nai' Kain nnao nasaitan bare naan, na'roo na'ko UISNENO. In nnao ntea baar jes, nbi po'on Eden in pasa' neon-saet. Bare naan in kaann ee, Not, re' in a'moufn ii nak ‘npaisuun’. In natua nbi naan.
Nai' Kain in sufan-ka'un
17 Rarit nai' Kain anmatsao. In fee je na'apu. In nahoni' ri'aan moen jes, ma sin nakaanb ee, nai' Henok. Ma nai' Kain nafena' kuan es. Rarit in nakaanb ee, Henok, on re' in aanh ee kanan. 18 Nai' Henok in aanh ee, es re' nai' Irat. Nai' Irat in aanh ee, es re' nai' Mehujaer. Nai' Mehujaer in aanh ee, es re' nai' Metusael. Ma nai' Metusael in aanh ee, es re' nai' Lamek.
19 Nai' Lamek ansao bifee nua. Es kaann ee bi Ada; es anteni' in kaann ee bi Sila. 20 Ain Ada nahoni' nai' Jabar. In suufk ein anjarin atuuk mu'it. Sin a'moink ein natnan-nain naah, he namin huun neu sin mui't ein. Sin na'umin nbin haa tenas. 21 Nai' Jabar in oirf ee, nai' Jubar. Nai' Jubar in suufk ein anjarin atoin arekut, nfuun bobe, ma 'reku' huma' bian antein.
22 Nai' Lamek in fee bi Sila nahoni' nai' Tubal Kain. In suufk ein anjarin atuut besi. Sin nmo'en bare' huma'-huma' na'ko besi ma noin moro'. Nai' Tubal Kain in feotf ee, bi Na'ama.
23 Neot es, nai' Lamek anboi's on anbi in fee nggwin nua sin. In nak, “Hi mneen rek-reko! Fe' ena ri' moen muinf es anbaan kau, mes au 'baan u'maet ee. 24 Tuaf re' nroor niis nai' Kain, napein hukun no hiut. Mes karu nmui' tuaf re' he nbaras in neek tenab amre'ut neu kau, sin of napenin hukun no bo' hitu mhiut (77).”
Nai' Adam in aanh es anteni', es re' nai' Set
25 Nai' Adam in fee bi Hawa nahoni' naan ri'aan moen jes anteni'. Sin nakaanb ee, nai' Set (re' in a'moufn ii nak, ‘anfee’) natuin ain Hawa nak, “Uisneno nfee ri'ana' ia neu kau he nsenu' nai' Habel, re' nai' Kain anroor niis ne naan.” 26 Nok-noki te, nai' Set ansao. In napein ri'aan moen jes, ma in nakaanb ee, nai' Enos.
Oras naan, mansian ii nmurai na'ruri' ma na'besan neun UISNENO.