2 Gia weri tiama wouwa, Yesus galla Petrus, Jakobus mari Yohanes gilia ging esamma-samma gia mugga liawang gagga wa'ang wanna waai nukku hera tagga gia. Sudana ging tagga ba'a ging billi Yesus awaya gafa'a. 3 Gai lanna su'u miaqqa mang blola. Quqa tagga sa'a in nukku na'a miaqqa gai lanna gsuli waai. 4 Gomaqu, ging billi Yesus galla Elia mari Musa iabirang pating.

5-6 Petrus ina te'i hoyang minna. Petrus galla bingun, ba gang birang ai gafa'a-gafa'a. Gang Yesus Gabirang akku, "Namaang! Sama sa mnaxa, ee! Lebaai ping sama hlacung hathagu ela. Nukku ma hena, nukku bamma Musa gena, mari nukku bamma Elia gena.”

7 Wouwa su'u, bunna cukku gi'ing giatheli. Ni ging watti wa'ang gamang bunna gammi ma akku, "Watti ee! Yesus su'u Nwaqa Nang Ga'ing sayang. Hing gamang watti go-go!”^a

8 Sudana Petrus ina wa'ang gamang su'u watti, ging i'ing billi goyawa, gomaqu ging billi wa'ang dena na wanna waai. Mang Yesus anaqai.

9 Galla su'u Yesus itanapa Ai knii ina mugga su'u cukku. Yesus gialala akku, "Waddi hing anna billi su wa'ang gafa'a giabirang oli. Na'ing sa, Wa'ang gagga Mola-mola. Nang kuddi minna ni. Maqa Nang nola bangnga, ni hing galla wa'ang giabirang.”

10 Yesus Gai lala-gamang su'u ging pinni go-go, ba ging wa'ang giabirang waai. Alima hathagu ithaga akku, "Gang birang ‘maqa Nang nola bangnga’ su gai maksud anna? Tatali, ee?”

11 Ba ging Gathaga akku, "Guru agama ina su birang, ‘Bamma Elia kuddi anna ni, Kristus galla anna.’ Hei, tatali?”^b

12 Yesus giamaragu akku, "Su ecicci! Pithaya Elia e'intula anna yia cxanna ni Kristus Gena. Ga'ing su Latala tula soma Ga'ing tufa. Tatali? Hing yedda mangarti waai anna ba Tuang Latala Ai Tulisan Blela gammi tulis so'al Wa'ang gagga Mola-mola? Ging tulis lamanna akku, maqa Gang anna wa, lee elang Gang sussa sampe ging gafara minna. 13 Hing kuddi hola woru watti go-go, ee! Pithaya Elia ecicci anna wa. Lee ga'ing ela sussa i yawa galanna. Gsuli su'u pithaya ina tula soma ba tulis maiya wa.”

14 Sudana Yesus mari Ai knii hathagu ola gagga dena iatarana, ging billi wa'ang dumma i'ing tuana. Wa'ang dumma ina su'u Yesus Gai knii gafa'a billi ging guru agama ina itanapa birang nukku wa i'ing pinni. 15 Sudana wa'ang dumma ulli Yesus Gsarru, ging riaqqu, ging akku Gang yedda mugga tagga. Ging galla biri gia Gatarana.

16 Yesus githaga akku, "Hing anna ba wa hi'ing pinni?”

17 Wa'ang nukku anna birang akku, "Namaang, watti ni! Nang nwaqa mauwa ga'anna Hang ela gang qauwa ni. Gammi hippi, ba gang birang gasaya. Snara goong ba'a 18 Snara su'u gammi cukku, gang a'ing baqqa ma tlaqa tagga i prutta. Wee su'u galla uyadabbu ga'a da, osing kracci. Ni ga'ing baqqa kanggatta dagi tee cici nissi. Nang Hei knii ina su'u giabanga wouwa gitti snara su'u githialla cukku. Tapi ging ela gasaya.”

19 Watti gsuli, Yesus gidigang akku, "Heh! Hi'ing sa'a mang talallu. Nang hi'ing ajar ta gola-gola, tapi hing mangarti go-go waai. Hing ecicci Na'ing parcaya waai! Nang kuddi hirani sampe tawaddi? Wee su ga sama ma!” 20 Ging galla wee su'u gani ga Yesus ganni wa. Sudana snara ulli Yesus Gsarru, gagga wee su'u i wa mora talaqa tagga attaloka, gai yaqa uyadabbu da.

21 Yesus galla wee su'u gamaang gathaga akku, "Tawaddi ba hwaqa sa'a gsali?”

Gamaang Gamaragu akku, "Pefe'e huuma ba gang gsali. 22 Snara su'u tulla huuma wee sa'a ela minna gaggi. Gang nwaqa sa'a ela harawacci gammi ba'a ta gola-gola, asa gang ga'ing mari iila gammi gadimmu. Ba Hang gomoli ni! Hang bisa ela gang saqqa, Hammi niaia, wee sa ela gang qauwa ni.”

23 Yesus gamaragu akku, "Tatali ba hang birang ‘bisa saqqa’? Nang gopa'i ela qauwa, asal lee parcaya ni!”

24 Wee gamaang su'u hoyang kiarru, gang galla Gamaragu, "Namaang! Na parcaya wa. Nomoli nai parcaya ela cara ma ta'a.”

25 Sudana su'u, Yesus billi wa'ang dumma anna suma i arabbu. Gang snara su'u ga'ing parenta akku, "Heh, snara yeci! Hang cukku wee su ga auwa gia, su'u ni wee su i watti, mari birang qauwa. Hang hola anna wee su gammi cukku oli!”

26 Watti Yesus birang gsuli, snara su'u galla wuara cilaka-laka. Gang ela wee su'u ba'a ga'ing baqqa asicci, ni gang cukku wee su'u ga auwa gia. Wee gammi ga yia gaba, dagi minna wa. Ba wa'ang suma ina su'u birang akku, "Hayee! Gang minna wa!”

27 Yesus wee su'u gathaang pinni, galla ga'ing keri cira. Gang galla cira lamanna.

28 Wouwa su'u, Yesus itanapa Ai knii cira illa su'u ga auwa, ging see nukku gammi wa. Suma inaqai ni, ging Yesus Gathaga akku, "Namaang! Tatali ba wadaqqa ning snara su gathiala gasaya?”

29 Yesus giabirang akku, "Watti go-go! Snara ina su'u ecicci yeci. Ba kalo hing sembayang Latala Gabanga waai, hing snara gsuli ina su githiala gia gasaya.”

30 Wouwa su'u, Yesus itanapa Ai knii ina cira illa su'u ga auwa, galla propinsi Galilea gia. Sudana su'u, Yesus atawaya wa'ang dena klala Gang suma. 31 Gang mang Ai knii ina su'u qai gi'ing ajar gaggi. Gang giabirang akku, "Yung na'a waai, lee Na'ing ga gia wa'ang faqa ga ang. Ging galla Na'ing, Wa'ang gagga Mola-mola sa'a ela Nafara minna. Maqa Nang ecicci minna, gagga atharaqqu. Nang Nola bangnga.”^c

32 Yesus giabirang gsuli ba Gai knii ina su'u i ga kwangnga. Ging galla te'i Yesus Gai maksud tiani waai.

33 Wouwa su'u, Yesus ina apa gia Kapernaum ba'a. Sudana ging see gammi wa, Yesus Ai knii ina su'u gathaga akku, ‘Hing waddi yia bagga su, anna wa tungnga?”

34 Nukku na'a mathuru birang waai akku waddaqa ging yia bagga iatungnga, i'ing gopa'i su'u yamma ba pata ada.^d

35 Yesus galla missi gi'ing ajar akku, "Yamma ba yawa a'ing wa'ang ada, gai bangnga kuddi mola-mola dagi wa'ang camma nissi, su'u ni gang wa'ang gopa'i gi'ing bleta.”^e

36 Ni Yesus knii camma suma nukku gani, galla ola gi thoong wa. Gang giabirang akku, 37 "Yamma ba Nalanna wa'ang camma gi'ing bleta dagi wee sa'a nissi, gai arti, ga'ing na'a Na'ing wa bleta. Ga'ing na'a Namaang Ga'ing wa bleta. Karna Namaang ba Na'ing utus quqqa-yayang tagga sama anna.”^f

38 Wouwa su'u, Yesus Gai knii nukku genu Yohanes protes akku, "Namaang! Weri nukku ning billi wa'ang nukku Henu pinni snara gathiala, Ba ning ga'ing wa qhappi. Ga'ing su pi wa'ang waai.”

39 Tapi Yesus giamaragu akku, "Heh! Hing ga'ing wa qhappi oli. Yamma ba Nenu pinni tanda herang ela, gang Nenu ela yeci waai. 40 Kalo gang pi'ing lawan waai, ga'ing na'a pi wa'ang.^g 41 Hammi ela-ela, ee! Wa'ang dena klala akku, hing Kristus Galanna, ni gang hiomoli, pasti Tuang Latala gai macca su ampata waai. Gang iila too nukku qai mari wa'ang gena wa'a, su'u na'a Latala ga'ing wa ampata waai.”^h

42 Yesus cogi giabirang akku, "Kalo wa'ang dena knii nukku ela gai bangnga yia tmeci galanna, ba gang Na'ing parcaya waai, hing billi-billi, ee! Lebaai wa'ang su bneher ada nukkuⁱ mari gefikili qaya galla ga gia taa thoong gadimmu.

43 Kalo hang indena ela tmeci hathaang pake, hathaang su taxanna cua. Lebaai hang hathaang qhappi qai ga sorga gammi gia, su'u ni lee he'ing mari hathaang raqqu-raqqu cua naraka gammi gia waai.^j 44 [Naraka su'u sangsara gecing. Gai hara su'u tanni na'a waai. Quiya ina suma su'u i naa mang glalla na waai.]^k 45 Kalo hang indena ela tmeci haya pake, haya su taxanna cua. Lebaai hang haya qhappi qai ga sorga gammi gia, su'u ni lee he'ing mari haya raqqu-raqqu cua naraka gammi gia oli. 46 [Naraka su'u sangsara gecing. Gai hara su'u tanni na'a waai. Quiya ina suma su'u i naa mang glalla na waai.]^l 47 Kalo hang indena ela tmeci hatta bagga pake, hatta bagga su doki mari cua! Lebaai hang hatta qhappi qai ga sorga gammi gia, su'u ni lee he'ing mari hatta raqqu-raqqu cua naraka gammi gia oli.^m

49 Nai ajaran sa'a ecicci sulla. Yamma ba yawa Nalanna, gang kuddi millung lalu, dagi dahing leing lee yesi ma ta'a nissi, su'u ni gang issi yung.

50 Yesi su'u, qauwa. Ping ma qarra ela mnaxa gaggi. Kalo yesi ma'a waai wouwa, gagga guna anna? Ping mang mari acua. Hi'ing na'a kuddi dagi yesi nissi, su'u ni hing bangnga wa'ang gopa'i gi'ing sayang.^o

Hing hiyatunnga oli akku yamma ba ada, yamma ba samma.”