Tuang Yesus wa'ang lamma ribbu uthu qarra ma gina naa
(Mateos 15:32-39)
8
1-3 Malla nukku, wa'ang dumma anna i'ing tuana Yesus Gamang watti. Ging Galanna weri htagu wouwa, su'u ba gi qarra galla glalla. Ba Yesus Ai knii ina su'u gitta, ni giabirang akku, "Wa'ang dumma su'u Nammi giaiya. Gi'ing dena havang auwa anna sama i'ing tuana weri htagu wouwa, gi qarra na'a galla glalla wa. Lebaai ging itho'o cikka ola gia oli. Ela-ela ging yia thong ba'a gi.”4 Yesus Gai knii ina su'u Gamaragu akku, "Namaang. Illa sa havang ga auwa. Ping tatali wa'ang dumma gsali sa, qarra gina naa qauwa?!”
5 Yesus ola githaga akku, "Hi roti su bagga ranna?”
Ging Gamaragu akku, "Namaang. Ni Roti bagga israqqu qai sa.”
6 Wouwa Yesus galla gitti gi'ing gopa'i talaqa tagga missi. Gang roti bagga israqqu su'u mari, Gang galla Latala Gabanga indumma. Wouwa Gang roti athaang ma qafaci-qafaci mari Ai knii ina su'u gina. Ni galla pinni gia peci wa'ang gopa'i gina. 7 Gi'ing na'a hafi bagga ranna dena pinni. Yesus galla sogi Latala Gabangga indumma. Ni Gang galla Ai knii ina su'u gitti ging gia peci wa'ang ina su'u gina. 8-9 Gi'ing gopa'i lamma ribbu uthu gammi. Ging inaa sampe githo'o bikki. Inaa glalla, Gai knii ina su'u gia qarra qhung mari tuana, bukkal israqqu walla. Wouwa Yesus wa'ang ina su'u gopa'i gitti ola. 10 Sudana wa'ang ina su'u ola gia wouwa, Yesus itanapa Ai knii ina su'u gia hee cira, ging galla illa nukku genu Dalmanuta gia.
Wa'ang Farisi ina Tuang Yesus ela Gang ba'a gaggi
(Mateos 16:1-4)
11 Sudana Yesus ina Dalmanuta ba'a, wa'ang Farisi lamma ranna Ga'ing nasi anna. Ging Gatiani ela Gang ba'a gaggi. "Bamma! Tanda herang nukku ela tufa, ni a'ing ma bukti akku He'ing sa'a ecicci Tuang Latala Gai lulla dapa.”a
12 Yesus ehing keri tenu galla birang akku, "Nang watti hing birang gsuli, Nang Naqacci! Tatali ba hing tanda herang banga? Gsuli oli! Tanda herang su wanna. Tapi Nang ma hiatufa waai.”b
13 Wouwa su'u Yesus galla wa'ang ina su'u gadu, Gang galla itanapa Ai knii ola gia hee cira dano qhappi wa.
Tuang Yesus ajar akku, wa'ang Farisi ina su'u gi'ing wa ulli-ulli
(Mateos 16:5-12)
14 Sudana Yesus ina gia dano thoong, Gai knii ina su'u immi ela ging ingpata yiamaddu pinni. Ging roti bagga nukku qai pinni. 15 Watti ging roti wa birang, Yesus akku, "Hing kuddi i ulli-ulli! raya Herodes mari wa'ang Farisi gi pangaru yeci hi'ing wanna oli. Gi pangaru su'u hoyang, dagi bibit roti lee tfoong ta'a roti ela sira gaggi.”c
16 Watti Gang birang gsuli, Gai knii ina su'u i ga kwangnga. Ba ging iabirang akku, "Bamma, su anna ba birang? Bangkali Ping roti pinni waai ba Gang birang gsuli?”
17 Tapi Yesus giammi gammi klala. Ba Gang birang akku, "Tatali ba hing roti qai birang? Hing nai maksud sa mangarti waai? Hi qhulla mang praqqa 18 Hing hitta bagga raqqu ma gsarru wouwa, tapi hing ma ba'a waai! Hing dagi billi waai nissi! Hing hiola ma watti, tapi hing ma ba'a waai. Dagi hing watti waai nissi!d 19 Roti bagga yesing Nang qafaci-qafaci mari wa'ang lamma ribbu yesing gina naa su, maqa hing pata wouwa? Sudana roti gagga garacci hing tuana su bukkal ranna?”
Ging Gamaragu akku, "Namaang, bukkal qaa nukku wai raqqu.”
20 Yesus ola githaga, "Sudana Nang roti israqqu qafaci-qafaci mari lamma ribbu uthu gina naa su, hing yedda hiammi ela-ela, e waai? Hing gagga garacci mari tuana su, bukkal ranna?”
Ging gamaragu akku, "Namaang, bukkal israqqu!”
21 Ba Yesus birang akku, ‘Mola su! Hing hitta bagga raqqu gsarru wouwa su, tatali ba hing yedda Nai lulla tama anna su mangarti waai?”
Tuang Yesus wa'ang gatta babbi Betsaida soma ela gang qauwa
22 Wouwa su'u, Yesus ina gia havang Betsaida ba'a. Suma su'u lee wa'ang gatta babbi nukku ga Yesus Gannu anna. Ging banga Yesus wa'ang su'u gatta bagga papa gang qauwa. 23 Yesus galla wa'ang su'u gathaang pinni gacukku gia havang ga'auwa. Gang galla wa'ang su'u gatta bagga ta plumma, ni Gang gatta bagga su'u papa. Gang wa'ang su'u gathaga, "Tatali? Hang i billi qauwa wa?”
24 Wa'ang su'u affang oci i billi wa-ma ni galla birang akku, "Yoo! Nang billi lee apa. Tapi dagi tee ba apa nissi!”
25 Yesus ola athaang ma wa'ang su'u gatta bagga ta maiya. Wa'ang su'u ola apaqi i billi, gatta bagga galla qauwa wouwa. Gang i billi inaxoqha wouwa. 26 Yesus galla wa'ang su'u gitti ola. Gang Galala akku, "Qauwa hang hola gia, yia gafa'a lola! Hola Betsaida gia oli.”
Petrus birang akku Yesus su'u Kristus, Wa'ang gagga Tuang Latala tula soma Ga'ing ma tufa lamanna
(Mateos 16:13-20; Lukas 9:18-21)
27 Wouwa su'u Yesus gia Kaisarea Filipi gai havang ina goyawa apa. Gia yiasamma, Yesus Ai knii ina su'u githaga akku, "Kalo hing wa'ang gi birang watti, ging birang Na'ing sa yamma?”
28 Ging Gamaragu akku, "Dena birang ‘Yohanes Bamma Iila-srani’. Dena birang ‘Pithaya Elia’, Latala Gai birang pinni tula gaggi. Gagga gafa'a dena birang akku He'ing sa Tuang Latala Gai birang pinni waci tulla gaggi gagga gafa'a.”e
29 Ba Yesus githaga akku, "Hi'ing sa, hing birang akku Na'ing sa yamma?”
Petrus Gamaragu akku, "He'ing sa Kristus! Tuang Latala tula soma ba He'ing tufa wa.”f
30 Yesus giacapa akku, "Hi'ing wa'ang ina giabirang oli, ee!”
Tuang Yesus Ai sangsara mari Ai minna gaggi birang lamanna
(Mateos 16:21-28; Lukas 9:22-27)
31 Galla su'u Yesus ina Ai knii giabirang akku, "Na'ing sa Wa'ang gagga Mola-mola. Maqa sangsara dumma-dumma Na'ing ta ma. Karna bamma adat ina, kafala agama Yahudi gi ada ina, mari guru agama ina gopa'i Na'ing doba. Maqa ging Nafara ela minna, gia gagga atharaqqu,g Nang Nola bangnga.”
32 Yesus ragam birang gsuli ba, Petrus Ga'ing keri wa i gara galla Gacapa akku, "Hang birang gsuli oli! Yamma gathaang He'ing wanna, nang gatnia waai.”
33 Petrus birang gsuli su'u Latala Gai yawa galanna waai. Ba Yesus ering Ai knii ina su'u billi. Ni Gang Petrus gacapa cilaka akku, "Heh! Su'u snara ina gi ada gai birang. I ga'auwa gia! Hang wa'ang gai yawa su'u ba wa pikir, Latala Gai yawa su'u hang wa pikir waai!”
34 Galla su'u Yesus wa'ang faqa ina su'u gitti anna Gai knii ina su'u itanapa i'ing tuana. Ni Gang gi'ing ajar akku, "Yamma gang yawa Nalanna, gang kuddi puding weri-weri taia! Gang kuddi e yawa ina su'u mari cua, ni Latala Gai yawa galanna. Ema lee owena gafara na'a, gang galanna lalu, dagi lee anaaqai ai tee athaam belang lua gia minna nissi.h 35 Wa'ang gagga bangnga ai diri qai wa urus, maqa gai bangnga su'u mang iata! Wa'ang gagga sedia minna, karna gang Nalanna mari Latala Gai yia bangnga ma lee giabirang, maqa gang Latala Ga esamma bangnga glalla waai.i 36 Watti, ee! Hang quqqa-yayang gai i nukku-nukku gopa'i dapa, tapi Latala he'ing doba cua, gai ontong anna? 37 Hang quqqa-yayang gai hicci gopa'i lua apa na'a hang he holama su'u ma gatheu gasaya!
38 Hammi ela, ee! Wa'ang quqha-yayang tagga waddi sa'a gi yeci su'u gfa'a-gfa'a. Ging Latala galanna wa hamengge waai. Yamma gang maniang Nalanna, asa Nai ajaran wa maniang, Nai na'a maqa Latala Gaffang dana Nai na'a maniang ga'ing wa mangaku. Karna Na'ing sa Wa'ang gagga Mola-mola, maqa sorga soma Nang nola anna. Latala Gai knii sorga gaggi na'a maqa Na'ing esamma-esamma anna. Ning Namaang Gai lulla ada tagga anna, ni lee klala akku, Na'ing sa yamma.