2b Sudana su, Yakob gwaqa nukku gaggu Rahel gaggi, genu Yusuf. Sudana gai umur tunna qaa nukku waai israqqu, ga'ing mari anang ina itanapa biasa gia qafii-jumba ina wa yaga esamma-samma. Gnang ina su, Yakob gaggu gagga Bilha mari Silpa gwaqa ina. Tapi Yusuf su, birang keri anang ina wa amaang gabirang.

3 Yakob awaqa faqa dena ina su gang gi'ing sayang, tapi awaqa gagga Yusuf su gang pata sayang. Karna sudana Yusuf gwaa gamissi su, Yakob bamma wa. Malla nukku, Yakob konda tenu malas nukku ela^a Yusuf gena. 4 Sudana gnang ina billi gimaang pata Yusuf ga'ing sayang, ging iammi pata gadiddi, sampe ging itawaya gabirang qauwa-qauwa.

5-7 Babbi nukku, Yusuf afaa. Ni gang faa su, mari anang ina giabirang akku, “Baa! Hing watti ni! Nang nfaa akku, pi'ing gopa'i pi maxara gammi gandum-aalai pratta. Nai gandum-aalai su, cira tasi. Tapi hi gandum-aalai su tasi i goyawa, ni galla nai su wa lualang.” Gnang ina watti gsuli, galla giammi gadiddi ma ta'a.

8 Ba ging galla Yusuf ga'ing tagoor akku, “Heh! Hang akku ha'ing ma kfala, galla ni'ing parenta gaggi?” Gang afaa birang gsuli ba, giammi galla pata gadiddi.

9 Yusuf galla ola afaa. Ba gang anang ina giabirang akku, “Baa! Nang assa nfaa. Nang weri, uula, mari hifu qoya qaa nukku waai nukku ulli gisarru. Gopa'i na'ing wa lualang qauwa-qauwa.” 10 Sudana gang faa su, mari amaang mari anang ina giabirang. Gmaang ga'ing tagoor cilaka akku, “Hfaa anna ba gsuli? Hammi su akku, na'ing, hwaa, mari hnang ina anna haya gmukku gaggi? Hang maqa bunnar!” 11 Ba Yusuf gnang ina ga'ing wa pata camburu. Tapi gmaang missi gai faa su, wa ammi ela-ela glalla waai.

12 Malla nukku gaggi, Yusuf gai gnang ina qafii-jumba ina gia havang Sikem gaba suma mia. Qafii-jumba ina su, gimaang gai. 13 Yung waai, gmaang birang akku, “Yusuf ee! Hnang ina pe'eng-pe'eng Sikem suma qafii-jumba wa aqqa. Ba hang awena gia gi'ing billi ni!”

Yusuf gamragu akku, “Yoo, nmaang!”

14 Ba gmaang birang akku, “Hang gia hnang ina mari nai qafii-jumba ina billi ni. Ging tatali na, hola anna nabirang.”

Yusuf galla tlaqa Hebron gai uutha mari maiya, galla apa Sikem soma gia. 15 Gsuli gang soma ba'a, illa uutha suma apa lafi i goyawa. Gang wa'ang nukku gatrana, wa'ang su gthaga akku, “Hang anna lafi?”

16 Yusuf gamragu akku, “Bamma. Nang nnang ina gi'ing lafi pating. Ging qafii-jumba giring pe'eng-pe'eng illa sa'a too ta giadu. Hang gisarru?”

17 Ba wa'ang su galla gabirang akku, “Waddi ging sama. Tapi ging birang akku, ging pe'eng-pe'eng havang Dotan suma gia gaggi.”

Qauwa ba Yusuf anang ina gialanna gia, Dotan soma ulli gisarru. 18 Tapi sudana Yusuf yedda auwa, gang ulli gi'ing billi wa. Ba ging iammi nukku gafara gaggi. 19 Qauwa ba ging galla iabirang akku, “Baa, hing billi ni. Kfala faa yeci anna wa! 20 Qauwa ma ping gafara. Glalla wa su, ping ga'ing mari prigi cicci nukku gammi ga'ing mora cukku. Maqa ping pimaang gabirang akku, binata hutha gaggi ga'ing trakki naa glalla wa! Su'u ni, faa su ping billi ecicci yadi ee, waai?!”

21 Gnang Ruben watti gsuli, gang yia lafi ela Yusuf slamat gaggi. Ba gang anei ina gi'ing tagoor akku, “Baa! Ping gafara oli! 22 Lebaai ping ga'ing mari prigi cicci sa'a, gammi mora cukku. Illa sama sa, illa axori, ba wa'ang dena na maqa klala waai. Hing ela gang batta oli.” Gang birang gsuli, karna gang Yusuf acci gadu, gitti ola gia gaggi.

23 Gsuli Yusuf gia giatrana, gnang ina tasi ga'ing wa pinni, galla gai konda malas su, pinni keri mari cua. 24 Ging galla ga'ing keri iroso, ni ga'ing doba prigi cicci gammi mora cukku.

25 Ging galla ola gia i inaa. Ging yedda i inaa pating, mang gomaqa ging billi su, wa'ang rombongan nukku anna. Rombongan gi unta ina su, ina dagang gaggi tagga ye'i, dagi tee gaminni maniamma gai qua, bumbu ina, mari obat gafa'a-gafa'a. Gi'ing su, Ismail waci ina gi rombongan havang Gilead mia, ba negri Mesir illa pata auwa soma gia gaggi.

26 Qauwa ba, Yahuda anei-anang ina giabirang akku, “Baa! Lebaai gsali. Ping gafara oli. Ping gafara na, gai untung anna? Tatali na'a su, ping gai we gunni gsaya. 27 Gagga qauwa su, ping ga'ing mari Ismail waci ina gia'ang. Ping ela tatali na'a su, ga'ing su yedda pinei piici. Su'u ba, ping ela gang lilla oli!” Qauwa ba gi'ing gopa'i galla gai birang su wa yawa.

28 Sudana wa'ang dagang ina su galla anna^b giaba mia, Yusuf gnang ina ga'ing keri prigi cicci su'u gammi da. Ging galla ga'ing ang mari Ismail gai wa'ang ina gina, ga'a seng perak qaa raqqu (20).^c Ba wa'ang ina su galla Yusuf ga Mesir soma gia.

29 Sudana ging Yusuf ma ang su, Ruben klala waai. Ba sudana gang ola prigi cicci suma gia su, gang afa'ang-riaqqu, karna Yusuf umbai wa. Gang galla lanna ga'ing baqqa mia su, gang pinni trakki, karna gammi pata sussa. 30 Ba gang ola anei ina gannu gia, birang akku, “Aduu! We su illa su'u mia waai wa! Ba waddi sa nang anna ela?”

31 Ging galla qafii nukku paya, ni Yusuf gai konda malas mari ni, we su'u wa gleaxu. 32 Ging galla konda we ga su mari pinni gia imaang gena, ni gabirang akku, “Nimaang! Ning konda sa'a gsarru. Hang billi ni, maqa Yusuf gai konda.”

33 Yakob konda su'u billi glalla, gang galla klala. Ba gang gimragu akku, “Aduu! Sa'a nwaqa gai konda. Binata hutha tama gaggi ba, galla ga'ing trakki sa. Hayee! Nwaqa minna wa!”

34 Qauwa ba Yakob ai konda pinni trakki ni, galla karong goni ba taiya, karna gammi pata sussa.^d Gang awaqa ga'ing nasi kiarru cilaka-laka glalla na'a waai. 35 Gwaqa mauwa mari gwaqa alla ina anna, imaang gronni gatti gang amang gunni, su'u na untung waai. Gang giabirang akku, “Waai! Nammi pata sussa sampe nang minna, karna nwaqa su nang nampata gsaya.” Yakob awaqa Yusuf minna su ampata gsaya, ba gammi sussa glalla waai.

36 Sudana Yakob gammi yedda sussa, wa'ang dagang ina su^e gia Mesir ba'a wa. Ging galla Yusuf su ga gia wa'ang ada nukku, ga'ang genu Potifar. Ga'ing su, raya Mesir gai komndan yaga.