Farisi waci alla-mauwa i'ing cua gaggi ma Yesus Gaya ga'ing akal
(Mateos 19:1-12; Lukas 16:18)
10
Wouwa su'u Yesus ina propinsi Yodea mari illa faqa ballung Yordan gai qhappi weri daa gafatang soma gia. Gia tama-tama wa'ang dumma anna Ga'ing arabbu. Yesus galla gi'ing ajar dagi biasa gsuli.2 Wa'ang Farisi lamma ranna anna Yesus Gaya ga'ing akal Gang ba'a gaggi. Ging gathaang akku, "Pi atoran gama galanna, mofe'ei allaga wouwa na, gang aggu cua qauqa e waai?”
3 Yesus giamaragu akku, "Hiammi ela-ela! Pithaya Musa atoran alla-mauwa ela ma pini su, tatali?”
4 Ging maragu akku, "Musa gai atoran akku, alla-mauwa insua qauwa, asal gang kuddi surat i'ing cua gaggi su mari aggu gena ni.”a
5 Yesus giamaragu akku, "Heh! Watti, ee! Hing hioong cakku su'u ba pithaya Musa tulis gsali! 6 Hing cerita tula-tula sudana Latala hundas mari quqqa yayang ela su'u himpata oli! Lee suma tulis akku,
Tuang Latala wa'ang ela, mauwa mari alla qamma.b
7 su'u ba mofe'ei awaa-amaang gadu,
gang galla gia aggu ga bangnga iammi nukku.
8 Alimaraqqu galla nukku wouwa.’c
9 Latala anaqai ela alimaraqu galla nukku, wa'ang aggu cua oli!”
10 Wouwa su'u, Yesus itanapa Ai knii ina su'u see nukku gammi wa. suma ging Yesus Gai ajaran wadaqqa gaggi su'u tiani.
11 Yesus giamaragu akku, "Yamma ba aggu cua, ni galla gia alla faqa gasi, gang tema! 12 Alla na'a gsuli! Kalo gang anning cua, galla gia mauwa faqa gasi, su'u na gang tema!”d
Tuhan Yesus berkat ma knii ina gina
(Mateos 19:13-15; Lukas 18:15-17)
13 Malla nukku, wa'ang ina giwaqa ga Yesus Ganni gia banga Gang athaang mari gi'ing ta maiya berkat ma gina. Gai knii wa'ang ina su'u togor.
14 Yesus ulli gsarru gsali, gang Ai knii ina su'u giakarang akku, "Ema knii ina su'u Nanni ma! Giacapa oli! Wa'ang gi'ing nissi sa'a ba Tuang Latala Gai wa'ang. 15 Hing hiammi ela-ela! Yamma ba anna Tuang Latala Ga'ing manghadap, ging kuddi Ga'ing wa ammi ela-ela, dagi knii awaa-amaang ammi ela-ela nissi. Ela gsuli waai na, ging Tuang Latala Gai wa'ang pantas waai.”e 16 Wouwa su'u, Yesus wee gwaqa su'u oci gaqa, athaang oci gi'ing nukku-nukku ta maiya, ni galla berkat ma gina.
Wa'ang wanna-wanna yia lafi Tuang Latala Gabangga glalla waai gaggi
(Mateos 19:16-30; Lukas 18:18-30)
17 Sudana Yesus ina ena apa, wa'ang wanna-wanna nukku biri anna Gatarana gaggi. Gang gaffang dana wlalang, gala tiani akku, "Tuang Guru pata hormat! Nang Hathaga qorunnu ni. Gsali, Bamma. Nang kuddi ela tatali ni nang klala nang sorga gammi Latala Gabangnga esamma-samma glalla na'a waai?”
18 Yesus gamaragu akku, "Tatali ba hang Nabirang ‘pata hormat’? Wa'ang dena nukku na'a pata hormat waai. Latala ba pata hormat. 19 Latala Gai parenta tula gaggi hang klala wouwa akku,
‘Wa'ang gafara oli;
Tema oli;
Ina taxawa oli;
Saksi kolpohong oli;
Lee gi'ing akal gi ina mari oli;
Hormat mari awaa-hamaang gina.”’f
20 Wa'ang su'u maragau akku, "Mola su, Tung Guru! Sudana nang yedda boga su'u ba nang parenta su gopei'i wouwa.”
21 Yesus ammi wa'ang su'u ga'ia. Ni Gang birang akku, "Mola! Nukku yedda. Waddi sa hang hola gia hei beenglaqa ina su gopa'i mari ang glalla. Gagga seeng hang peci-peci wa'ang sussa ina gina. Ni hang galla ma Nalanna. Maqa sorga gammi Tuang Latala beenglaqa gafa'a gagga gola ma hena.”
22 Wa'ang su'u watti Yesus birang gsuli, gammi gammi galla lilla. Gang ola gia gammi gammi pata mucci, karna gai beenglaqa pata dumma.
23 Yesus galla i billi wa-ma, ni Gang Ai knii ina su'u giabirang akku, "Watti, ee! Wa'ang ina wanna-wanna pata sussa sorga gammi gia!”
24 Watti Gang birang gsuli, Gai knii ina su'u bingun. Yesus birang ma ta'a akku, "Watti go-go ee! Hang he'ing ma Tuang Latala Gai wa'ang su pata sussa! Hing hammi su mang gampang. 25 Wa'ang ina wanna-wanna sorga gia a'ing ma Tuang Latala Gai wa'ang, gagga sussa hoyang dagi onta ada nukku batu baqa lola wa ai ala gammi gia.”
26 Yesus Gai birang su'u ela ging bingun ma ta'a. Ba ging ithaga akku, Ecicci gsuli na, yamma ba slamat dapa qauwa?”
27 Yesus gi'ing nukku-nukku billi, ni Gang birang akku, "Wa'ang manusia gi su, gasaya. Tapi hing hengpata oli: Tuang Latala Gai su gopa'i yadi qauwa.
28 Wouwa su'u Petrus amang oci birang akku, "Namaang. Ning ni beenglaqa gopa'i mari maiya wouwa ni, ning apa Halanna. Gsuli su, ning anna ba dapa?”
29-30 Yesus birang akku, "Nang mau hiabirang gsali: wa'ang gagga Nalanna, ba gang awaa-amaang, anei-anaang ina, awaqa ina, ai maxara, ai krayang, mari ai ina see gammi gopa'i mari maiya, galla gia i taa-taa Tuang Latala Gai Birang Qauwa ma wa'ang giabirang, maqa gagga gola gaggi, gang dapa malla ratu nukku. Gopa'i gagga gang maiya wouwa suu, maqa gagga gola gaggi gang dapa pata dumma. Gang Nalanna ba maqa Ga'ing na'a lee ga'ing sesa. Tapi maqa quqqa-yayang amusi, gang maqa Latala Gabangga glalla na'a waai. Su'u gagga gola gaggi! 31 Hammi ela, ee! Wa'ang gagga ga'ing ela ada, Tuang Latala Gai pikiran galanna, maqa ga'ing yadi wa'ang pata camma. Wa'ang gagga akku, ga'ing su'u wa'ang camma, Latala Gai pikiran galanna, ga'ing su'u maqa yadi wa'ang ada.”g
Sa'a gagga malla hathagu Tuang Yesus Ai weri minna gaggi birang
(Mateos 20:17-19; Lukas 18:31-34)
32 Sudana su'u Yesus ina Yerusalem gia. Yesus apa e'intula-tula. Gai knii lamma qaa nukku wai raqqu mari wa'ang gafa'a ina Galanna. Ging yedda immi ela amana ba Gang tula birang akku, lee mau Yerusalem soma Gafara. Su'u ba ging galla bingun, mari te'i osfiarra. Watti gsuli, Yesus Ai knii ina su'u qai gitta, ni amana ba maqa Yerusalem soma Ga'ing wanna su'u ola ma giabirang. 33 Gang birang akku, "Hi'ing watti, ee! Waddi sa ping Yerusalem gia. Na'ing sa'a, Wa'ang gagga Mola-mola. Maqa soma ging Na'ing ma kafala agama Yahudi gi ada ina, guru agama ina gia'ang. Su'u ni ging maqa Na'ing hukkung minna gaggi. Ni ging Na'ing mari wa'ang faqa gagga Latala Ga'ing klala waai ma gina. 34 Ni ging birang ela Nang maniang. Ging mali ma Na'ing ta plumma. Ging Na'ing buggi mucci-mucci. Wouwa ni ging galla Nafara minna. Nang ecicci minna. Tapi gagga attharaqqu, Nang Nola bangnga.”h
Jakobus mari Yohanes bangnga i'ing wa'ang ada
(Mateos 20:20-28)
35 Galla su'u Jakobus mari Yohanes, lee akku Sabadeus gwaqa ina, Yesus Ganni anna. Ging gabangga akku, "Tuang Guru! Ning He'ing parlu!”
36 Yesus githaga akku, "Hing anna parlu?”
37 Ging Gamaragu akku, "Gsali! Maqa Hang missi parenta pinni wouwa suu, ning banga Hang ni'ing oci nukku yedding missi, nukku tala'u missi, ni ni'ing na'a parenta pinni.”
38 Yesus giamaragu akku, "Hi'ing sa amana ba hing bangnga su hing mangarti waai. Na'ing sa maqa sangsara dumma dapa. Su'u ba tatali? Hing akku, hi'ing na'a mampu Na sangsara su'u lua esamma-samma sampe minna?”i
39 Ging Gamaragu akku, "Namaang, ni na'a mampu!”
Yesus giamaragu akku, "Ecicci, hi'ing na'a maqa sangsara su'u lua Na'ing gsali. 40 Tapi yamma ba maqa nathaang yeding mari Nathaang tala'u missi, su'u Na'ing ba putus waai. Ga'ing su Namaang Latala Gai haak. Gang putus wouwa, yamma-yamma ba suma missi.”
41 Sudana Gai knii gagga faqa watti Jakobus mari Yohanes bangnga gsuli, ba ging karang. 42 Yesus galla gi'ing gopa'i gitta ni giabirang akku, "Gsali! Hing klala wouwa su. Wa'ang ada parenta pinni, ging biasa i wa'ang gi'ing dimma sampe ging ale'u gasaya. Bangsa gagga Tuang Latala klala waai, ina su'u, gi gafa'a parenta ela ma ta'a-ma ta'a, sampe gi wa'ang ina oong oci na'a gasaya. 43 Tapi hi'ing ela gsali oli! Hi'ing sa yamma yawa a'ing wa'ang ada, gang kuddi yadi wa'ang tabang nissi, su'u ni gang wa'ang faqa gi'ing bleta.j 44 Wa'ang gagga yawa a'ing yadi kafala, gang kuddi e diri ela dagi tabang nissi.k 45 Na'ing Wa'ang gagga Mola-mola sa'a anna, lee Na'ing wa bleta gaggi waai. Tapi Nang anna wa'ang dumma-dumma gi'ing bleta. Tapi Nang anna wa'ang dumma gi tmeci ina pati gaggi.”
Tuang Yesus wa'ang gatta babbi ela gang qauwa
(Mateos 20:29-34; Lukas 18:35-43)
46 Yesus itanapa Ai knii, mari wa'ang dumma gia kota Yeriko ba'a. Sudana ging mau apa lalu, wa'ang gatta babbi nukku yia gara missi ina banga. Genu Bartimeos, bamma Timeos gwaqa. 47 Sudana gang watti akku, Yesus, Nasaret waci suma lola, gang wuara cilaka-laka akku, "Yesus! Daud gwaqa grasi! Ning Harani pata yung wouwa! Hammi na iya ni!”
48 Watti gang wuara gsuli, wa'ang ina ga'ing togor akku, "Heh! Hamang gunni!’
Gang ola wuara cilaka-laka akku, "Yesus! Daud gwaqa grasi! Hammi na iya ni!”
49 Yesus galla aya mora. Gang galla birang akku, "Ga sama ma ni.”
Ba ging gannu wa akku, "Qauwa hamang gunni! Tuang Guru hatta su. Qauwa wa!”
50 Watti gsuli, Bartimeos ai nauwang snaya acci cua, gang sargatta cira tasi wa Yesus Gatarana.
51 Yesus gathaga akku, "Hang anna banga?”
Wa'ang su'u Gamaragu akku, "Namaang, ee! Nang banga nang i billi qauwa.”
52 Yesus ola gabirang akku, "Hang Na'ing parcaya ba, Nang ela hang qauwa. Waddi sa'a qai hang qauwa wouwa! Qauwa hola gia!”
Bartimeos gatta bagga galla i billi qauwa. Wouwa su'u gang Yesus itanapa gia.