Wa'ang gai atoran ma Tuang Latala Gai parenta gatheu oli
(Mateos 15:1-9)
7
Wa'ang Farisi gatta nukku, mari guru agama lamma ranna Yerusalem gaggi, itaqnapa anna Yesus Gatarana. 2-5 Wa'ang Farisi ina su'u ging Yahudi gai adat pinni cara. Gagga conto gsali, lee ena i naa, gang kuddi athaang ci'a adat gai yawa galanna ni. Ging angnasi ola anna na'a gsuli, ging kuddi oya ni. Hoyang-hoyang gi ina haragatta gaggi dagi laa, tiang, too, ketel ina su'u gopa'i ci'a adat gai yawa galanna, ni ging ma i naa qauwa.Yahudi gagga gafa'a dena adat su'u galanna waai, wa'ang Farisi ina su'u giakarang.
Su'u ba sudana ging billi Yesus Gai knii ina su'u i naa ithang ci'a adat gai yawa galanna waai, ging giakarang. Wouwa su'u ging galla anna Yesus Gai ga tmeci akku, "Anna ela ba He knii ina su'u i naa ithang ci'a waai? Su'u ging pithaya gi adat gey yawa galanna waai!”
6-7 Yesus giamaragu akku, "Hi’ing sa birang gafa'a, ela gafa'a! Tuluma pithaya Yesaya, Latala Gai lala tulis akku,
‘Wa'ang ina sa Nameli,
Giyaqa su'u ba Nameli, giammi gammi su'u waai.
Ging ela gsuli na'a mang parsuma.
Ging wa'ang gai atoran oci galeci.
dagi atoran su'u Na'ing ba gacukku nissi.
Ging ammi su'u Na'ing ba atoran su'u ela.’
Hi'ing na gsuli.a 8-9 Hing Latala Gai parenta mari maiya wouwa, ni hing wa'ang gai adat qai galanna. Hi'ing sa'a pata pintar ela gsuli!
10 Tula-tula pithaya Musa Latala Gai parenta ma hiabirang akku, "Hormat mari hawaa-hamaang giena.’ Assa ma ta'a akku, "Kalo wa'ang nukku awaa-amaang gaqaiya, kuddi ga'ing hukkung minna.”b 11-12 Tuang Latala ajar gsuli, tapi hing ajar gafa'a. Hing akku, ‘Kalo lee i na nukku lala ela Tuang Latala gena, ema gwaa-gamaang pata susa na'a, tapi i na su'u mari giomoli oli, karna gang Tuang Latala Galala i na su'u ma Gena wouwa.’ 13 Su'u ba Nang waddi birang, hing Tuang Latala Gai yawa mari cua wouwa. Hing atoran safa'a ma gatheu. Hing atoran dumma ba gatheu wouwa.”
Ina yeci piammi gammi mia su'u ba da cukku
(Mateos 15:10-20)
14 Yesus wa'ang gafa'a suma ina gitta akku, "Hola woru watti, su'u ni hing mangarti. 15 I na gagga hitho'o gammi cukku su'u, ela hing blaqqas waai. Tapi i na gagga da cukku su'u ba, ela hing blaqqas. 16 [Yamma ba gowa'a wanna, watti go-go!]”c
17 Yesus mari E knii ina cira apa gia wa'ang ina su'u gadu, ging gala see nukku gammi wa. Ni Gai knii ina su'u wapubirang gai arti tiani. 18-19 Yesus giamaragu akku, "Hi'ing na'a mangarti waai? Gai maksud su'u gsali: Amanna ba lee naa su'u ba, qauwa. Amanna ba ya cukku su'u ba, yeci. Amanna ba ping naa su'u pitho'o gammi yifa, maqa gang ola ma lorang. (Tuang Yesus Gai maksud, ema lee anna qai naa. Lee wa qhappi waai.)
20 Amanna ba wa'ang gammi gammi da cukku su'u ba ela gang blaqqas sampe Tuang Latala Ga'ing gethu gammi yeci-yeci, mari ga'ing tuana atawaya. 21 I na yeci dumma ba wa'ang gammi gammi da cukku! Dagi: gammi yeci, wa'ang gata'a tapi su'u ganning waai e su'u gaggu waai, taxawa, wa'ang gafara, 22 luthang, tema yeci, yahat, kolpohong, e nafsu galanna, iri hati, wa'ang birang ela gang ba'a, afenni, tafiyawa, mari goong cakku.
23 Gopa'i gagga yeci su'u wa'ang gammi gammi da cukku. Ga'ing su'u ba ela gang yeci. Tuang Latala na'a ga'ing wa Gethu gammi yeci-yeci.”
Tuang Yesus bammala Yahudi waai nukku gomoli
(Mateos 15:21-28)
24 Wouwa ba Yesus ina cira suma ga'auwa, ging galla apa kota nukku genu Tirus gia. Gia soma, ging see nukku gammi wa. Yesus atawaya lee klala Gang see suma mia. Su'u na'a Gang suma unni gasaya.
25-26 Bammala Yahudi waai nukku na'a suma mia. Da'era Fenasia propinsi Siria soma gwaa ga'ing wa missi. Sudana gang watti Yesus suma anna, gang Yesus Gannu gia banga, gang gwaqa alla gai snara gathiala cukku.
27 Tapi Yesus birang cua akku, "Knii-knii intula inaa wouwa ni, gai qarra quung su cua bar gena naa.” [Gagga maksud engdaga waai, Yesus kuddi E wa'ang Yahudi ina giamoli ni, Gang galla wa'ang faqa giomoli.
28 Bammala su'u Gai birang wa gola akku, "Namaang, He birang su qunna! Tapi bar meya yeguana suma. Ge na'a knii gai qarra dena slei gammi ba'a cukku su'u mari naa.” [Gagga maksud akku, sudana knii ina i naa, bar na'a i naa. Ema Yesus Ai wa'ang Yahudi ina su'u giomoli, Gai na'a kuddi wa'ang faqa ta ulli.]
29 Watti gsuli, Yesus gabirang akku, "Yoo! He birang su ecicci! Qauwa ba hola gia, snara su cukku gia hawaaqa alla ga'auwa wa.”
30 Bammala su'u galla ola. Gia see ba'a, gwaqa su'u ta'a quri qauwa. Snara su'u cukku gia wouwa.
Wa'ang nukku lilla raqqu ga'ing mia gammi hippi mari gola kuanga, Tuang Yesus ela gang qauwa
31 Yesus ina galla kota Tirus cira gia ga'auwa, ging apa tuthu lola gia kota Sidon gafakki. Suma ging apa gia dano Galilea ba'a. Wouwa ging galla apa da'era kota qaa nukku ging genu ‘Dekapolis’ suma gia. 32 Suma su'u wa'ang gammi hippi mari gola kuanga nukku wanna. Ge dena ina ga Yesus Gannu gia. Ging Yesus gabanga Gang athaang mari wa'ang su'u ta maiya, ella gang qauwa gaggi.
33 Ba Yesus wa'ang dumma su'u gadu, galla anaqai wa'ang su'u gannu wa. Yesus athaang upi mari wa'ang su gola baqa raqqu-raqqu gammi gasori wa. Galla su'u Gang mali mari athaang uppi todu, galla mari galefu ta maiya. 34 Yesus affang oci undas mira, galla ehing keri Gi birang ma birang akku, "Efata!” (gagga arti akku, "Qauwa he'ing cxanna!”)
35 Gang mang birang gsuli, wa'ang su'u gola na galla i watti, wa'ang glefu cakku su'u na galla plefu, gang galla birang qauwa-qauwa.
36 Alimraqu galla ola wa'ang dumma ginnu gia. Yesus gi'ing wa qhappi akku, "Watti, ee! Hing lee giabirang oli akku Na'ing ba wa'ang sa ela gang qauwa.” Yesus wa qhappi pata cakku, tapi ging i taa-taa gonung apa lee giabirang. 37 Wa'ang gagga gi birang su'u watti, ging pata a'agaxa. Ba ging galla iabirang akku, "Wa'ang pata hebat! Gang ela gopa'i qauwa. Wa'ang gola kuanga gala i watti, wa'ang gammi hippi birang qauwa.”