Nasaret waci Yesus Ga'ing wa itawaya
(Mateos 13:53-58; Lukas 4:16-30)
6
Yesus mari E knii su'u ola Ai havang Nasaret gia. 2 Sudana su'u Yahudi waci gi weri sembayang, ba Yesus see sembayang gammi wa wa'ang gi'ing ajar gaggi. Weri su'u, wa'ang dumma gia suma sembayang. Sudana ging Gai ajaran watti, ging mang a'agaxa akku, "Wa'ang sa'a pata pintar! Ga'ing na'a lulla Ga'ing wanna! Tatali ba Gang gsuli qauwa? 3 Ga'ing su'u mang wa'ang athaang molang waci. Pi'ing klala Gwaa su'u genu Maria; Gnei ina su'u genu Jakobus, Yoses, Judas, mari Simon. Gaggi lamma ranna na'a wanna. Pi'ing gopa'i havang nukku qai gammi bangnga sa!” Su'u ba ging Ga'ing wa sannang waai, sampe ging itawaya Gamang watti.4 Yesus gabirang akku, "Mola su'u! Tuang Latala Gai birang pinni waci havang faqa gaggi su'u ba lee pata Ga'ing hormat. Tuang Latala Gai birang pinni waci gi havang gaggi su ging ga'ing hormat waai.”a
5-6a Tapi wa'ang ina su'u giammi gammi pata cakku, sampe ging itawaya Yesus Ga'ing parcaya. Su'u ba Gang a'agaxa, Gang galla suma Ai lulla tufa waai. Gang wa'ang lilla nukku-raqqu qai ba ella ging qauwa.
Tuang Yesus Ai knii lamma qaa nukku wai raqqu gi'ing utus
(Mateos 10:5-15; Lukas 9:1-6)
6b Yesus gia havang iaba ina su'u goyawa apa Tuang Latala Gai yawa mari wa'ang ina gi'ing ajar. 7 Gang Ai knii lamma qaa nukku wai raqqu su'u gitti raqqu-raqqu gia Latala Gai Birang Qauwa mari lee giabirang. Ge na'a Ai lulla ma gina ging snara githiala. 8-9 Gang gitti akku, "Hing gia su'u hing ina dumma-dumma pinni oli, maqa Latala ba ator. Hing yiamaddu, seeng, mari taas pinni oli. Doo mari lakki haya mia gaggi mari konda nukku qai pinni, 10 Kalo wa'ang dena i see hi'ing trima, hing kuddi suma ta'a sampe hing cogi cira apa. 11 Kalo hing illa dena gia, wa'ang suma su'u hing trima waai, e ging itawaya hiamang watti, hing cira gia suma ga auwa. Ni hing galla mlou haya gathappi su'u lafi'i asua ni galla giabirang akku, "Hing hitawaya watti. Ba gai sulla su, hing hinaqai lua!”’b
12 Wouwa su'u ging galla gia, Birang Qauwa su'u ging mari lee giabirang. Ging akku wa'ang gopa'i kuddi tmeci ina su'u mari maiya, ni galla ola bangnga Latala Gai yawa galanna. 13 Gi'ing na'a snara ina githiala gia. Gi'ing na'a galla minya mari wa'ang lilla goong ta maiya, ni galla sembayang ela ging maxavu. Sudana qai ging qauwa.c
Ging Yohanes bamma iila-srani gafara minna
(Mateos 14:1-12; Lukas 9:7-9)
14 Sudana su'u, wa'ang i taa-taa gopa'i Yesus Ga'ing klala wouwa. Gai lulla, gai carita su'u gia raya Herodes golamba'a. Wa'ang dena birang akku, "Yohanes, bamma iila-srani su'u ola bangnga wa, gang Yesus Ga'ing mia. Su'u ba Gang tanda herang gopa'i ela qauwa.”
15 Tapi wa'ang faqa dena birang akku, "Waai! Elia ba ola bangnga, ga'ing ba Ga'ing mia.” Wa'ang faqa dena na'a birang akku, "Ga'ing su'u Tuang Latala Gai birang pinni waci gagga faqa tula gi.”d
16 Sudana raya Herodes watti ging Yesus Ga'ing birang gsuli, ba gang giabirang akku, "Wa'ang sa Yohanes bamma iila-srani gagga tula nang lee gitti gia goong taqhanna mari su. Waddi gang ola bangnga wa su!”
17-18 Tula raya Herodes imaraqqu Yohanes gi parkara ada wanna, su'u ba raya Herodes gabirang gsuli. Gai carita su'u gsali: Raya Herodes aneei Filipus genu Herodias mari gasi wouwa. Sudana su'u Filipus mari Herodias su'u i'ing cua yedda. Su'u ba Yohanes gacapa ta gola-gola akku, "Bamma raya, hang haneei gaggu su mari oli. Gsuli su pi Yahudi gai atoran gayaya su!” Gsuli na'a Herodes alla su'u mang gasi. Galla ni gang lee gitti gia Yohanes gaffini mari buui gammi gadu.e
19 Yohanes gacapa ta gola-gola, ga'ing su'u ba alla su'u gama'a gafara minna gaggi. Tapi gang ela yedda, Herodes lee gitti gia Yohanes ga'ing mari buui gammi gadu wouwa. 20 Ni gang galla tentara ina su'u gitti ging Yohanes ga'ing aqqa go-go.
Herodes su'u Yohanes ga'ing wa te'i mari hormat. Gang klala akku, Yohanes su'u Tuang Latala ba ga'ing panatu anna. Ga'ing su'u wa'ang gammi qauwa. Herodes sukka Yohanes gai birang watti. Malla nukku-nukku, gang Yohanes gai birang watti, gammi sannang waai.
21 Weri nukku, bammala Herodias ammi lilla su'u wa gola. Sudana, ging raya Herodes gai weri yadi ela. Ging wa'ang ada ina su'u glia ukku suma anna. Gi'ing gagga anna su'u pamrinta gi wa'ang ina, tentara gi ada ina, mari Galilea gai bamma adat ina. 22 Sudana ukku masamma, bammala Herodias gwaqa alla cira wa rongge. Gai rongge su'u pata malas, ela Herodes mari baniaki ina su'u giammi gammi sannang. Herodes galla alla su'u gatta gathaga akku, "Hang indena banga, mang birang! Maqa nang mari hena. 23 Hang banga nang lallang sa peci raqqu na'a, nang ma hena. Nai birang sa nang Tuang Latala genu pake he'ing sumpa!”
24 Alla su'u galla wa awaa gathaga akku, "Nawaa! Hei yawa nang anna wa namaang gabanga?”
Ba gwaa gamaragu akku, "Haaa, sa'a ni! Hang wa Yohanes goong kotang ba banga.”
25 Alla su'u galla cargatta Herodes gannu wa birang akku, "Namaang! Nang banga hang Yohanes goong kotang mari kali mi'a ma nena. Waddi sa'a qai!”
26 Herodes watti gsuli, gaxoya iata lamanna. Gang e birang su'u keri gasaya wouwa, karna wa'ang gopa'i gai sumpa su'u watti wouwa. 27 Gang galla komdan nukku ga'ing parenta gitti buui gammi gia Yohanes goong taqhanna mari. 28 Ba ging gia Yohanes goong taqhanna mari kali mi'a, ni ging pinni gia alla su'u gena. Gang kali su'u mari, ni galla pinni gia awaa gena. 29 Sudana Yohanes gai knii ina watti akku, lee anna Yohanes goong mari pinni gia wouwa, ba ging anna gai qusi mari ga gia pamma.
Yohanes gai carita minna gaggi, mang gsuli.
Tuang Yesus wa'ang ribbu yesing gracci qara gi naa
(Mateos 14:13-21; Lukas 9:10-17; Yohanes 6:1-14)
30 Malla nukku, knii gagga Yesus gi'ing utus wouwa su'u iola anna Yesus ga'ing tuana. Anna ging ela wouwa, mari anna ging lee gi'ing ajar wouwa su'u gopa'i ging Gabirang. 31 Sudana su'u wa'ang pata dumma wa-ma Yesus Ga'ing lafi. Ela Yesus mari E knii ina i naa na'a gasaya. Ba Yesus Ai knii ina su'u giabirang akku, "Ma ping gia illa axori lafi, ni ping hehing keri qorunnu.”
32 Ba gi'ing gopa'i galla hee tagga cira, galla illa axori gia havang ga'auwa.
33 Wa'ang dumma ulli gisaru, Yesus ina gi hee, dano gara lola gia. Su'u ba ging cira i havang maiya galla aya apa yia lola gia i'ing tula soma ba'a. Yesus ina i'ing yaqqang iadang. 34 Sudana Yesus ina hee tagga cukku, Gang billi wa'ang dumma Garani wouwa. Gammi galla gia'iya. Anna ba ging ela gaggi su'u ging klala waai, dagi waddi jumba gai wa'ang aqqa waci wanna waai nissi. Glalla su'u Gang galla Tuang Latala gai yawa mari ma gi'ing ajar,f 35-36 weri agga wa gia weri mo'ong. Gai knii ina Gabirang akku, "Bamma! Lebaai Hang wa'ang dumma sa gopa'i gitti ging havang pe'ing-pe'ing sama gia qarra alli naa. Weri mo'ong wa. Sama sa qarra wanna waai.”
37 Yesus giamaragu akku, "Gsuli oli! Hi'ing ba qarra mari ma gina ging naa.”
Tapi ging ola Gathaga akku, "Hiii! Ping wa'ang dumma gsali qarra mari ging naa su, pi seeng kuddi pata dumma ni! Dagi wa'ang athaang molang gai humang tunna nukku gaggi!g Ping tama seeng dumma gsuli mari?!”
38 Yesus maragu akku, "Hing gia lafi ni, yamma ba yiamaddu pinni.”
Ba ging galla gia lafi, wouwa ging ola anna birang akku, roti bagga yesing mari hafi bagga raqqu qai.”
39 Yesus galla gitti gi'ing gopa'i too tagga suma i'ing tuana missi. 40 Ba ging galla i'ing tuana missi. Wa'ang dena su'u i'ing tuana lamma ratu nukku-ratu nukku, dena su'u lamma qaa yesing-qaa yesing.
41 Qauwa ba Yesus galla roti bagga yesing mari hafi bagga raqqu su'u mari athaang mi'a. Gang Affang oci hundas rana Tuang Latala Gabanga dumma-dumma. Wouwa ni Gang roti su'u qafaci-qafaci galla lunna Ai knii ina su'u gina ging apa gia wa'ang dumma su'u gopa'i giopeci. Hafi bagga raqqu na'a Gang peci ma gina. 42 Wouwa su'u gi'ing gopa'i galla missi i naa sampe githo'o bikki. 43 I naa glalla, Gai knii ina su'u gia qarra gagga gracci su'u mari tuana, bukkal qaa nukku wai raqqu walla.
44 Wa'ang gopa'i gagga dumma su'u lamma ribbu yesing gammi. Su'u waddi ni wa'ang mauwa qai ba ging taia. Wa'ang alla qamma mari knii-knii ina su'u ging taia waai.
Tuang Yesus hilla tagga apa
(Mateos 14:22-33; Yohanes 6:16-21)
45 Wouwa su'u, Yesus E knii ina su'u gitti gia hee cira i'ing tula havang Betania, dano gai qhappi wa suma gia. Ga'ing yedda suma, Gang wa'ang dumma su'u gitti ola gia gaggi. 46 Sudana gi'ing gopa'i ola gia wouwa, Gang hera mugga nukku tagga mira sembayang.
47-50 Illa galla qana ba Yesus ola cukku. Gang billi Gai knii ina gi hee su dano gai too-too mia wouwa. Ging hee bahi pata cilaka, karna gi hee wahang hangi ranna. Illa hoyang blola, Yesus gialana gia. Gang hilla tagga apa. Sudana Gang hoyang gi hee su'u gafakki, ging ulli Gsarru. Ging pata riaqqu. Ging ithaga akku, "Bah! Anna sa? Snara e anna?”
Yesus tosi-birang akku, "Baa! Na'ing sa. Te'i oli!”
51 Sudana Yesus hee gammi cira, hangi galla axori. Gai knii ina su'u gopa'i a'agaxa glalla na waai. 52 Wadaqqa ging billi Yesus Ai lulla ma wa'ang ribbu yesing gracci qarra gina na. Su'u na'a gi'ing yeda Gai lulla mangarti mola-mola waai, karna giammi-gami cakku.
Wa'ang lilla Genesaret gaggi ina qrari Tuang Yesus Gannu gia
(Mateos 14:34-36)
53 Sudana ging gia dano qhappi ba'a, ging kota Genesaret gai tuthu suma teri. 54 Sudana ging hee tagga cukku, wa'ang dumma ulli gisarru. Ging wuara akku, "Boo! Yesus anna wa sa!” 55-56 Gi'ing gopa'i biri gia lee giabirang i goyawa, ba ging galla i wa'ang lilla ina su'u lua anna.
Asal ging watti akku Yesus yul nukku mia, gi'ing gopa'i wa'ang lilla ina su'u lua anna lapang tlaqa tagga githu'i maiya. Ging akku, "Wa'ang lilla ina su'u Yesus Gai konda duli papa qai, ging maxavu ba su'u!” Mang papa, ging galla maxavu lamanna.