Sudana ging hee gammi mia, galla cukku uyang cicci da gaggi, wa'ang bunnar su'u auwa soma ulli gisarru. Ba gang galla qusigoya suma cukku ma Yesus Gaya gaba aya ukku i muddi. 7-8 Yesus wa'ang su'u gaffang billi gsuli ba, Gang galla birang akku, "Heh! Snara yeci! Hang cukku wa'ang su ga'auwa gia!”

Wa'ang su'u wuara cilaka-laka, ni galla birang akku, "Heh! Hang nai anna ela gi?! Nang pata klala He'ing su Yesus, Tuang Latala ada liawang Gwaqa. Nang banga Hang na'ing buggi oli!”

9 Yesus galla gathaga, "Henu yamma?

Wa'ang su'u Gamaragu akku, "Na'ing sa nenu Legion, ni'ing sa wa'ang pata dumma, anna dena, gagga dumma su hoyang dagi batalyon gai dumma gsuli!”

10 Snara ina su'u galla wa'ang su'u gitti gang Yesus Gabanga, Gang githiala illa suma su'u ga'auwa oli.

11 Auwa na'a waai, suma su'u wa'ang lamma ranna i bee aa nukku aqqa pating. Bee su'u gopa'i ribbu raqqu gammi. Ging mugga gara lola i otta apa. 12 Snara ina su'u Yesus Gabanga akku, "Nitti ning bee ina su'u giammi gammi cukku.”

13 Watti gsuli, Yesus na'a galla yawa. Ba snara ina wa'ang gammi mia su'u gopa'i biri gia bee ina su'u giammi gammi cukku. Ba bee ribbu raqqu su'u biri otala mugga su'u gai yegwanna yifa taa gammi gia, ba gopa'i suma adimmu galla minna.

14 Gsarru gsuli, wa'ang gagga suma bee aqqa ina su'u galla pata te'i. Ba ging galla biri gia havang goyawa birang apa. Wa'ang dumma galla biri anna amanna Yesus ela su'u billi gaggi. 15 Ging anna Yesus gatharana, ba ging wa'ang snara ga'ing wanna suma missi na'a ulli gsarru. Gammi gammi na'a ola qauwa wouwa, ga'ing na'a galla lanna taia wouwa. Gsarru gsuli, gi'ing gopa'i galla te'i, ging klala yamma ba bisa snara ina su'u githiala cukku qauwa, ga'ing su'u wa'ang pata hebat. 16 Qauwa ba gi'ing gopa'i i goyawa apa birang akku, ging itta qauwa ma gsarru wa'ang bunnar su'u qauwa wouwa. Bee ina su'u na'a cukku dano gammi adimmu minna. 17 Ba havang su'u gai wa'ang apa ma Yesus GabiGang apa gia gi havang su'u ga'auwa.

18 Sudana su'u Yesus ena hee tagga cira, wa'ang snara ga'ing wanna su'u apa ma Gabirang akku ga'ing na'a Galanna.

19 Yesus atawaya. Gang gabirang akku, "Hang mang hola gia hawaa-hamaang ina giabirang akku, Tuang Latala ba ela hang qauwa. He na'a giabirang akku, Tuang Latala su pata he'ing sayang.”

20 Wa'ang su'u galla ola propinsi kota qaa nukku, ging biasa genu ‘Dekapolis’ su'u goyawa apa. Anna ba Yesus ela ma gena su'u gopa'i gang ma giabirang. Wa'ang gagga gamang wati su'u gopa'i pata ia'agaxa birang akku, "Ecicci, su!”

21 Wouwa su'u Yesus ina yialla keri dano ga qhappi wa. Sudana ging hee tagga cukku, wa'ang indumma qrari anna Ga'ing arabbu. 22 Suma su'u, wa'ang nukku genu Yairus. Ga'ing su'u see sembayang kota suma gai kafala. Sudana gang ulli Yesus gsarru, gang cukku Gaffang dana aya ukku i muddi galla. 23 Gabanga akku, "Namaang, ee! Nwaqa alla nukku gai umur waddi ni tunna qaa nukku wai raqqu su, lilla hoyang minna. Hang gia gomoli ela gang maxavu ni.”^a

24 Ba Yesus galla Yairus galanna gai see gia.

Sudana ging galla apa, wa'ang dumma Galanna apa sampe ging Gai tala'u-Gei yeding gopa'i wa arabbu.

25 Wa'ang ina su'u gi thoong-thoong, alla nukku lilla alaqama ga'ing mia'a gagga glalla wanna waai tunnu qaa nukku wai raqqu wouwa. 26 Gang e seeng e beenglaqa gopa'i mari dokter ina su'u gina ba galla wanna waai. Wa'ang nukku na'a ga'ing ela qauwa gasaya. Gai lilla su'u mang ada ma ta'a. 27-29 Alla su'u gang Yesus watti dumma wouwa. Su'u ba gang wa'ang dumma su'u gi thoong gammi suma apaki asori wa, su'u ni gang Yesus gaba-gaba gorana apa gaggi. Gammi gammi su'u birang akku, "Nang Yesus Gai konda su'u papa qauwa, nang pasti qauwa!”

Sudana gang Yesus gai konda papa, gai lilla alaqama ga'ing mia su'u, gomaqu galla qauwa. Gang klala, gang ecici qauwa wouwa.

30 Sudana su'u na'a, Yesus A'ing rasa Gai millung qrari Ga'ing baqqa cukku gia. Ba Gang olla tasi wa'ang ina su'u gi'ing billi. Wouwa Gang galla tiani akku, "Hi'ing yamma ba Nai konda papa sa?”

31 Gai knii Gamaragu akku, "Hang Hnaqai billi. Wa'ang dumma gsali sa ping tatali klala. Tatali ba Hang tiani akku, ‘Yamma ba Nai konda papa?”’

32 Yesus tasi gi'ing billi goyawa, Gang wa'ang gagga Gai konda papa su'u klala gaggi. 33 Watti Yesus tiani gsuli ba, alla su'u galla pata te'i. Ba gang ma Yesus Gaffang dana suma aya ukku i muddi galla birang akku, "Namaang, ee! Na'ing ba He konda papa su.”

34 Ba Yesus gamaragu akku, "Hang ecicci Na'ing parcaya ba, hang galla qauwa wa. Waddi sa'a ba hammi qauwa-qauwa hola he see gia, he susa su glalla wa.”

35 Yesus yedda birang pating, wa'ang dena Yairus gai see soma ba anna, birang akku, "Hayee, alla gwaqa su'u olla wa. Ba hing Tuang Guru Ga'ing ela macca oli. Gitti Gang gia oli.”

36 Yesus wa'ang su'u gai birang gagga bunnu waai. Ba Gang Yairus gabirang, "Hang te'i oli, e! Mang Latala qai Ga'ing parcaya.” 37 Yesus galla cira apa Ai knii gagga faqa ina su'u mari gadu. Gang Petrus, Jakobus imaraqqu e wee Yohanes ba mari, ging galla itanapa apa gia. 38 Sudana ging Yairus gai see ba'a, ging billi su'u wa'ang dumma tafura wa-ma pating, gi'ing na'a watti wa'ang taya qiarru gamang ada. 39 Yesus see gammi wa, galla githaga akku, "Tatali ba hing tafura mari taya qiarru gsali sa? Alla gwaqa sa minna waai. Gang mang ta'a sa.”

40 Ging Yesus Gai birang watti gsuli ba, gi'ing gopa'i ga'ing wa Gela. Gang wa'ang ina su'u gitti rahang gia. Ni Gang galla wei alla su'u gwaa-gamaang, mari Eii knii lamma hathagu gitta, gitti gi'ing gopa'i wei alla su'u gai kamar gammi wa.

41 Qauwa ba Yesus galla alla gwaqa su'u gathaang pinni, ni Gang galla gi Aram birang mari gabirang akku, "Talita kum!” (Gai arti akku, "Noaqa ee! Qauwa cira!”)

42-43 Gomaqu qai, alla su'u cira galla mulai apa. Ba Yesus alla su'u gwaa gabirang akku, "Qarra mari alla gwaqa sa gena gang na!”

Wa'ang gopa'i amanna ba Yesus ela su'u billi, ba ging a'agaxa. Yesus gi'ing wa qhappi akku, "Hing wa'ang dena na'a giabirang oli akku, Nang ga'ing ela ola bangnga wa!”